កម្ពុជា ប្រកាសហាមសមាជិកក្រុមប្រឹក្សាភិបាលក្រុមហ៊ុន META ២២នាក់ ចូលកម្ពុជា

កម្ពុជាបានប្រកាសហាមសមាជិកក្រុមប្រឹក្សាភិបាលក្រុមហ៊ុន META ២២នាក់ ចូលកម្ពុជា ដើម្បីទប់ស្កាត់ការជ្រៀតចូលកិច្ចការផ្ទៃក្នុងរបស់កម្ពុជា។

សេចក្ដីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិចេញផ្សាយនៅថ្ងៃទី ៤ ខែកក្កដា ឆ្នាំ ២០២៣ នេះថា អនុសាសន៍របស់ក្រុមប្រឹក្សាភិបាលក្រុមហ៊ុន META ឱ្យផ្អាកជាបណ្ដោះអាសន្នចំពោះគណនីហ្វេសប៊ុកផ្លូវការរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជាមានលក្ខណៈនយោបាយ។

ក្រសួងការបរទេសកម្ពុជាអះអាងថា អនុសាសន៍នេះ មានចេតនារារាំងសេរីភាពសារព័ត៌មានរបស់ប្រជាពលរដ្ឋកម្ពុជា និងសិទ្ធរបស់ប្រជាពលរដ្ឋក្នុងការទទួលបានព័ត៌មានពិតពីថ្នាក់ដឹកនាំដែលពួកគេគាំទ្រ និងពេញចិត្ត។

រាជរដ្ឋាភិបាលកម្ពុជាសម្រេចហាមឃាត់សមាជិកក្រុមប្រឹក្សាភិបាលក្រុមហ៊ុន META ២២នាក់ មិនឱ្យមានវត្តមាននៅកម្ពុជាដោយពួកគេត្រូវចាកចេញក្នុងទឹកដីកម្ពុជាក្នុងរយៈពេល ៤៨ ម៉ោង បន្ទាប់ពីការប្រកាសនៅរសៀលម៉ោង ៤ ថ្ងៃទី ៤ ខែកក្កដា ឆ្នាំ ២០២៣នេះ៕