ក្រសួងពាណិជ្ជកម្ម៖ សាំងធម្មតារក្សាតម្លៃដដែល ខណៈម៉ាស៊ូតឡើងថ្លៃ ៥០រៀល ក្នុងមួយលីត្រ

ក្រសួងពាណិជ្ជកម្ម បានប្រកាសថា សាំងធម្មតានៅបន្តរក្សាតម្លៃដដែល គឺ ៤១៥០រៀល ក្នុងមួយលីត្រ និងម៉ាស៊ូត​ឡើងថ្លៃ ៥០រៀល ស្មើនឹង ៤០០០រៀល ដោយតម្លៃនេះចាប់អនុវត្តពីថ្ងៃទី ១១-២០ កក្កដា ឆ្នាំ ២០២៣ តទៅ។

ពាក់ព័ន្ធនឹងតម្លៃប្រេងឥន្ធនៈនេះ កាលពីថ្ងៃចន្ទម្សិលមិញ តម្លៃប្រេងអន្តរជាតិបានធ្លាក់ចុះ បន្ទាប់ពីមានការចេញផ្សាយ​ទិន្នន័យសេដ្ឋកិច្ច មិនសូវល្អដោយប្រទេសមហាអំណាចសេដ្ឋកចិ្ចអាមេរិក និងចិន ទោះបីជាមានការរំពឹងថា នឹងមាន​ការកាត់បន្ថយការផ្គត់ផ្គង់ប្រេងពីអារ៉ាប៊ីសាអូឌីត និងរុស្ស៊ីក្តី។ នេះបើយោងតាមទីភ្នាក់ងាររ៉យទ័រ។

តម្លៃប្រេងឆៅប្រភេទ Brent ក្នុងកិច្ចសន្យាបានធ្លាក់ចុះ ១៩សេន ឬ ០.២ភាគរយមកនៅត្រឹម ៧៨.២៨ដុល្លារក្នុង​មួយបារ៉ែល ខណៈដែលប្រេងឆៅប្រភេទ West Texas Intermediate របស់អាមេរិកបានធ្លាក់ចុះ ២៤សេន ឬ ០.៣ភាគរយនៅត្រឹម ៧៣.៦២ដុល្លារ។

បើតាមក្រសួងពាណិជ្ជកម្ម បច្ចុប្បន្ន​នេះប្រេងឥន្ធនៈដែលកម្ពុជាប្រើប្រាស់ គឺបាននាំចូលពីប្រទេសសិង្ហបុរី ថៃ និងវៀតណាម។ ក្រុមហ៊ុនលក់រាយនៅកម្ពុជា ដែលនាំចូលប្រេងឥន្ធនៈ មានដូចជា ក្រុមហ៊ុនតេលា សូគីម៉ិច ប៉ាប៉ា សាវីម៉ិច លឹមឡុង និងក្រុមហ៊ុនមួយចំនួនទៀត។ ចំណែកក្រុមហ៊ុនបរទេស ដែលនាំចូលប្រេងឥន្ធនៈមកស្រុកខ្មែរ រួមមាន ក្រុមហ៊ុនតូតាល់ កាល់តិច និងក្រុមហ៊ុនភីធីធី។

សូមបញ្ជាក់ថា ក្រសួងពាណិជ្ជកម្ម បានចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែ​ប្រួលថ្លៃប្រេងឥន្ធនៈនៅលើសកលលោក៕