CDC បានអនុម័តគម្រោងវិនិយោគចំនួន ៣០មានទុនជាង ៤០០លានដុល្លារ ក្នុងខែមិថុនា

ក្រុមប្រឹក្សាអភិវឌ្ឍន៍កម្ពុជា ដែលហៅកាត់ថា(CDC) បានឱ្យដឹងថា នៅក្នុង មិថុនាឆ្នាំ២០២៣នេះ CDC បានអនុម័តគម្រោងវិនិយោគចំនួន ៣០គម្រោងដែលមានទុនវិនិយោគចំនួន៤០៧,៦លានដុល្លារអាមេរិក ដោយផ្តល់ឱកាសការងារជូនដល់ប្រជាពលរដ្ឋចំនួន៣៧៧៨១នាក់។

ចំនួនេះបើប្រៀបធៀបទៅនឹងខែឧសភាឆ្នាំ២០២៣កន្លងទៅ ឃើញថា មានការកើនឡើងគួរឱ្យគត់សម្គាល់ ខណៈខែឧសភាឆ្នាំ ២០២៣CDC បានអនុម័តគម្រោងវិនិយោគចំនួន១០ក្រុមហ៊ុនមានទុន​វិនិយោគចំនួន​៦០,១៤លានដុល្លារ ដោយផ្តល់ឱកាសការងារជូនប្រជាពលរដ្ឋចំនួន១៣៩៨៧កន្លែងប៉ុណ្ណោះ។

បើតាម CDC ក្នុងចំណោម គម្រោងវិនិយោគទាំង៣០គម្រោងក្នុងនោះ គម្រោងដែលបោះទុនវិនិយោគច្រើនជាងគេ គឺគម្រោងបង្កើតរោងចក្រផលិតសំបកកង់យានយន្ត របស់ក្រុមហ៊ុន“NEWBUSTAR (CAMBODIA) TIRE CO., LTD.” ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស យូ ប៊ី អ៊ី ស្នួល, ខេត្តក្រចេះ, ក្នុងទុនវិនិយោគ​ប្រមាណ ១៣៨លានដុល្លារអាម៉េរិក និងអាចបង្កើតការងារបានចំនួន ៩៧៥កន្លែង។បន្ទាប់មកគម្រោងបង្កើត​រោងចក្រផលិតស៊ីម៉ង់ត៍របស់ក្រុមហ៊ុន“DONGFANG JUNMA CEMENT CO., LTD”  ដែលមានទីតាំង​វិនិយោគស្ថិតនៅភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង ក្នុងទុនវិនិយោគប្រមាណ ៩៥លានដុល្លារអាម៉េរិក និងអាចបង្កើតការងារបានចំនួន ៩៧៩កន្លែង។

គម្រោងសាងសង់ផ្សារទំនើបរបស់ក្រុមហ៊ុន DRF-MART FA DAO JIA TRADING CO., LTD”  ដែលមានទីតាំងវិនិយោគស្ថិតនៅភូមិ ៤ សង្កាត់លេខ ៤ ក្រុងព្រះសីហនុ ខេត្តព្រះសីហនុ ក្នុងទុនវិនិយោគចំនួន ១៤លានដុល្លារអាម៉េរិក និងអាចបង្កើតការងារបានចំនួន ២២៧កន្លែងនិងគម្រោងបង្កើតរោងចក្រកែ​ច្នៃដំឡូងមីរបស់​ក្រុមហ៊ុន“TWPC INVESTMENT (CAMBODIA) CO., LTD” ដែលមានទីតាំងវិនិយោគស្ថិត​នៅភូមិអូរស្រម៉ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ ក្នុងទុនវិនិយោគប្រមាណ ១០,៤លានដុល្លារអាម៉េរិក និងអាចបង្កើត​ការងារបានចំនួន ៩៩កន្លែង។ក្រៅពីនេះគម្រោងផ្សេងៗទៀតបោះទុនវិនិយោគប្រមាណជាង៨​លាន​រហូតដល់១,៥លានដុល្លារអាមេរិក៕

អត្ថបទ ៖ សំអឿន