សម្ដេចនាយករដ្ឋមន្ត្រី៖ “យប់មិញអត់ឃើញមានដ្រូន​មកទៀត ដល់ដាក់កាំភ្លើងបង្ហាញកម្លាំងទ័ព”

សម្ដេចតេជោ ហ៊ុន សែន នាយករដ្ឋមន្ត្រីកម្ពុជាមានប្រសាសន៍ថា នៅយប់ថ្ងៃទី ២៩ ខែមិថុនា ឆ្នាំ ២០២៣ មិនឃើញមានវត្តមានយន្តហោះគ្មានមនុស្សបើក (Drone) ហោះចូលមកក្នុងទឹកដីកម្ពុជានោះទៀតនោះទេ បន្ទាប់ពីដាក់ពង្រាយកាំភ្លើងផ្គុំគ្រប់ធុន និងកងកម្លាំងកងទ័ពនៅតាមព្រំដែនខេត្តជាប់ប្រទេសវៀតណាម ក្នុងខេត្តរតនគិរី។

សម្ដេចតេជោ ហ៊ុន សែនមានប្រសាសន៍ថា៖ «យប់នេះអត់ឃើញមានដ្រូនមកទៀត មានអីដល់ដាក់កាំភ្លើងផ្គុំ រួចហើយប្រកាសមែនទែន បង្ហាញកម្លាំងទ័ព បង្ហាញកម្លាំងអាវុធ អានេះអត់ហ៊ានចូលមកដែរ ព្រោះអគ្គបញ្ជាការទ័ពឡើងទៅផ្ទាល់ នាយសេនាធិការចម្រុះផង មេបញ្ជាការជើងគោកស្ដីទីផង និងអគ្គបញ្ជាការរង ហើយក៏ជាមេបញ្ជាការកងអង្គរក្សឥឡូវទ័ពរាប់ពាន់នាក់ នៅឯហ្នុងបាញ់ទម្លាក់ពួកអាហ្នឹងម្ដងមើល កុំឱ្យវាប្រហើនហោះចូលដីខ្មែរ»។ សម្ដេចតេជោ ហ៊ុន សែន បញ្ជាក់ថា មិនថារបស់នរណាទេឱ្យតែហោះចូលដីខ្មែរគឺបាញ់ហើយ។

ក្រសួងការពារជាតិចាត់ទុកថា យន្តហោះគ្មានមនុស្សបើក (Drone) ដែលហោះចូលមកលើព្រំដែនប្រទេសកម្ពុជា ក្នុងខេត្តរតនគិរី គឺជាការរំលោភបំពានយ៉ាងគឃ្លើនមកលើអធិបតេយ្យភាពរបស់កម្ពុជា ដែលសកម្មភាពនេះ កងយុទ្ធពលខេមរភូមិន្ទត្រូវតែឆ្លើយតបយ៉ាងម៉ឺងម៉ាត់ ដោយមិនអត់ឱនឱ្យបានជាដាច់ខាត៕

អត្ថបទ៖ ឡេង ដេត