ឌីជីថលជួយពង្រីកទីផ្សាររបស់សហគ្រិន បង្កើនចំណូល និងពង្រឹងស័ក្ដិសិទ្ធិភាពការងារ

ឌីជីថលូបនីយកម្ម (Digitalization) បានធ្វើឱ្យមានការផ្លាស់ប្ដូរយ៉ាងខ្លាំងនូវរបៀបធ្វើអាជីវកម្ម ដោយបានបង្កើត​នូវប្រព័ន្ធអេកូឡូស៊ីសហគ្រិនភាពថ្មី ដែលតម្រូវឱ្យសហគ្រិនទាញយកសក្តានុពលពីបច្ចេកវិទ្យាឌីជីថល ដើម្បីធ្វើ​ឱ្យប្រសើរ​ឡើងនូវដំណើរការអាជីវកម្ម ពង្រឹងទំនាក់ទំនងជាមួយអតិថិជន និងដៃគូអាជីវកម្ម ស្វែងយល់ពីអតិថិជន​បានកាន់តែប្រសើរ និងបង្កើនទីផ្សារជាដើម។ មួយវិញទៀត បច្ចេកវិទ្យាឌីជីថលអាចជួយ​ឱ្យសហគ្រាសតូចធំប្រកប​អាជីវកម្មពីចម្ងាយ ដែលតម្រូវឱ្យសហគ្រិនចេះចាប់យកសក្តានុពលពីបច្ចេកវិទ្យាទាំងនេះ។

យោងតាមមជ្ឈមណ្ឌលកម្ពុជា ៤.០ បានបញ្ជាក់អំពីអត្ថប្រយោជន៍សំខាន់ៗមួយចំនួននៃការចាប់យក​សហគ្រិន​ភាពឌីជីថល ដូចខាងក្រោម៖

១. អាចជួយបង្កើនទីផ្សារ៖ ដោយសារតែការទិញទំនិញ និងការទទួលបានសេវាតាមប្រព័ន្ធអនឡាញ មានភាពងាយ​ស្រួល និងចំណេញពេលវេលា អតិថិជនកាន់តែច្រើនឡើងបានចាប់ផ្ដើមនិយមប្រើប្រាស់ថ្នាលឌីជីថល ដើម្បីទិញ​ផលិតផល ឬសេវាកម្មនានា។ ក្នុងន័យនេះ សហគ្រិនភាពឌីជីថលបានដើរតួនាទីយ៉ាងសំខាន់ក្នុងការជួយបង្កើនទីផ្សារ ដោយសហគ្រិនអាចប្រើប្រាស់បណ្តាញសង្គម ដើម្បីអាចធ្វើទីផ្សារ និងលក់ផលិតផល ឬសេវាកម្មនានាដល់​អតិថិជន​ជុំវិញពិភពលោក។

២. បង្កើនចំណូល៖ សហគ្រិនភាពឌីជីថលក៏អាចជួយឱ្យសហគ្រិនមានប្រភពប្រាក់ចំណូលបន្ថែមផងដែរ។ ជាក់ស្ដែង សហគ្រិនអាចទទួលបានប្រាក់ចំណូលបន្ថែមពីការទទួលផ្សព្វផ្សាយពាណិជ្ជកម្ម, ហើយបើយោងតាមទិន្នន័យរបស់ Statista គិតត្រឹមដើមឆ្នាំ ២០២២ ទីផ្សារនៃការផ្សព្វផ្សាយពាណិជ្ជកម្មតាមថ្នាលឌីជីថលនៅកម្ពុជាមានតម្លៃប្រមាណ ៧៦ លានដុល្លារអាម៉េរិក។ លើសពីនេះទៀត សហគ្រិនក៏អាចរកប្រាក់ចំណូលតាមរយៈការដាក់ឱ្យអតិថិជនអាចជាវ (Subscribe) នូវសេវានានានៅលើគេហទំព័រ ឬកម្មវិធីទូរស័ព្ទ។

