អ្នកនាំពាក្យ គ.ជ.ប ប្រាប់អ្នកបោះឆ្នោតត្រូវគូសសញ្ញាគាំទ្រគណបក្សដែលខ្លួនពេញចិត្ត ឲ្យបានត្រឹមត្រូវ

មន្ត្រីនាំពាក្យ គ.ជ.ប បានលើកឡើងថា ប្រជាពលរដ្ឋត្រូវយល់ដឹង ចំពោះការគូសសញ្ញាគាំទ្រគណបក្សនយោបាយដែលខ្លួនពេញចិត្ត លើសន្លឹកឆ្នោតឲ្យបានត្រឹមត្រូវ ជៀសវាងការគូសចូលប្រអប់គណបក្សនយោបាយដទៃ ដែលនាំឲ្យក្លាយជាសន្លឹកឆ្នោតមិនបានការ។

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប មានប្រសាសន៍ប្រាប់កម្ពុជាថ្មីថា អ្នកបោះឆ្នោតត្រូវមានការប្រុងប្រយ័ត្ន ចំពោះការគូសសញ្ញាគាំទ្រគណបក្សនយោបាយដែលខ្លួនពេញចិត្ត ពោលគឺត្រូវគូសនៅក្នុងប្រអប់រាងបួនជ្រុងទ្រវែង នៃគណបក្សនយោបាយដែលខ្លួនពេញចិត្ត ដោយមិនត្រូវឲ្យចូលប្រអប់ នៃគណបក្សនយោបាយដទៃឡើយ។

លោក សោម សូរីដា បានឲ្យដឹងបែបនេះថា «បងប្អូនប្រជាពលរដ្ឋ ត្រូវយល់ដឹងថា ការគូសសញ្ញាគាំទ្រគណបក្សនយោបាយនៅលើសន្លឹកឆ្នោតនេះ ត្រូវគូសនៅក្នុងប្រអប់រាងបួនជ្រុងទ្រវែង នៃគណបក្សនយោបាយដែលខ្លួនពេញចិត្ត ដូច្នេះការគូសនេះមិនអាចចេញផុតពីរង្វង់បួនជ្រុងទ្រវែង នៃគណបក្សនយោបាយដែលខ្លួនពេញចិត្តទេ»។

អ្នកនាំពាក្យ គ.ជ.ប បានបញ្ជាក់ថា ប្រសិនបើការគូសលើសន្លឹកឆ្នោត ចូលដល់ប្រអប់របស់គណបក្សនយោ​បា​យដទៃទៀតនោះ នឹងក្លាយជាសន្លឹកឆ្នោតមិនបានការ។ លោកបញ្ជាក់បែបនេះថា «បើសិនការគូសនេះ វាវាស ឬក៏ស្នាមគំនូសនេះ ប៉ះទៅគណបក្សផ្សេងទៀតនោះ សន្លឹកឆ្នោតនោះនឹងត្រូវបានចាត់ទុកថា ជាសន្លឹកឆ្នោតមិនបានការហើយ ចឹងកន្លែងនេះត្រូវប្រយ័ត្នឲ្យមែនទែន ក្នុងការគូស»។

មន្ត្រីជាន់ខ្ពស់ គ.ជ.ប រូបនេះ ក៏បានបន្ថែមថា ការគូសលើសន្លឹកឆ្នោតនេះទៀតសោត មិនត្រូវជាគំនូសដែលគេអាចសម្គាល់អត្តសញ្ញាណរបស់អ្នកបោះឆ្នោតនោះឡើយ ពីព្រោះការបោះឆ្នោតជាការសំងាត់។ ដូច្នេះគំនូសដែលធ្វើឲ្យអ្នកដទៃស្គាល់អត្តសញ្ញាណអ្នកបោះឆ្នោត នឹងក្លាយទៅជាសន្លឹកឆ្នោតមិនបានការ ដែលបញ្ហានេះត្រូវមានការប្រុងប្រយ័ត្ន។ បើតាមលោក សោម សូរីដា គ.ជ.ប លើកទឹកចិត្តឲ្យអ្នកបោះឆ្នោត គូសសញ្ញាធីកលើសន្លឹកឆ្នោត៕