៦ខែឆ្នាំនេះ CDC អនុម័តគម្រោងវិនិយោគ ៨៤ មានទុនជិត ១ពាន់លានដុល្លារ

នៅក្នុងរយៈពេល៦ខែឆ្នាំ២០២៣នេះ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោង​វិនិយោគចំនួន​៨៤គម្រោងមានទុនចំនួន ៩៤៦,៩៤លានដុល្លារអាមេរិក ដោយបង្កើតឱកាសការងារជូនប្រជាពលរដ្ឋបានចំនួន ១១៦០៧៣កន្លែង។

ចំនួននេះបើប្រៀបធៀបទៅនឹងរយៈពេល ៦ខែដូចគ្នាឆ្នាំ២០២២កន្លងទៅ មានការថយចុះ ៣គម្រោង ពោលគឺ ៦ខែឆ្នាំមុន ចំនួន៨៧ក្រុមហ៊ុន ដែលមានទុនវិនិយោគជាង២៧២៣លានដុល្លារអាមេរិក និងបង្កើតឱកាសការងារ​ជូនប្រជាពលរដ្ឋចំនួន៥៦២២៩កន្លែង។

បើតាមក្រុមប្រឹក្សាអភិវឌ្ឍន៍កម្ពុជាក្នុងចំណោម៨៤ក្រុមហ៊ុន ដែលមានទុនវិនិយោគជិត១០០០លានដុល្លារអាមេរិក ក្នុងនោះ ខែមករាឆ្នាំ២០២៣ មានគម្រោងវិនិយោគចំនួន១០មានទុនចំនួន៩៩,៤លានដុល្លារអាមេរិក​ បង្កើតការការជូន​ប្រជាពលរដ្ឋចំនួន១៧១២៩កន្លែង។

ខែកម្ភៈមានគម្រោងវិនិយោគចំនួន១៧ក្រុមហ៊ុនមានទុនវិនិយោគចំនួន៩៨,៨លានដុល្លារអាមេរិកដោយផ្តល់ឱកាសការងារជូនដល់ប្រជាពលរដ្ឋចំនួន២២៧៨៤កន្លែង។

ខែមីនាមានគម្រោងវិនិយោគចំនួន៧ដែលមានទុនវិនិយោគចំនួន៣៣,៧លានដុល្លារអាមេរិកដោយផ្តល់ឱកាសការងារជូនប្រជាពលរដ្ឋចំនួន៦៦៦៩កន្លែង។ខែមេសាមានគម្រោងវិនិយោគចំនួន ២០ក្រុមហ៊ុនមានទុនវិនិយោគចំនួន ២៤៧,៧​លានដុល្លារអាមេរិក ផ្តល់ឱកាសការងារជូនដល់ប្រជាពលរដ្ឋចំនួន ១៧៧២៣កន្លែង។ ខែឧសភាមានគម្រោង​វិនិយោគ​ចំនួន១០ក្រុមហ៊ុនមានទុនវិនិយោគចំនួន៦០,១៤លានដុល្លារដោយផ្តល់ឱកាសការងារជូនប្រជាពលរដ្ឋចំនួន១៣៩៨៧កន្លែងនិងខែមិថុនាមានគម្រោងវិនិយោគចំនួន៣០ មានទុនវិនិយោគចំនួន៤០៧,៦លានដុល្លារអាមេរិក ដោយផ្តល់​ឱកាសការ​ងារជូនដល់ប្រជាពលរដ្ឋចំនួន៣៧៧៨១នាក់។

បើតាមCDC ក្នុងចំណោមគម្រោងចំនួន ៨៤មានទុនជិត ១០០០លានដុល្លារគម្រោងដែលបោះទុនច្រើនជាងគេ គឺគម្រោងបង្កើតរោងចក្រផលិតសំបកកង់យានយន្តនៅក្នុងតំបន់សេដ្ឋកិច្ចពិសេស យូ ប៊ី អ៊ី ស្នួល,ខេត្តក្រចេះ​ដែលមានទុនប្រមាណ ១៣៨លានដុល្លារ។បន្ទាប់មកគម្រោងបង្កើតរោងចក្រផលិតស៊ីម៉ង់ត៍នៅស្រុករតនមណ្ឌល ខេត្តបាត់ដំបងក្នុងទុនវិនិយោគប្រមាណ ៩៥លានដុល្លារ ។គម្រោងបង្កើតកសិដ្ឋានចិញ្ចឹមគោពូជនិងគោសាច់ខ្នាតធំនៅស្រុកស្នួល ខេត្តក្រចេះក្នុងទុនវិនិយោគប្រមាណ ៧៣,៤លានដុល្លារ។គម្រោងវិនិយោគអភិវឌ្ឍន៍រមណីយដ្ឋានទេសចរណ៍លើកោះទទឹង​និងសកម្មភាព​ពាក់ព័ន្ធផ្សេងៗទៀត នៅភូមិកោះស្តេចឃុំកោះស្តេច ស្រុកគិរីសាគរ ខេត្តកោះកុង ក្នុងទុនវិនិយោគ​ប្រមាណ​៣០លានដុល្លារអាមេរិក។គម្រោងបង្កើតរោងចក្រកែច្នៃផ្លែស្វាយនៅខេត្តកំពង់ស្ពឺ ក្នុងទុនវិនិយោគ​ប្រមាណ​២៦លានដុល្លារអាមេរិក។ គម្រោងបង្កើតរោងចក្រផលិត និងផ្គុំដំឡើងបន្ទះសូឡានៅស្រុក​អង្គស្នួល​ខេត្តកណ្តាល ក្នុងទុនវិនិយោគប្រមាណ ១៥,៦លាន។គម្រោងសាងសង់ផ្សារទំនើបនៅក្រុងព្រះសីហនុ ខេត្តព្រះសីហនុ ក្នុងទុនវិនិយោគចំនួន ១៤លានដុល្លារ៕

អត្ថបទ ៖ សំអឿន