៣. ធ្វើការពីចម្ងាយ៖ សហគ្រិនភាពឌីជីថលអនុញ្ញាតឱ្យសហគ្រិនធ្វើការងារពីចម្ងាយបាន ដោយពួកគេអាចទាញយក​សក្តានុពលពីបច្ចេកវិទ្យាមួយចំនួន ដូចជា អ៊ីនធឺណិត បច្ចេកវិទ្យាព័ត៌មាន និងទូរគមនាគមន៍ និងបច្ចេកវិទ្យាកុំព្យូទ័រក្លោដ ដែលអាចជួយកាត់បន្ថយការចំណាយលើការជួលការិយាល័យ ថ្លៃទឹក ថ្លៃអគ្គិសនី និងសម្ភារៈនានា។ បច្ចេកវិទ្យាទាំង​នេះ​ក៏អនុញ្ញាតឱ្យបុគ្គលិកធ្វើការរួមគ្នាបានគ្រប់ពេលវេលា និងគ្រប់ទីកន្លែង និងជួយសម្រួលដល់ការចែករំលែកទិន្នន័យ និងព័ត៌មាន ព្រមទាំងអាចជួយឱ្យសហគ្រិនពង្រឹងទំនាក់ទំនងជាមួយដៃគូអាជីវកម្មបានជុំវិញពិភពលោក។

៤. ពង្រឹងស័ក្ដិសិទ្ធិភាពការងារ៖ ការចាប់យកសហគ្រិនភាពឌីជីថលពិតជាមានសារៈសំខាន់ណាស់ក្នុង​ការជួយកាត់​បន្ថយការចំណាយមិនចាំបាច់ និងបង្កើនប្រសិទ្ធភាពការងារ ដោយ​សហគ្រិនអាចប្រើប្រាស់ស្វ័យប្រវត្តិកម្មដូចជា កម្មវិធីស្វ័យប្រវត្តិកម្មអ៊ីម៉ែល និងកម្មវិធីគ្រប់គ្រងគណនេយ្យដោយស្វ័យប្រវត្តិ ដើម្បីកាត់បន្ថយការជួល​បុគ្គលិកសម្រាប់​ការងារដដែលៗ និងកាត់បន្ថយកំហុស ដែលអាចរាំងស្ទះដល់ដំណើរការការងារ។ សហគ្រិនភាពឌីជីថលក៏អាចជួយ​ឱ្យសហគ្រិនធ្វើទីផ្សារបានយ៉ាងមានប្រសិទ្ធភាព តាមរយៈការធ្វើទីផ្សារឌីជីថល ដែលអាចជួយឱ្យសហគ្រិន​កំណត់​អតិថិជនគោល​ដៅបានប្រសើរ, ស្វែងយល់ពីលទ្ធផលនៃការធ្វើទីផ្សារបានងាយស្រួល និងមានតម្លៃសមរម្យ ផងដែរ។

សូមបញ្ជាក់ថា នៅប្រទេសកម្ពុជា ប្រជាជនកាន់តែច្រើនឡើងបាននិងកំពុងចាប់យកបច្ចេកវិទ្យាឌីជីថល។ ដោយ​យោងតាមគេហទំព័រ DATAREPORTAL គិតត្រឹមដើមឆ្នាំ ២០២២ អ្នកប្រើប្រាស់អ៊ីនធឺណិតនៅកម្ពុជា មានចំនួន​ប្រមាណ ១៣,៤៤លាននាក់។ ទីផ្សារសរុបនៃពាណិជ្ជកម្មតាមប្រព័ន្ធអេឡិចត្រូនិក នៅកម្ពុជាមានតម្លៃរហូត​ដល់ប្រមាណ ៩៧០ លានដុល្លារអាម៉េរិក ដែលកើនឡើងប្រមាណ ១៩% បើធៀបនឹងឆ្នាំ ២០២០។ នេះបើយោងតាម​វិទ្យាស្ថាន​បណ្តុះបណ្តាលពាណិជ្ជកម្ម និងស្រាវជ្រាវ។

យោងតាមរបាយការណ៍របស់ Meta នៅឆ្នាំ ២០២១ សហគ្រាសធុនតូច និងមធ្យមនៅកម្ពុជាប្រមាណ ៧៣% បានយល់ស្របពីសារៈសំខាន់នៃការប្រើប្រាស់ បច្ចេកវិទ្យាឌីជីថលក្នុងដំណើរការអាជីវកម្មរបស់ពួកគេ ពិសេសជួយ​រក្សាលំនឹងអាជីវកម្មក្នុងអំឡុងពេលនៃវិបត្តិជំងឺកូវីដ-១៩ ផងដែរ៕

អត្ថបទ៖ ផល ធារិត