យុទ្ធសាស្រ្ត និងចក្ខុវិស័យ រៀបចំដែនដី ខេត្តស្វាយរៀង

 (ខេត្តស្វាយរៀង): នាព្រឹកថ្ងៃទី២៨ ខែមិថុនា ឆ្នាំ២០២៣ លោក ម៉េង ប៉ុណ្ណារិទ្ធ អគ្គនាយករង នៃអគ្គនាយកដ្ឋានរៀបចំដែនដី នៃក្រសួងដែនដី នគរូបណីយកម្ម និងសំណង់ លោក ហែម ពិសិដ្ឋ អភិបាលរងខេត្ត លោក ប្រាក់ ចាំ សមាជិកក្រុមប្រឹក្សាខេត្ត  បានអញ្ជើញចូលរួមនៅក្នុងអង្គសិក្ខាសាលាពិគ្រោះយោបល់លើសេចក្តីព្រាង ផែនការរៀបចំដែនដីខេត្តស្វាយរៀង ចក្ខុវិស័យ និងយុទ្ធសាស្ត្រ ដែលរៀបចំដោយអគ្គលេខាធិការដ្ឋាននៃគណៈ​កម្មការរៀបចំដែនដីនិងនគរូបនីយកម្មថ្នាក់ជាតិនិងធនាគារអភិវឌ្ឍន៍អាស៊ី(ADB)។

ពិធីនេះបានប្រព្រឹត្តទៅនៅសណ្ឋាគារវ៉ៃគោ ដោយមានការអញ្ជើញចូលរួមពីសំណាក់ លោក Richard Mabbitt ប្រធានក្រុមការងារទីប្រឹក្សាបច្ចេកទេស ADB ផងដែរ។

លោក ម៉េង ប៉ុណ្ណារិទ្ធ អគ្គនាយករង នៃអគ្គនាយកដ្ឋានរៀបចំដែនដី បានមានប្រសាសន៍ថា សិក្ខាសាលាលើកទី៣ នាឱកាសនេះបានផ្ដោតលើគម្រោងកសាងផែនការរៀបចំដែនដីខេត្តស្វាយរៀង ដែលក្នុងនេះក្រុមការងារទីប្រឹក្សា ADB បានធ្វើការបង្ហាញជូននូវលទ្ធផលនៃការវិភាគ SWOT សេចក្តីព្រាងចក្ខុវិស័យសម្រាប់ខេត្តស្វាយរៀង និងការស្នើ​ឡើងនៅយុទ្ធសាស្ត្រសម្រាប់ការអភិវឌ្ឍ និងការអភិរក្សខេត្តស្វាយរៀង ដើម្បីអង្គសិក្ខាសាលាពិនិត្យ​និងពិគ្រោះ​យោបល់និងផ្ដល់នូវធាតុចូលបំពេញបន្ថែម។

លោក ម៉េង ប៉ុណ្ណារិទ្ធ អគ្គនាយករង បានបញ្ជាក់ថា កន្លងមកយើងបានសម្រេចដាក់ឲ្យប្រើប្រាស់ជាផ្លូវការ​នៅប្លង់គោលប្រើប្រាស់​ដីក្រុមបាវិតដោយបានកំណត់ចក្ខុវិស័យដល់ឆ្នាំ ២០៣០ គឺសំដៅរៀបចំ និងអភិវឌ្ឍន៍​(ក្រុងបាវិតជាក្រុងឆ្លាតពាណិជ្ជកម្មឧស្សាហកម្មនិងទេសចរណ៍កម្រិតអន្តរជាតិ សេវាកម្មក្រុងសំបូរបែប​ប្រកប​ដោយបរិស្ថានរស់នៅល្អសុភមង្គលចីរភាព និងបរិយាយបន្ត) តាមរយៈការជំរុញទី១ គ្រប់គ្រងអភិរក្ស​អភិវឌ្ឍន៍ប្រើប្រាស់ដី និងនគរូបនីយកម្មប្រកបដោយប្រសិទ្ធភាព និងបរិយាយបន្ត។

នៅក្នុងឱកាសនោះដែរលោក  ហែម  ពិសិដ្ឋ  អភិបាលរងខេត្ត បានសម្តែងនូវការស្វាគមន៍ចំពោះវត្តមាន លោក ម៉េង ប៉ុណ្ណារិទ្ធ  អគ្គនាយករង នៃអគ្គនាយកដ្ឋានរៀបចំដែនដី ក្រុមការងារបច្ចេកទេសនៃធនាគារជាតិអភិវឌ្ឍន៍អាស៊ី ADB ដែលមានវត្តមានក្នុងសិក្ខាសាលាដ៏មានសារៈសំខាន់នេះ។

លោក ហែម ពិសិដ្ឋ បន្តថា ជំនួសមុខឱ្យលោកអភិបាលខេត្ត បានផ្តាំផ្ញើដល់សមាជិកគណៈកម្មាធិការរៀបចំដែនដី នគររូបនីយកម្មថ្នាក់ខេត្តសូមយកចិត្តទុកដាក់អនុវត្តនូវកិច្ចការមួយចំនួនដូចខាងក្រោម៖ 

១. យកចិត្តទុកដាក់ត្រួតពិនិត្យ តាមដាន និងជំរុញការអនុវត្តផែនការរៀបចំដីថ្នាក់ខេត្ត ឱ្យបានត្រឹមត្រូវតមាមស្តង់ដារ មានសោភណ្ឌភាព សណ្តាប់ធ្នាប់ និងរបៀបរៀបរយ។

២.មន្ទីរជំនាញ អាជ្ញាធរដែនដី ត្រូវសហការគ្នា ពិនិត្យជំរុញការរៀបចំផែនការប្រើប្រាស់ដី នៅតាមក្រុងស្រុក​​ផ្សេងៗទៀត​ឱ្យបានឆាប់ ពិសេសប្រភេទលំនៅដ្ឋាន ឫសំណង់ និងលក្ខណៈសេដ្ឋកិច្ចសង្គម ផលិតផលសក្កដា​នុពលរបស់​ក្រុងស្រុកនីមួយៗ។

៣.ផ្សព្វផ្សាយឱ្យបានទូលំទូលាយ អំពីស្ថានភាពប៉ូលភូមិសាស្ត្ររបស់ខេត្ត ដល់បណ្តាអ្នកវិនិយោគ ដើម្បីបង្ក​លក្ខណៈងាយស្រួល ក៏ដូចជាតម្រង់ទិសដៅផែនការអភិវឌ្ឍន៍ឱ្យចំទិសដៅ ប្រកបដោយចក្ខុវិស័យ និងយុទ្ធសាស្ត្រ៕

ដោយ:ភក្ដី