សម្ដេចតេជោ ហ៊ុន សែន ស្នើឲ្យលុបចោលទាំងអស់នូវគណនី Tik Tok ក្លែងក្លាយដែលប្រើឈ្មោះសម្ដេច

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើឲ្យអ្នកបង្កើតគណនី Tik Tok ដែលប្រើប្រាស់ឈ្មោះសម្ដេច ត្រូវលុបចោលទាំងអស់ ព្រោះបច្ចុប្បន្ននេះមានការបង្កើតគណនី Tik Tok ក្លែងក្លាយច្រើន ដែលយកឈ្មោះសម្ដេចទៅប្រើ។

តាមរយៈសារជាសំឡេង នៅព្រឹកថ្ងៃទី ៧ ខែកក្កដា ឆ្នាំ ២០២៣នេះ សម្ដេចតេជោ ហ៊ុន សែន បានផ្ញើជូនទៅកាន់អ្នកដែលបានបង្កើតគណនី Tik Tok ដោយយកឈ្មោះរបស់សម្ដេចទៅបង្កើត។ សម្ដេច ជឿថា អ្នកដែលបង្កើតទាំងនោះ មិនមានបំណងអាក្រក់ចំពោះសម្ដេចឡើយ។ ប៉ុន្តែការធ្វើបែបនេះ នឹងធ្វើឲ្យមានការប៉ះពាល់ ប្រសិនបើមានការធ្វេសប្រហែស ព្រោះមានការបង្កើតរហូតដល់រាប់សិបគណនី Tik Tok ក្លែងក្លាយ។

សម្ដេចតេជោ ហ៊ុន សែន បានស្នើឲ្យអ្នកបង្កើតគណនី Tik Tok ដែលប្រើប្រាស់ឈ្មោះរបស់សម្ដេច សូមលុបចោលទាំងអស់ ហើយប្រសិនបើមិនអនុវត្តទេ នឹងត្រូវអនុវត្តនូវវិធានការចាំបាច់នានា នាពេលបន្ទាប់ទៀត។

សម្ដេចតេជោ ហ៊ុន សែន មានប្រសាសន៍បែបនេះថា «ខាងលើនេះ ជាប្រភេទគណនី Tik Tok ក្លែងក្លាយ ដែលយកឈ្មោះសម្ដេចទៅប្រើ ខ្ញុំសុំស្នើឲ្យមានការលុបចោលទាំងស្រុង នូវគណនីដែលយកឈ្មោះខ្ញុំទៅប្រើនេះ ដែលវានឹងបង្កើតឲ្យការភ័ន្តច្រឡំ ដូច្នេះសូមឲ្យជំនួយការរបស់ខ្ញុំធ្វើការបន្ទាន់ ជាមួយនឹងក្រុមហ៊ុន Tik Tok ក៏ដូចជាបងប្អូនដែលទទួលបានសារសំឡេងរបស់ខ្ញុំនេះហើយ ត្រូវលុបចោលជាបន្ទាន់ បើដូច្នេះទេយើងខ្ញុំនឹងចាត់ការតាមផ្លូវច្បាប់ ដោយមិនអាចលើកលែងបានទេ ព្រោះអាចនឹងមានការយល់ខុស នៅពេលដែលបង្ហោះសារ ឬបង្ហោះរូបភាពចេញទៅតាមរយៈគណនី ដែលប្រើឈ្មោះខ្ញុំ»។

បើតាមសម្ដេចតេជោ ហ៊ុន សែន សូម្បីតែគណនី Tik Tok ឈ្មោះ Hun Sen Fans ក៏មិនអនុញ្ញាតឲ្យមានដែរ ដោយសម្ដេចត្រូវការភាពជាក់លាក់មួយ នោះគឺគណនី Tik Tok តែមួយរបស់សម្ដេចតែម្ដង៕