សម្ដេចតេជោ ហ៊ុន សែន បញ្ជាក់ថា ទោះឈប់ប្រើហ្វេសប៊ុក តែសម្ដេចនៅអាចទំនាក់ទំនងជាមួយពលរដ្ឋគ្រប់ពេល

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ចំពោះការសម្រេចឈប់ប្រើប្រាស់បណ្ដាញសង្គមហ្វេសប៊ុក ហើយដែលកំពុងធ្វើឲ្យក្រុមប្រឆាំងនៅក្រៅស្រុកសប្បាយចិត្ត។ តែយ៉ាងណាក៏ដោយ សម្ដេចតេជោ ហ៊ុន សែន បញ្ជាក់ដែរថា នៅតែអាចមានទំនាក់ទំនងជាមួយប្រជាពលរដ្ឋបានគ្រប់ពេលវេលា។

ការបញ្ជាក់របស់សម្ដេចតេជោ ហ៊ុន សែន បានធ្វើឡើងក្នុងពិធីជួបសំណេះសំណាលជាមួយកម្មករ-កម្មការិនី នៅខេត្តពោធិ៍សាត់ នៅព្រឹកថ្ងៃទី ៣០ ខែមិថុនា ឆ្នាំ ២០២៣នេះ។ សម្ដេចតេជោ ហ៊ុន សែន បានថ្លែងថា កាលពីយប់មិញ សម្ដេចបានសម្រេចលុបចោលទំព័រហ្វេសប៊ុករបស់សម្ដេច ដែលមានអ្នកចូលរួមចំនួន ១៤លាននាក់ ហើយដែលក្រុមប្រឆាំងនៅក្រៅស្រុក កំពុងសប្បាយចិត្តលើករណីនេះ។

សម្ដេចតេជោ ហ៊ុន សែន ថ្លែងបែបនេះថា «ម្យ៉ាងទៀតយប់មិញនេះ ពូបានសម្រេចលុបចោលហ្វេសប៊ុក ដែលមានមនុស្ស ១៤លាននាក់ៗ លុបចោលហ្វេសប៊ុក ហើយឃើញពួកប្រឆាំងនៅក្រៅប្រទេសនោះកំពុងសប្បាយ ក៏ប៉ុន្តែអ្នកត្រូវគិតណា បើខ្ញុំចេញបញ្ជាបិទហ្វេសប៊ុកនៅស្រុកខ្មែរ លោកឯងដាច់ផ្ញារ​ ខ្ញុំគ្រាន់តែប្រាប់លោកឯងទេ តែមិនមែនជាមធ្យោបាយ ហ៊ុន សែន ត្រូវប្រកាន់យកទេ តែលោកឯងកុំប្រមាថយុទ្ធសាស្រ្ដរបស់ ហ៊ុន សែន ឲ្យសោះ ហ៊ុន សែ បំផ្លាញចោល ១៤លាននាក់ ប៉ុន្តែ ហ៊ុន សែន មានទំនាក់ទំនងជាមួយនឹងប្រជាពលរដ្ឋអាចបានគ្រប់ពេល ទាំងប្រព័ន្ធតេលេក្រាម ហើយឥឡូវគឺលេងអា Tik Tok ទៀត»៕