សម្ដេចតេជោ ហ៊ុន សែន អបអរចិនដែលបានរៀបចំ «កិច្ចប្រជុំជាន់ខ្ពស់លើកទី ១ នៃវេទិកាស្ដីពីសកម្មភាពសកលសម្រាប់ការអភិវឌ្ឍរួម»

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បាន​សម្ដែងការអបអរសាទរដល់ប្រទេសចិន ដែលបានរៀបចំ «កិច្ចប្រជុំជាន់ខ្ពស់លើកទី ១ នៃវេទិកា ស្ដីពី សកម្មភាពសកលសម្រាប់ការអភិវឌ្ឍរួម» ចាប់ពីថ្ងៃទី ៩ ដល់ថ្ងៃទី ១០ ខែកក្កដា ឆ្នាំ ២០២៣នេះ។ ការថ្លែងនេះ គឺតាមរយៈសុន្ទរកថារបស់សម្ដេចតេជោ ហ៊ុន សែន តាមរយៈវីដេអូ សម្រាប់កិច្ចប្រជុំជាន់ខ្ពស់លើកទី ១ នៃវេទិកា ស្ដីពី សកម្មភាពសកលសម្រាប់ការអភិវឌ្ឍរួម ដែលបានផ្សព្វផ្សាយនៅព្រឹកថ្ងៃចន្ទនេះ។

តាមរយៈសុន្ទរកថានេះ សម្ដេចតេជោ ហ៊ុន សែន លើកឡើងថា ប្រទេសនានា នៅលើពិភពលោក បាននិងកំពុងងើបចេញពីវិបត្តិជំងឺកូវីដ-១៩ តែស្ថានភាពសេដ្ឋកិច្ច និងការអភិវឌ្ឍសកល បន្តប្រឈមនឹងបញ្ហាកាន់តែស្មុគស្មាញ និងស្រួចស្រាល់ឡើងៗ ទាំងក្នុងទិដ្ឋភាពសេដ្ឋកិច្ច ​សង្គម និងបរិស្ថាន។

បើតាមសម្ដេចតេជោ ហ៊ុន សែន «នៅក្នុងបរិបទខាងលើនេះ យើងបានមើលឃើញយ៉ាងច្បាស់ពីការចូលរួមយ៉ាងសកម្មរបស់សាធារណរដ្ឋប្រជាមានិតចិន តាមរយៈការជំរុញសមាហរណកម្មតំបន់ និងការបន្តលើកស្ទួយពហុភាគីនិយម ជាពិសេសការដាក់ចេញនូវ គំនិតផ្ដួចផ្ដើមអភិវឌ្ឍ (GDI) និង គំនិតផ្ដួចផ្ដើមសន្តិសុខសកល (GSI) ដោយឯកឧត្ដមប្រធានាធិបតី ស៊ី ជីនពីង ដែលបាននិងកំពុងក្លាយជាកម្លាំងចលករដ៏សំខាន់ សម្រាប់គាំទ្រដល់បណ្ដាប្រទេសកំពុងអភិវឌ្ឍ ក្នុងការស្ដារសង្គម សេដ្ឋកិច្ចឡើងវិញ និងការសម្រេចឲ្យបាននូវរបៀបវារៈឆ្នាំ ២០៣០»។

សម្ដេចតេជោ ហ៊ុន សែន លើកឡើងបន្តថា នៅក្នុងក្របខណ្ឌទ្វេភាគី កម្ពុជា​ និងចិន បានខិតខំលើកកម្ពស់កិច្ចសហប្រតិបត្តិការដល់កម្រិតកំពូល ក្លាយជា «កិច្ចសហប្រតិបត្តិការត្បូងពេជ្រ» និងបានដាក់ចេញនូវ «សេចក្ដីថ្លែងការណ៍រួម ស្ដីពី ការកសាងសហគមន៍វាសនារួមកម្ពុជា-ចិន នៅក្នុងយុគសម័យថ្មី (២០២៤-២០២៨)»។ សម្ដេចតេជោ ហ៊ុន សែន ជឿជាក់ថា ការលើកកម្ពស់កិច្ចសហប្រតិបត្តិការកម្ពុជា-ចិននេះ នឹងបំពេញបន្ថែមដល់គំនិតផ្ដួចផ្ដើមនានា សម្រាប់ការអភិវឌ្ឍសកល ឲ្យកាន់តែមានប្រសិទ្ធភាពខ្ពស់៕