សម្តេច ម៉ែន សំអន៖ យុទ្ធនាការឃោសនាបោះឆ្នោតខេត្តស្វាយរៀងមានអ្នកចូលរួមជាង១ម៉ឺន៥ពាន់នាក់

សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា មានប្រសាសន៍ក្នុងកិច្ចសម្ភាសន៍ជាមួយ កម្ពុជាថ្មី ថា សមាជិករបស់គណបក្សប្រជាជនកម្ពុជា ដែលចូលរួមយុទ្ធនាការឃោសនាបោះឆ្នោតថ្ងៃទី១ ខែកក្កដា មានចំនួន ១៥០០០នាក់ មានការកើនឡើងជាងឆ្នាំមុនដែលជាឆ្នាំបោះឆ្នោតឃុំ សង្កាត់។

សម្តេចកិត្តិសង្គហបណ្ឌិត បានបញ្ជាក់ថា ក្នុងឱ្យការបើកយុទ្ធនាការឃោសនាបោះឆ្នោតថ្ងៃទី១ ខែកក្កដា ឆ្នាំ២០២៣នេះ គណបក្សប្រជាជន នឹងប្រារព្ធពិធីគម្រប់ខួបលើកទី៧២ នៃថ្ងៃកំណើតរបស់គណបក្ស នៅរាជធានីភ្នំពេញ ក្រោមអធិបតីភាពរបស់ សម្តេចតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា។ ចំណែក នៅខេត្តស្វាយរៀងវិញ សម្តេចកិត្តិសង្គហបណ្ឌិត ម៉ែន សំអន នឹងដឹកនាំយុទ្ធនាការឃោសនាបោះឆ្នោត នៅទីស្នាក់ការគណបក្សប្រជាជនខេត្តស្វាយរៀង។

ជុំវិញនឹងការដង្ហែក្បួនឃោសនាបោះឆ្នោតខាងមុខ សម្តេចកិត្តិសង្គហបណ្ឌិត ម៉ែន សំអន បានបញ្ជាក់ថា ពិធីនេះនឹងត្រូវហែក្បួនឃោសនាចេញពីទីស្នាក់ការគណបក្សខេត្ត ឆ្ពោះទៅក្រុងបាវិត និងត្រឡប់មកក្រុងស្វាយរៀងវិញ ដែលមានថ្នាក់ដឹកនាំ និងសមាជិកគណបក្សចំនួន ១៥០០០នាក់ បើធៀបនឹងអាណត្តិមុន គឺមានការកើនឡើងច្រើន ដោយឆ្នាំមុនក្បួនដង្ហែមានតែ១ម៉ឺននាក់ប៉ុណ្ណោះ។

ឆ្លៀតក្នុងឱកាសដឹកនាំការឃោសនាការបោះឆ្នោតនៅខេត្តស្វាយរៀង សម្តេចកិត្តិសង្គហបណ្ឌិត ម៉ែន សំអន នឹងលើកយកសមិទ្ធផលជាប្រវត្តិសាស្ត្រសំខាន់ៗចំនួន១០ចំណុច ទៅផ្សព្វផ្សាយដល់ប្រជាជនដែលជាម្ចាស់ឆ្នោតមានទំនុកចិត្ត និងបន្តការបោះឆ្នោតឱ្យគណបក្សប្រជាជនកម្ពុជា។

ជាមួយនឹងសមិទ្ធផលរបស់គណបក្សប្រជាជន និងជំនឿជឿជាក់ពីប្រជាជន  សម្តេចកិត្តិសង្គហបណ្ឌិត ម៉ែន សំអន ពិតជាមានមោទនភាព និងសង្ឃឹមថា ខេត្តស្វាយរៀងនឹងទទួលបានអាសនៈ ៥ លើ ៥ ស្មើនឹង១០០%។ សម្រាប់ទទួទាំងប្រទេស សម្តេចក៏សង្ឃឹមថានឹងទទួលបានច្រើនសន្ធឹកសន្ធាប់ផងដែរ។

គួរបញ្ជាក់ថា យុទ្ធនាការឃោសនានឹងធ្វើឡើងរយៈពេល២១ថ្ងៃ គឺចាប់ពីថ្ងៃទី១ ដល់ថ្ងៃទី២១ ខែកក្កដា ឆ្នាំ២០២៣។ បន្ទាប់ពីយុទ្ធនាការឃោសនាបោះឆ្នោតបានបញ្ចប់ ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ នឹងប្រព្រឹត្តទៅនៅទី២៣ ខែកក្កដា ឆ្នាំ២០២៣ខាងមុខនេះ៕