ព័ត៌មានជាតិ

ស្វែងយល់ពីរចនាសម្ព័ន្ធ និងតួនាទីស្ថាប័នចំណុះក្រសួងមហាផ្ទៃ

បានផុស

២ years មុន

នៅ

ថ្ងៃអង្គារ ១១ កក្កដា ២០២៣

ដោយ

ក្រសួងមហាផ្ទៃ មានបេសកកម្មដឹកនាំគ្រប់គ្រងរដ្ឋបាលដែនដីគ្រប់ថ្នាក់ គ្រប់គ្រងកងកម្លាំងនគរបាលជាតិលើវិស័យសន្តិសុខជាតិ សណ្ដាប់ធ្នាប់សាធារណៈ និងសុវត្ថិភាពសង្គម។

ក្រសួងមហាផ្ទៃដឹកនាំដោយរដ្ឋមន្ត្រី អមដោយរដ្ឋលេខាធិការនិងអនុរដ្ឋលេខាធិការតាមការចាំបាច់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមអនុក្រឹត្យស្តីពីការៀបចំនិងការប្រព្រឹត្តិទៅនៃក្រសួងមហាផ្ទៃ បានបែងចែករចនាសម្ព័ន្ធក្រសួងមហាផ្ទៃមានដូចតទៅ៖

១- អគ្គលេខាធិការដ្ឋាន
២- អគ្គនាយកដ្ឋានរដ្ឋបាល
៣- អគ្គស្នងការដ្ឋាននគរបាលជាតិ
៤- អគ្គាធិការដ្ឋាន
៥- អគ្គនាយកដ្ឋានពន្ធនាគារ
៦- អគ្គនាយកដ្ឋានអន្តោប្រវេសន៍
៧- អគ្គនាយកដ្ឋានអត្តសញ្ញាណកម្ម
៨- អគ្គនាយកដ្ឋានភស្តុភារ និងហិរញ្ញវត្ថុ
៩- បណ្ឌិត្យសភានគរបាលកម្ពុជា (ថ្នាក់ស្មើអគ្គនាយកដ្ឋាន)
១០- អគ្គនាយកដ្ឋានសវនកម្មផ្ទៃក្នុង
១១- ក្រុមប្រឹក្សានីតិកម្ម (ថ្នាក់ស្មើអគ្គនាយកដ្ឋាន)។

ដោយឡែកអគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន និងអគ្គលេខាធិការដ្ឋាននៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស មានរចនាសម្ព័ន្ធនិងមានមន្ត្រីបម្រើការងារជាក្របខ័ណ្ឌមកពីក្រសួងមហាផ្ទៃ។

កាលពីថ្ងៃ ២៦ តុលា ឆ្នាំ ២០១៨ សម្តេចក្រឡាហោម ស ខេង រដ្ឋមន្រ្តីក្រសួងមហាផ្ទៃបានចេញប្រកាសពីការកំណត់មុខតំណែង អគ្គស្នងការរង អគ្គនាយករង អនុប្រធាននាយកដ្ឋានកណ្តាល អនុប្រធាននាយកដ្ឋាន នាយរងការិយាល័យ និងថ្នាក់ប្រហាក់ប្រហែលក្នុងក្របខ័ណ្ឌមន្ត្រីនគរបាលជាតិកម្ពុជា និងក្របខ័ណ្ឌមន្ត្រីពន្ធនាគារក្រសួងមហាផ្ទៃ។

ប្រកាសនេះមានគោលបំណងកំណត់ចំនួនអតិបរមានៃមុខតំណែង អគ្គស្នងការរង អគ្គនាយករង អនុប្រធាននាយកដ្ឋានកណ្តាល អនុប្រធាននាយកដ្ឋាន នាយរងការិយាល័យ និងថ្នាក់ប្រហាក់ប្រហែល ក្នុងក្របខ័ណ្ឌមន្ត្រីនគរបាលជាតិកម្ពុជា និងក្របខ័ណ្ឌមន្ត្រីពន្ធនាគារក្រសួងមហាផ្ទៃ ដែលមានវិសាលភាពអនុវត្តចំពោះគ្រប់រចនាសម្ព័ន្ធគ្រប់គ្រងនិងមុខតំណែងក្នុងក្របខ័ណ្ឌមន្ត្រីនគបាលជាតិកម្ពុជា និងក្របខ័ណ្ឌមន្ត្រីពន្ធនាគារ។

