ព័ត៌មានជាតិ

កម្មវិធីទូរសព្ទដៃថ្មីក្រសួងសាធារណៈការ ស្នើសុំសេវារាំងស្ទះត្រង់ណា អាចឆែកដឹងភ្លាម

បានផុស

២ years មុន

នៅ

ថ្ងៃសុក្រ ៣០ មិថុនា ២០២៣

ដោយ

ក្រសួងសាធារណការនិងដឹកជញ្ជូន បានដាក់ឲ្យដំណើរការកម្មវិធីទូរសព្ទថ្មី MPWT Public Service Tracking ដែលអាចតាមដានរាល់ប្រតិបត្តិការប្រើប្រាស់សេវាសាធារណៈនៅក្រសួងសាធារណការនិងដឹកជញ្ជូន។

លោក ស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូនបានឲ្យដឹងថា ការប្រើប្រាស់កម្មវិធី MPWT Public Service Tracking ផ្តល់ភាពងាយស្រួលដល់អ្នកប្រើប្រាស់សេវាសាធារណៈ អាចតាមដានរាល់ប្រតិបត្តិការពីការស្នើសុំសេវាសាធារណៈ ប្រាប់អំពីស្ថានភាពការដំណើរការបន្តបន្ទាប់រហូតការផ្តល់សេវាត្រូវបានបញ្ចប់ទាំងស្រុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«តាម App នេះ យើងនឹងដឹងព័ត៌មានការស្នើសុំសេវាអ្វីមួយនៅក្រសួងសាធារណៈការ តើដល់ណាហើយ។ កន្លងទៅដាក់ចូលទៅស្ងាត់ជ្រាប មិនដឹងព័ត៌មានដល់ណា។ ឧទាហរណ៍យើងស្នើសុំកាត់ឈ្មោះយានយន្ត គេអោយវិក្កយបត្រយើងមិនដឹងព័ត៌មានអីទាំងអស់។ តាមរយៈកម្មវិធីនេះ យើងអាចដឹងឯកសាររបស់យើងចេញពីតុមួយទៅតុមួយធ្វើដល់ណាហើយ រហូតបញ្ចប់ទាំងស្រុង»។

លោករដ្ឋមន្រ្តីក៏ស្នើដល់ពលរដ្ឋដែលចង់ប្រើប្រាស់សេវាសាធារណៈមិនថាប្តូរបណ្ណបើកបរ ឬផ្ទេរកម្មសិទ្ធិ សូមមកទំនាក់ទំនងនៅមណ្ឌលផ្តល់សេវាសាធារណៈរបស់ក្រសួង កុំប្រើប្រាស់សេវាអ្នករត់ការដែលចាយថវិកាអស់ច្រើនហើយយឺតយ៉ាវថែមទៀត។

លោក ហ៊ាង សុទ្ធាយុត្តិ អគ្គនាយកនៃអគ្គនាយកដ្ឋានបច្ចេកវិទ្យានិងទំនាក់ទំនងសាធារណៈនៃក្រសួងសាធារណៈនិងដឹកជញ្ជូនបានឲ្យដឹងថា កម្មវិធី MPWT Public Service Tracking អ្នកប្រើប្រាស់អាចស្កេន QR Code ឬវាយបញ្ចូលលេខវិក្កយបត្រពីកម្មវិធីទូរសព្ទ អាចដឹងពីស្ថានភាពពាក្យស្នើសុំសេវាសាធារណៈនៅគ្រប់ដំណាក់កាលរហូតដល់ការផ្ដល់សេវាបានបញ្ចប់ទាំងស្រុង។

លោកបន្តថា កម្មវិធីនេះក៏ផ្តល់លទ្ធផលស្កេនវិក្កយបត្រដែលធ្លាប់បង់ប្រាក់កន្លងទៅ អាចមើលពីប្រវត្តិពាក្យស្នើសុំគិតចាប់ពីឆ្នាំ ២០១៦។ កម្មវិធីនេះក៏អាចឲ្យអ្នកប្រើប្រាស់អាចស្កេនផ្ទៀងផ្ទាត់ភាពត្រឹមត្រូវសុពលភាព ឯកសារ បណ្ណសម្គាល់ កាតគ្រី ផ្លាកលេខ វិញ្ញាបនបត្រទាំងឡាយដែលមាន QR Code ដែលបានចេញដោយក្រសួងសាធារណការនិងដឹកជញ្ចូនប្រមាណ ៦ លានមកហើយ។

កម្មវិធី MPWT Public Service Tracking អាចទាញពីក្នុង App Store និង Play Store សម្រាប់ប្រើប្រាស់នៅលើទូរសព្ទស្មាតហ្វូន និងថេបប្លេត។

កាលពីម្សិលមិញ ក្រៅពីប្រកាសដាក់ឲ្យប្រើប្រាស់កម្មវិធី MPWT Public Service Tracking ក្រសួងសាធារណៈការនិងដឹកញ្ជូន ក៏បានបើកសម្ពោធមណ្ឌលមណ្ឌលផ្តល់សេវាសាធារណៈនៅផ្សារទំនើបអេអ៊នម៉លសាខាមានជ័យ។ មណ្ឌលផ្តល់សេវាសាធារណៈថ្មីជាទីតាំងទី៧ ចាប់តាំងពីក្រសួងសាធារណការនិងដឹកជញ្ជូនបានសម្រេចបង្កើតឱ្យមានមណ្ឌលផ្តល់សេវាសាធារណៈនៅតាមផ្សារទំនើបនិងទីប្រជុំជននានា។

បើកដំណើរការចាប់ពីម៉ោង ៩ព្រឹក ដល់ ១០យប់ ៧ថ្ងៃ ក្នុងមួយសប្តាហ៍ មណ្ឌលនេះមានផ្ដល់សេវាដូចជា៖ (១)ប្ដូរ/ពន្យារបណ្ណបើកបរយានយន្ត (២)ដាក់ពាក្យត្រួតពិនិត្យលក្ខណៈបច្ចេកទេសយានជំនិះ ឬហៅថាឆៀក (៣) ចុះបញ្ជី និងផ្ទេរកម្មសិទ្ធិយានជំនិះ និង (៤)បំពាក់ឧបករណ៍ ETC លើយានយន្ត និង លតាបត្រអនុញ្ញាតទោចក្រយានយន្ត ៥០០cc ឬ ២៧kW ឡើងទៅធ្វើដំណើរលើផ្លូវល្បឿនលឿន។

រាល់ការផ្តល់សេវាសាធារណៈនៅក្នុងមណ្ឌលនេះ គឺសុទ្ធតែធ្វើឡើងតាមរយៈប្រព័ន្ធស្វ័យប្រវត្តិកម្ម ប្រព័ន្ធបច្ចេកវិទ្យាឌីជីថល ១០០% ដែលអនុញ្ញាឱ្យធ្វើការបង់ប្រាក់តាមប្រព័ន្ធទូទាត់ប្រាក់របស់គ្រឹះស្ថានធនាគារ និងហិរញ្ញវត្ថុដៃគូចំនួន ១២ ស្ថាប័ន ផ្តល់ភាពងាយស្រួលជូនដល់សាធារណៈជន ដែលមកប្រើប្រាស់សេវានៅទីនេះ និងស្របតាមយុគសម័យឌីជីថលូបនីយកម្ម៕