ព័ត៌មានជាតិ

ប្រយ័ត្នច្រឡំផ្លូវ អ្នកជិះកាត់រង្វង់មូលចោមចៅ ជិះមើលៗផងបងប្អូនអ្នកបើកបរ

បានផុស

៤ years មុន

នៅ

ថ្ងៃអង្គារ ២៦ មករា ២០២១

ដោយ

ការដ្ឋានស្ពានអាកាស និងផ្លូវក្រោមដីរង្វង់មូលចោមចៅ បានបញ្ចប់គម្រោងផ្លូវមួយចំនួន គិតមកដល់ពេលនេះសម្រេចបានជាង ៥៥ ភាគរយ តាមផែនការគ្រោងបញ្ចប់នៅចុងឆ្នាំ ២០២១។

ទោះបីការដ្ឋានមិនទាន់បានបញ្ចប់ទាំងស្រុង តែដើម្បីរំដោះចរាចរណ៍កកស្ទះ រដ្ឋបាលរាជធានីភ្នំពេញបានបើកឲ្យចរាចរណ៍បណ្ដោះអាសន្នផ្លូវក្រោមដីចំនួន ០៣ ខ្សែ។ ខ្សែទីមួយបើកឲ្យចរាចរណ៍តាំងពីថ្ងៃ ២៦ ខែតុលា ២០២០ និង ពីរខ្សែទៀតទើបដាក់ឲ្យប្រើប្រាស់កាលពីពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវក្រោមដីទាំំង ០៣ ខ្សែ ដែលអាចឲ្យយានជំនិះបើកធ្វើចរាចរណ៍បណ្តោះអាសន្នមាន៖

ខ្សែទី១- ភ្ជាប់ចរាចរពីផ្លូវជាតិលេខ ៤ មកមហាវិថីសហព័ន្ធរុស្ស៊ីជាផ្លូវក្រោមដី មានប្រវែងសរុប ៤៨៨ម៉ែត្រ ទទឹង ៨,៥ ម៉ែត្រ សម្រាប់ចរាចរណ៍ឯកទិស ដែលមានចំនួន ២គន្លងរថយន្ត និង ១គន្លងទោចក្រយានយន្ត។

ខ្សែទី២- ភ្ជាប់ចរាចរឯកទិស ពីផ្លូវជាតិលេខ៤ ឆ្ពោះទៅមហាវិថីចោមចៅ មានប្រវែង ៤៥៨ម៉ែត្រ ទទឹង ៨.៥ម៉ែត្រ ជាផ្លូវក្រោមដីមានជម្រៅ ៣.៧ម៉ែត្រធៀបនឹងកម្ពស់នីវ៉ូមហាវិថី ចោមចៅ។

ខ្សែ៣- ផ្លូវតភ្ជាប់ចរាចរឯកទិស ពីផ្លូវជាតិលេខ៤ បត់ស្តាំឆ្ពោះទៅផ្លូវជាតិលេខ៣ មានប្រវែង ១១៦ម៉ែត្រ ទទឹង ៥.៥ម៉ែត្រ ជាផ្លូវក្រោមដីមានជម្រៅ ១.៨៦ម៉ែត្រ ធៀបនឹងកម្ពស់នីវ៉ូផ្លូវជាតិលេខ ៣។

ស្ពានអាកាស និងផ្លូវក្រោមដីរង្វង់មូលចោមចៅនេះ ត្រូវបានក្រុមហ៊ុន OCIC ដែលជាក្រុមហ៊ុនវិនិយោគទុនអាណិកជនកម្ពុជា ទទួលម៉ៅការសាងសង់ ហើយបានប្រើប្រាស់ថវិកាសាងសង់២២លានដុល្លារអាមេរិក ហើយគ្រោងបញ្ចប់នៅចុងឆ្នាំ២០២១៕