ក្នុងប្រកាសបានកំណត់ចំនួនអតិបរមារមុខតំណែងអគ្គស្នងការរង អគ្គនាយករង និងថ្នាក់ប្រហាក់ប្រហែលក្នុងក្របខ័ណ្ឌ មន្ត្រីនគរបាលជាតិកម្ពុជា និងក្របខ័ណ្ឌមន្ត្រីពន្ធនាគារក្រសួងមហាផ្ទៃដូចខាងក្រោម៖

ទី១ អគ្គលេខាធិការដ្ឋាន មានអគ្គលេខាធិការរងចំនួន ០៨ រូប
ទី២ អគ្គស្នងការដ្ឋាននគរបាលជាតិ មានអគ្គស្នងការរងចំនួន ១៦ រូប
ទី៣ អគ្គាធិការដ្ឋាន មានអគ្គាធិការរងចំនួន ០៨ រូប
ទី៤ អគ្គនាយកដ្ឋានពន្ធនាគាររ មានអគ្គនាយករងចំនួន ០៨ រូប
ទី៥ អគ្គនាយកដ្ឋានអន្តោប្រវេសន៍ មានអគ្គនាយករងចំនួន ១០ រូប
ទី៦ អគ្គនាយកដ្ឋានអត្តសញ្ញាណកម្ម មានអគ្គនាយករងចំនួន ០៩ រូប
ទី៧ អគ្គនាយកដ្ឋានភស្តុភារនិងហិរញ្ញវត្ថុមានអគ្គនាយករងចំនួន ១១ រូប
ទី៨ បណ្ឌិត្យសភានគរបាលកម្ពុជាមានអនុប្រធានចំនួន ១០ រូប
ទី៩ អគ្គនាយកដ្ឋានសវនកម្មផ្ទៃក្នុងមានអគ្គនាយករងចំនួន ០៦ រូប
ទី១០ ក្រុមប្រឹក្សានីតិកម្ម មានអនុប្រធានចំនួន ០៧ រូប

ចំពោះមុខតំណែងផ្សេងទៀតមាន អនុប្រធានសេនាធិការដ្ឋាន អនុប្រធាននាយកដ្ឋានកណ្ដាល អនុប្រធាននាយកដ្ឋាន នាយរងការិយាល័យ និងថ្នាក់ប្រហាក់ប្រហែល ក្នុងក្របខ័ណ្ឌមន្ត្រីនគរបាលជាតិកម្ពុជា និងក្របខ័ណ្ឌមន្ត្រីពន្ធនាគារក៏មានការកម្រិតចំនួនអតិបរមារ។

យ៉ាងណាមិញក្នុងសេចក្តីប្រកាស មុខតំណែងខាងលើដែលមានចំនួនលើសកន្លងមកត្រូវរក្សាទុកដដែលពោលមិនត្រូវដកចេញវិញតាមការកំណត់នេះឡើយ។ ប៉ុន្តែក្នុងករណីមុខតំណែងទាំងនេះនៅសល់ទំនេរដោយមូលហេតុផ្សេងៗនោះគឺមិនត្រូវបំពេញឬជំនួសឡើយដោយរក្សាទុករហូតតាមចំនួនដែលបានកំណត់។

ក្នុងប្រកាសបានបញ្ជាក់បន្ថែមថា ក្នុងករណីចាំបាច់ដែលមានការតែងតាំងមុខតំណែងបន្ថែមលើសពីការកំណត់ ត្រូវស្នើសុំការសម្រេចពីរដ្ឋមន្ត្រីក្រសួងមហាផ្ទៃ និងពីនាយករដ្ឋមន្រ្តី៕