គណបក្ស៣ ដាក់ចេញចំនួនគោលនយោបាយរបស់ខ្លួនតាមលំដាប់លេខរៀងនៅលើសន្លឹកឆ្នោត

គណបក្សនយោបាយចំនួន៣ ដាក់ចេញគោលនយោបាយជាអាទិភាពតាមលំដាប់លេខរៀងរបស់គណបក្សរៀងៗខ្លួន ក្នុងការស្វែងរកសំឡេងគាំទ្រពីប្រជាពលរដ្ឋសម្រាប់ការបោះឆ្នោតជ្រើសតាំងតំណាងរាស្ត្រ អាណត្តិទី៧ ឆ្នាំ២០២៣។

ការបោះឆ្នោតជាតិ នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ មានគណបក្សនយោបាយចំនួន១៨ បានចុះឈ្មោះក្នុងបញ្ជីគណបក្ស និងបញ្ជីបេក្ខជនឈរឈ្មោះចូលរួមប្រកួតប្រជែង ដើម្បីដណ្ដើមអាសនៈនៅក្នុងរដ្ឋសភា។ ដើម្បីឈានឆ្ពោះទៅទទួលបានភាពជោគជ័យ គណបក្សទាំងនេះ បានដាក់ចេញនូវគោលនយោបាយសំខាន់ៗជាច្រើន ដើម្បីទាក់ទាញការគាំទ្រពីប្រជាពលរដ្ឋជាម្ចាស់ឆ្នោត។  

ប៉ុន្តែ តាមការសង្កេត គណបក្សចំនួន៣ គឺគណបក្សហ្វ៊ុនស៊ិនប៉ិច បានដាក់ចេញគោលនយោបាយសំខាន់ៗចំនួន៩ ដែលស្របតាមលំដាប់លេខរៀងរបស់គណបក្សនេះនៅលើសន្លឹកឆ្នោត គឺលេខរៀងទី៩។ គោលនយោបាយទាំង៩ របស់គណបក្សហ្វ៊ុនស៊ិនប៉ិច សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧នេះ ផ្ដោតលើ ការការពារព្រះរាជបល្ល័ង្ក សិទ្ធិសេរីភាពបញ្ចេញមតិ កែទម្រង់ប្រព័ន្ធតុលាការ ផ្ដល់ប្រាក់ខែកម្មករខ្ពស់ គោលនយោបាយផ្ដោតលើវិស័យកសិកម្ម វិស័យអប់រំ ប្រជាជនពិនិត្យព្យាបាលជំងឺឥតបង់ប្រាក់ ការពារទ្រព្យសម្បត្តិសាធារណៈ និង គោលនយោបាយបង្កើតមជ្ឈមណ្ឌលថែទាំសុខភាពចាស់ជរា និងផ្តល់ប្រាក់ឧបត្ថម្ភមនុស្សចាស់។

ជាមួយគ្នានេះ គណបក្សប្រជាធិបតេយ្យមូលដ្ឋានរបស់លោក យ៉េង វីរៈ ដែលមានលំដាប់លេខរៀងទី១១ នៅលើសន្លឹកឆ្នោត ក៏បានជ្រើសរើសគោលនយោបាយជាអាទិភាពចំនួន១១ចំណុច ស្របតាមលេខរៀងបក្សដែរ។ គោលនយោបាយ ១១ចំណុច ផ្ដោតជាអាទិ៍ ការកំណត់អាណត្តិនាយករដ្ឋមន្ត្រី បញ្ឈប់ការរើសអើងនយោបាយ ការពារសិទ្ធិពលរដ្ឋ វិស័យអប់រំ សុខាភិបាល កសិកម្ម ការងារ គោលនយោបាយហិរញ្ញវត្ថុ ក៏ដូចជាគោលនយោបាយផ្តល់ប្រាក់ឧបត្ថម្ភជូនចាស់ៗអាយុ៦៥ឆ្នាំឡើង ជាដើម។

សម្រាប់គណបក្សខ្មែរអភិវឌ្ឍន៍សេដ្ឋកិច្ច មានគោលនយោបាយចំនួន១៣ ស្របតាមលេខរៀងរបស់បក្សផងដែរ។ គោលនយោបាយរបស់គណបក្សខ្មែរអភិវឌ្ឍន៍សេដ្ឋកិច្ច សម្រាប់ការបោះឆ្នោតជាតិ ឆ្នាំ២០២៣នេះ ផ្ដោតជាសំខាន់ទៅលើការអភិវឌ្ឍធនធានមនុស្ស អភិវឌ្ឍន៍កសិកម្ម កសិឧស្សាហកម្ម អភិវឌ្ឍន៍វិស័យទេសចរណ៍ អភិវឌ្ឍន៍សេដ្ឋកិច្ចជាតិ និងការកែណែទម្រង់ប្រព័ន្ធយុត្តិធម៌សង្គម៕

ដោយ៖ ធឿន វ៉ាន់សុង