ព័ត៌មានជាតិ

អគារសិក្សាថ្មីសន្លាង ១ ខ្នង និងផ្ទះស្នាក់នៅរបស់គ្រូ ១ ខ្នង ក្នុងបរិវេណអនុវិទ្យាល័យអណ្ដូងកន្ទួត ដាក់ឲ្យប្រើប្រាស់ជាផ្លូវការ

បានផុស

១ year មុន

នៅ

ថ្ងៃសុក្រ ៧ កក្កដា ២០២៣

ដោយ

សម្ពោធដាក់ឲ្យប្រើប្រាស់អគារសិក្សាថ្មី ១ ខ្នង ស្មើ ៥ បន្ទប់ ផ្ទះស្នាក់នៅរបស់គ្រូ ១ ខ្នង ស្មើ ២ បន្ទប់ និងមានបង្គន់អនាម័យចំនួន ៧ បន្ទប់ ជាអំណោយរបស់អង្គការ «សម្រេចសុបិនកុមារកម្ពុជា» ស្ថិតក្នុងបរិវេណអនុវិទ្យាល័យអណ្ដូងកន្ទួត ខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ៦ ខែកក្កដា ឆ្នាំ ២០២៣ លោក សុខ លូ អភិបាល នៃគណៈអភិបាលខេត្តបាត់ដំបង បានអញ្ជើញជាអធិបតីភាពក្នុងពិធីសម្ពោធដាក់ឲ្យប្រើប្រាស់អគារសិក្សាថ្មី ១ ខ្នង ស្មើ ៥ បន្ទប់ ផ្ទះស្នាក់នៅរបស់គ្រូ ១ ខ្នង ស្មើ ២ បន្ទប់ និងមានបង្គន់អនាម័យចំនួន ៧ បន្ទប់ ដែលជាអំណោយរបស់អង្គការ«សម្រេចសុបិនកុមារកម្ពុជា» ស្ថិតក្នុងបរិវេណអនុវិទ្យាល័យអណ្ដូងកន្ទួត ភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង។

អនុវិទ្យាល័យអណ្ដូងកន្ទួត កកើតឡើងក្នុងឆ្នាំ ២០១៨ ក្រោមការផ្ដួចផ្ដើមរបស់សហគមន៍ ដោយខ្ចីបន្ទប់សិក្សាពីសាលាបឋមសិក្សាអណ្ដូងកន្ទួត សម្រាប់ធ្វើការបង្រៀន។ ជាមួយនោះ ដោយមានការកើនឡើងចំនួនសិស្ស និងតម្រូវការច្រើន អគារសិក្សាថ្មីមួយខ្នង ដែលបំពាក់ទៅដោយគ្រឿងបរិក្ខារ ចំណាយថវិកាសរុប ៦៨,២០៨ ដុល្លារសហរដ្ឋអាមេរិក ជាអំណោយរបស់អង្គការ«សម្រេចសុបិនកុមារកម្ពុជា» ក៏បានបំពេញបន្ថែមនូវតម្រូវការរបស់សាលាផងដែរ។

លោក សុខ លូ អភិបាលខេត្តបាត់ដំបង បានមានប្រសាសន៍ថ្លែងអំណរគុណយ៉ាងជ្រាលជ្រៅដល់អង្គការ«សម្រេចសុបិនកុមារ» ក៏ដូចជាម្ចាស់ជំនួយ ដែលបានបរិច្ចាគជាថវិការបស់ខ្លួន សម្រាប់ជួយសាងសង់អគារសិក្សាមួយខ្នងនេះ។

លោកបញ្ជាក់ថា អង្គការ«សម្រេចសុបិនកុមារ» ក៏បានកៀរគរសប្បុរសជនជួយសាងសង់អគារសិក្សាសម្រាប់ខេត្តបាត់ដំបង ជួយផ្ដល់នូវអាហារូបករណ៍ដល់សិស្សានុសិស្សជាច្រើននាក់ ក៏ដូចជាការងារសប្បុរសធម៌ជាច្រើនទៀត ក្នុងន័យជួយអភិវឌ្ឍន៍វិស័យអប់រំនៅកម្ពុជាកាន់តែមានការរីកចម្រើន។

លោកបន្ថែមថា ជំនួយនេះ ពិតជាជំនួយដ៏ល្អស្របពេលប្រទេសកម្ពុជា កំពុងខ្វះខាត ហើយការដែលជួយសាលារៀននេះទៀតសោត ប្រៀបបានដូចជាជួយសម្រេចសុបិនដល់សិស្សានុសិស្សជាច្រើនឲ្យមានចំណេះដឹងខ្ពង់ខ្ពស់ មានការងារធ្វើល្អៗ ជាច្រើន៕

អត្ថបទ ៖ ពិសី