លោកស្រី ជា សិរី ជំរុញឲ្យពលរដ្ឋបញ្ជូនកូនទៅរៀនឲ្យបានគ្រប់ៗគ្នាយ៉ាងហោចណាស់រៀនចប់ត្រឹមកម្រិតអនុវិទ្យាល័យ

លោកស្រី បណ្ឌិត ជា សិរី សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាអនុប្រធានទី១ក្រុមការងារចុះមូលដ្ឋានស្រុកសន្ទុក ខេត្តកំពង់ធំ បានជំរុញឱ្យមាតា បិតា និងអាណាព្យាបាលក្នុងឃុំបឹងល្វាធ្វើយ៉ាងណាជំរុញកូនចៅឲ្យបានចូលរៀនគ្រប់គ្នាៗយ៉ាងហោចណាស់បានរៀនចប់ត្រឹមកម្រិតអនុវិទ្យាល័យដើម្បីរួមចំណែកលើក​កម្ពស់ជីវភាពគ្រួសារ និងចូលរួមអភិវឌ្ឍសង្គមជាតិឱ្យកាន់តែរីកចំរើនបន្ថែមទៀត។

ថ្លែងនៅក្នុងចុះសាកសួសុខទុក្ខ និងនាំយកអំណោយរបស់លោក ជា ចាន់តូ សមាជិកគណៈអចិន្ត្រៃយ៍ គណៈកម្មាធិការកណ្តាលគណបក្សប្រជាជនកម្ពុជានិងជាប្រធានក្រុមការងារគណបក្សចុះជួយខេត្តកំពង់ធំ និងលោកស្រីទៅចែកជូនប្រជាជនខ្វះខាត និងចាស់ជរារស់នៅឃុំបឹងល្វាស្រុកសន្ទុកកាលពីថ្ងៃទី២៩មិថុនា បានមាប្រសាសន៍ទៀតថា រាជរដ្ឋាភិបាលកម្ពុជាក្រោមការដឹកនាំរបស់សម្ដេចតេជោ​ ហ៊ុន សែន ប្រធានគណបក្សប្រជាជនកម្ពុជាជាមួយនឹងការនាំមកនូវសន្តិភាពជូនជាតិមាតុភូមិវិស័យអប់រំក៏បានលើកកម្ពស់និងយកចិត្តទុកដាក់ជាបន្តបន្ទាប់ក្នុងនោះសាលារៀនបានកសាងនៅគ្រប់តំបន់ទូទាំងប្រទេស។ ជាក់ស្ដែងដូចនៅតំបន់នេះក៏មានសាលារហូតដល់កម្រិតអនុវិទ្យាល័យដែលអាចឲ្យពួកគេបានចូលសិក្សាចប់កម្រិត​អនុវិទ្យាល័យបាន។

លោកស្រីបណ្ឌិត ជា សិរី បានបន្ថែមថា «បើប្រជាជនយើងម្នាក់ៗមានចំណេះវិជ្ជានិងចំណេះដឹងទូទៅបានច្រើននោះនឹងរួមចំណែកមួយផ្នែកធំក្នុងការលើកកម្ពស់ជីវភាពគ្រួសារនិងអាចចូលរួមដល់ការអភិវឌ្ឍសង្គមជាតិផងដែរ»។

ទោះជាយ៉ាងនេះក្ដីលោកស្រីបណ្ឌិតបានក្រើនរំលឹកថាដើម្បីសម្រេចបាននូវគោលដៅនេះយើងត្រូវរួមគ្នាថែរក្សាការពារស
ន្តិភាពឲ្យបានគង់វង្សហើយត្រូវទៅការបោះឆ្នោតជ្រើ​សតាំងតំណាងរាស្រ្តនីតិកាលទី៧ នៅថ្ងៃទី២៣ ខែកក្ដាដាឆ្នាំ២០២៣​ បានឲ្យបានគ្រប់ៗគ្នាដើម្បីគាំទ្រសម្តេចអគ្គមហាសេនាបតីតេជោ ហ៊ុន សែន ប្រធានគណបក្សឲ្យបន្តធ្វើជាយករដ្ឋមន្ត្រីនៃព្រះរាជាណាចក្រកម្ពុជាសម្រាប់អាណត្តិទី៧ដើម្បីបន្តដឹកនាំប្រទេសឲ្យទទួលបានការអភិវឌ្ឍថ្មីៗបន្ថែមទៀតក្រោមដំបូលសន្តិភាព។

នៅក្នុងឱកាសនោះលោកស្រីបណ្ឌិត ជា សិរី ក៏បាននាំយកថវិកានិងគ្រឿងឧបភោគបរិភោគជាអំណោយរបស់លោកបណ្ឌិត ជា ចាន់តូ និងលោកស្រី ខៀវ ស៊ីណា ជូនដល់គ្រួសារខ្វះខាត៥គ្រួសារនិងបានប្រគេនបច្ច័យនិងទ័យវត្ថុដល់ព្រះសង្ឃវត្តពោធិស្រះស្រង់ ហៅវត្តបឹងល្វាចាស់ផងដែរ។

គួរបញ្ជាក់ថា នៅរសៀលថ្ងៃដដែលលោកស្រីបណ្ឌិត ជា សិរី ក៏បានអញ្ជើញទៅប្រគល់ផ្ទះថ្មីមួយខ្នងរួមនឹងអំណោយមួយចំនួនទៀតជូនដល់គ្រួសារខ្វះខាតរស់នៅភូមិស្រែតាកោឃុំប្រាសាទដែលជាអំណោយមនុស្សធ៌មរបស់លោកបណ្ឌិត ជា ចាន់តូ និងលោកស្រី ខៀវ ស៊ីណា ផងដែរ៕

អត្ថបទ៖ សំអឿន