វិទ្យាស្ថានអភិបាលកិច្ចឌីជីថល បើកវគ្គបណ្តុះបណ្តាលជាលើកដំបូង ដល់ក្រុមអ្នកសារព័ត៌មានកម្ពុជា

វិទ្យាស្ថានអភិបាលកិច្ចឌីជីថល បានបើកវគ្គបណ្តុះបណ្តាលជាលើកដំបូងរបស់ខ្លួន ដល់ក្រុមអ្នកសារព័ត៌មាន ជាការបណ្តុះបណ្តាលថ្នាក់ក្រោមជាតិ ដោយមានកិច្ចសហការជាមួយ ក្រសួងប្រៃសណីយ៍ និងទូរគមនាគមន៍ និងក្លិបអ្នកកាសែតកម្ពុជា (ក.អ.ក) ស្តីពី «ការប្រើប្រាស់ប្រព័ន្ធទំនាក់ទំនងសង្គមប្រកបដោយប្រសិទ្ធភាព និងសុវត្ថិភាពសម្រាប់អ្នកសារព័ត៌មាន»។ វគ្គបណ្តុះបណ្តាលនេះ មានរយៈពេល ២ថ្ងៃ ពោលគឺថ្ងៃទី៣០ ខែមិថុនា និងថ្ងៃទី៥ ខែកក្កដា ឆ្នាំ២០២៣ នៅវិទ្យាស្ថានអភិបាលកិច្ចឌីជីថល ស្ថិតនៅសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។

ក្នុងពិធីបើកវគ្គបណ្តុះបណ្តាលនាព្រឹកថ្ងៃទី៣០ ខែមិថុនា ឆ្នាំ២០២៣នេះ គឺមានការចូលរួមពី លោក លីវ សុផាណារិទ្ធ រដ្ឋលេខា​ធិការ​ក្រសួង​ប្រៃសណីយ៍ និងទូរគមនាគមន៍ លោកបណ្ឌិត សេង សុភាព ប្រធានបណ្ឌិត្យ​សភា​បច្ចេកវិទ្យាឌីជីថល​កម្ពុជា និងលោក ពុយ គា ប្រធានក្លិបអ្នកកាសែតកម្ពុជា ព្រមទាំងអ្នកសារព័ត៌មានដែលជាសិក្ខាកាមចំនួន៣៤នាក់ មកពី២៦ ស្ថាប័ន។

វគ្គបណ្តុះបណ្តាលនេះ រៀបចំឡើងដើម្បីផ្តល់ឱកាសដល់អ្នកសារព័ត៌មាននូវចំណេះដឹងបន្ថែមអំពីការប្រើប្រាស់កម្មវិធីថត កាត់តវីដេអូតាមទូរស័ព្ទដៃ ការកែរូបភាព ដាក់ក្រេឌីតលើរូបភាពតាមរយៈទូរស័ព្ទដៃ និងការប្រើប្រាស់បណ្តាញទំនាក់ទំនង​សង្គម ( Messenger, Telegram, What’s App ) ជាដើម។ 

បើតាមលោក សេង សុភាព ប្រធានបណ្ឌិត្យសភាបច្ចេកវិទ្យាឌីជីថលកកម្ពុជា វិទ្យាស្ថានអភិបាលកិច្ចឌីជីថល បានបើកដំណើរការរយៈជាង ២ឆ្នាំហើយ ហើយមានសិស្សទទួលការបណ្តុះបណ្តាលប្រហែល ៧០០នាក់។ កន្លងមក វិទ្យាស្ថានឌីជីថលកម្ពុជា បានបណ្តុះបណ្តាលចំណេះដឹងទាក់ទងនឹងបច្ចេកវិទ្យា ដល់បុគ្គលិកក្រសួងមួយចំនួនផងដែរ។ លោកគូសបញ្ជាក់ថា វគ្គបណ្តុះបណ្តាលនេះ ក៏នឹងមានរៀបចំជាបន្តបន្ទាប់ទៀត៕