ឯកឧត្ដម ឌី វិជ្ជា និង លោកជំទាវ ហ៊ុន ម៉ាណា នាំ​យក​ថវិកា​៥លាន​រៀល ដល់គ្រួសារសពមន្ត្រីពន្ធនាគារ ខេត្តកំពង់ឆ្នាំង

បន្ទាប់ពីមានការចុះផ្សាយរបស់គេហទំព័រ រស្មីកម្ពុជា ឯកឧត្ដម ឧត្តមសេនីយ៍ឯក ឌី វិជ្ជា និង លោកជំទាវ ហ៊ុន ម៉ាណា កាលពីព្រឹកថ្ងៃទី២៥ ខែ​មករា ឆ្នាំ២០២១នេះ បានចាត់តំណាង ក្រុមការងារនាំយកថវិកាចំនួនប្រាំលានរៀល ជូនដល់គ្រួសារសពមន្ត្រី ពន្ធនាគារ ខេត្តកំពង់ឆ្នាំង ដើម្បីចូលរួមរំលែកទុក្ខ និងសម្រាប់ដោះស្រាយជីវភាព ដែលកំពុងតែជួបការលំបាក។

​លោក​វរសេនីយ៍ទោ ពេជ្រ សុខ អាយុ៦២ឆ្នាំ ជាមន្ត្រីពន្ធនាគារ ខេត្តកំពង់ឆ្នាំង បានចូលនិវត្តន៍ ពីរបីឆ្នាំហើយ និងបានទទួលមរណភាព កាលពីថ្ងៃទី៦ ខែតុលា ឆ្នាំ២០២០ កន្លងមកនេះ។ លោកមានកូនចំនួនប្រាំមួយនាក់ កូនបីនាក់មានគ្រួសារ នៅសល់កូនបីនាក់ទៀតក្នុងបន្ទុក ។ ក្នុងនោះ មានកូនប្រុសម្នាក់អាយុ៣២ឆ្នាំ គឺជាមនុស្សដែលមានសតិមិនប្រក្រតី និងបានបង្ក ការលំបាកយ៉ាងច្រើនដល់គ្រួសារ។​

អ្នកស្រី វង្ស វណ្ណារី រស់នៅក្នុងភូមិដំណាក់ពពូ សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ដែលជាភរិយាសពបានថ្លែងអំណរគុណយ៉ាងជ្រាលជ្រៅ ចំពោះឯកឧត្ដម ឧត្ដមសេនីយ៍ឯក ឌី វិជ្ជា និង លោកជំទាវ ហ៊ុន ម៉ាណា ដែលបានចាត់តំណាងក្រុមការងារ យកថវិកាចំនួនប្រាំលាន រៀល ជួយឧបត្ថម្ភដល់គ្រួសារអ្នកស្រី ដែលកំពុងតែជួបការលំបាក ក្នុងជីវភាពរស់នៅប្រចាំថ្ងៃ អ្នកស្រី នឹង យក​ថវិកា​នេះ​ទៅដោះស្រាយការលំបាកនានាមួយចំនួន៕​