ACCB ជោគជ័យក្នុងការបង្កាត់ពូជអណ្តើកព្រេចជាង ១០០ក្បាល

មជ្ឈមណ្ឌលអង្គរសម្រាប់ការអភិរក្សជីវចម្រុះ (ACCB) ទទួលបានជោគជ័យក្នុងការបង្កាត់ពូជអណ្តើកព្រេច ជាប្រភេទសត្វជិតផុតពូជបំផុត នៅក្នុងមជ្ឈមណ្ឌលអភិរក្សសត្វព្រៃដែលមានចំនួនសរុបច្រើនជាង១០០ក្បាល។

ជាច្រើនឆ្នាំកន្លងមកនេះ ក្រោមកម្មវិធីរក្សាស្តុកទុកចំនួនរបាយប្រជាសាស្រ្តប្រភេទសត្វកម្រ ដើម្បីការពារកុំឱ្យផុតពូជ ACCB បានរក្សាទុកចំនួនអណ្តើកព្រេចក្រៅជម្រកធម្មជាតិច្រើនជាងគេបំផុតនៅលើពិភពលោក។ បើតាម ACCB អណ្តើកព្រេចចំនួន ១០០ ក្បាលបានបង្កាត់ពូជ ថែទាំរក្សាទុកនៅកន្លែងថែទាំសត្វ បានធំធាត់ដល់ទំហំសមល្មមត្រូវបានលែងនៅតំបន់ការពារដែលមានសុវត្ថិភាពនៅក្នុងប្រទេសកម្ពុជា ដើម្បីជាការចូលរួមចំណែកដល់ការស្ដារចំនួនរបាយប្រជាសាស្រ្តនៃចំនួនសត្វអណ្តើកព្រេចព្រៃដែលបានបាត់បង់ទៅ។​

មុនពេលបញ្ជូនទៅកាន់ទ្រុងរក្សាទុកសត្វផ្សាំនឹងលក្ខខណ្ឌអាកាសធាតុថ្មីដែលមានទីតាំងនៅកន្លែងលែងសត្វ អណ្តើកព្រេចទាំងនេះ បានទទួលការពិនិត្យសុខភាព រួមមាន ការពិនិត្យរាងកាយ ក៏ដូចជាការពិនិត្យមើលមេរោគ ដើម្បីពិនិត្យយ៉ាងល្អិតល្អន់រកមើលបាក់តេរី និងមេរោគអណ្ដើក ដែលអាចបណ្ដាលឱ្យកើតជំងឺផ្សេងៗ ក្នុងចំណោមអណ្ដើកទាំងអស់ដែលត្រូវលែង។

ក្នុងរយៈពេលប៉ុន្មានឆ្នាំទៅមុខទៀត ក្រុមការងារអភិរក្សសត្វព្រៃ នឹងតាមដានយ៉ាងល្អិតល្អន់ចំពោះសត្វអណ្តើកទាំងនេះ ថា អាចសម្របខ្លួនទៅនឹងបរិស្ថានធម្មជាតិរបស់ពួកវាបានដល់កម្រិតណា៕