ព័ត៌មានជាតិ

ទឹកធ្លាក់ ឆាយកី ដែលអ្នកទេសចរ មិនគួររំលង

បានផុស

២ years មុន

នៅ

ថ្ងៃអង្គារ ៤ កក្កដា ២០២៣

ដោយ

កោះកុង ៖ «ឆាយកី» ជារមណីយដ្ឋានធម្មជាតិមួយដែលមានភ្ញៀវទេសចរណ៍តិចតួចណាស់បានស្គាល់ពីទីកន្លែងនេះ។ ប៉ុន្តែបានទៅស្គាល់ហើយច្បាស់ជាដកចិត្តមិនវិញមកផ្ទះវិញនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មែនទែនទៅ មិនថាភ្ញៀវជាតិ ឬ ភ្ញៀវអន្តរជាតិនោះទេ ក៏មិនសូវស្គាល់ពីទីកន្លែងធម្មជាតិមួយនេះដែរ គ្រាទីតាំងរមណីយដ្ឋានដ៏ស្រស់ត្រកាលនេះលាក់ខ្លួនពួនសំងំនៅក្នុងកណ្តាលព្រៃភ្នំពីទីប្រជុំជន។

តាមរៀបរាប់របស់មន្ត្រីនៃមន្ទីរទេសចរណ៍ខេត្តកោះកុង បានឱ្យដឹងនៅថ្ងៃ៤ខែមិថុនា ឆ្នាំ២០២៣នេះថា ទឹកធ្លាក់កី ស្ថិតនៅក្នុងព្រៃជ្រៅ ភាគច្រើនក្រុមអ្នកចូលចិត្តដំណើរកម្សាន្តបែបផ្សងព្រេងទើបអាចទៅដល់ទីនោះ។ មុននឹងទៅដល់ទីនោះត្រូវចំណាយពេលវេលាយូរ អាចថាត្រូវបោះតង់សម្រាកពេលយប់ក៏មាន។

មន្ត្រីមន្ទីរទេសចរណ៍ខេត្តដដែល បន្ថែមថា ស្ថានភាពផ្លូវធ្វើដំណើរ ភ្ញៀវទេសចរអាចធ្វើដំណើរដោយជិះម៉ូតូ កង់ គោយន្ដ ឬរថយន្ដបែប Off-road។ មិនមែនធ្វើឡើងតាមរថយន្ត ឬជិះម៉ូតូធម្មតាបានទេ។

នៅតាមដងផ្លូវអ្នកទេសចរគយគន់បាននូវព្រៃឈើដ៏ខៀវស្រងាត់ នារដូវវស្សា និង អាចទស្សនាចំការដំណាំ ហូប ផ្លែ វាលស្រែចំការ នៅតាមដងផ្លូវ ពេលទៅដល់ទីនោះយើងនឹងឃើញទឹកធ្លាក់ដ៏ស្រស់ស្អាតបង្អួតសម្រស់នៅក្នុងជ្រលងភ្នំនៃ ជួរភ្នំក្រវាញខាងត្បូង។

និយាយពីទឹកត្រជាក់វិញ ត្រជាក់ដូចទឹកកក ព្រមទាំងមានដើមឈើជុំវិញដ៏ខៀវស្រងាត់ សំឡេងសត្វបក្សាបក្សីយំឮអឺងកងពេញព្រៃ ខ្យល់អាកាសត្រជាក់ជាប់ចិត្តដិតអារម្មណ៍។ អ្នកដែលបានទៅដល់ទីនោះហើយគឺច្បាស់ជាមិនចង់ត្រលប់មកផ្ទះវិញឡើយ។

ទីតាំង «ឆាយកី» ស្ថិតនៅក្នុងឃុំដងពែង ស្រុកស្រែអំបិល ខេត្តកោះកុង។ បើអស់លោកអ្នកមានពេលទំនេរពីការងារ និងចាប់អារម្មណ៍ពីដំណើរកម្សាន្តបែបផ្សងព្រេង តោះ!អាចសាកល្បងទៅទស្សនា ដើម្បីឱ្យស្គាល់ពីសម្រស់ធម្មជាតិពិតៗដែលប្រទេសកម្ពុជាកំពុងមាន។

សូមជម្រាបថា លោកអ្នកអាចធ្វើដំណើរពីភ្នំពេញ ឆ្ពោះទៅកាន់ស្រុកស្រែអំបិល ខេត្តកោះកុង ហួសស្ពានស្រែអំបិល បន្តិច ប្រហែលជាង៥០ម៉ែត្រ មានផ្លូវក្រាលគ្រួសក្រហម បត់ស្ដាំ ពីស្ពានស្រែអំបិលទៅកាន់ ឆាយកី មានចម្ងាយប្រមាណ ២១៤ គីឡូម៉ែត្រពីរាជធានីភ្នំពេញ ចម្ងាយប្រមាណ ៧២គីឡូម៉ែត្រ ពីស្ពានស្រែអំបិលខេត្តកោះកុង និងចម្ងាយប្រមាណ ជាង ២២គីឡូមែត្រ ពីសហគមន៍អេកូទេសចរណ៍ ឆាយរាប។ ឆាយរាប មិនមែនជាឈ្មោះភូមិ ឃុំ ឬស្រុកឡើយ ជាឈ្មោះ សម្ងាត់ ហៅតៗគ្នា ក្នុងកំឡុងពេលសង្គ្រាម នៃរបប ប្រល័យពូជសាស្ត្រ ខ្មែរក្រហម មកម្ល៉េះ៕

ប្រភពរូប ៖ ក្រសួងទេសចរណ៍

អត្ថបទ ៖ សិរីវឌ្ឍនៈ