ប្រជាពលរដ្ឋម្នាក់ៗ សម្រេចចិត្តឱ្យត្រូវ​ក្នុងការបោះឆ្នោត ដើម្បីអនាគតជាតិ

(ស្វាយរៀង)៖ លោក ទេសរដ្ឋមន្រ្តី លី ធុជ ប្រធានក្រុមការងារចុះមូលដ្ឋានក្រុងបាវិត ខេត្តស្វាយរៀង បានលើកឡើងថា «ប្រសិនបើយើងមិនបោះឆ្នោតដើម្បីសន្តិភាពទេ គឺមានន័យថា យើងកំពុងតែមើលរំលងប្រវត្តិសាស្រ្ត និងកំពុងបោះ​បង់ចោលអនាគតខ្លួនឯង»។ លោកឡើងបែបនេះ នៅក្នុងពិធីជួបសំណេះសំណាលជាមួយសកម្មជន សមាជិក សមាជិកា​បក្សនៅសង្កាត់បាទី ក្រុងបាវិត នៅព្រឹកថ្ងៃទី១១ ខែកក្កដា ឆ្នាំ២០២៣។

លោក លី ធុជ បានបន្តទៀតថា “ប្រជាពលរដ្ឋម្នាក់ៗ មានការសម្រេចចិត្តយ៉ាងសំខាន់ក្នុងការបោះឆ្នោត ដើម្បីអនាគត​ជាតិមាតុភូមិកាន់តែខ្លាំងក្លា សន្តិភាព សន្តិសុខ ស្ថិរភាព ការអភិវឌ្ឍសេដ្ឋកិច្ចសង្គម ការងារ ការវិនិយោគ និងអនាគត​ដ៏ភ្លឺស្វាងជាមួយ​នឹងឱកាសគ្មានដែនកំណត់សម្រាប់កំណើន និងវិបុលភាពរបស់មនុស្សគ្រប់ៗគ្នា។ ការបោះ​ឆ្នោត​របស់យើង គឺជាការបញ្ជាក់ពីការប្តេជ្ញាចិត្តសម្រាប់អនាគតប្រទេសជាតិ និងអនាគតជនរួមជាតិ។ ការងារការរីក​ចម្រើន អនាគតដ៏ត្រចះត្រចង់ និងជីវភាពរស់នៅប្រកបដោយសន្តិភាពរបស់យើង គឺអាស្រ័យលើការបោះឆ្នោតនេះ”។

លោក ទេសរដ្ឋមន្រ្តី ក៏បានថ្លែងអំណរគុណចំពោះអ្នកបោះឆ្នោតទាំងអស់ ដែលបានបោះឆ្នោតដើម្បីជាតិ ព្រមទាំងបាន​អំពាវនាវស្នើសុំសន្លឹកឆ្នោត និងការគាំទ្រពីបងប្អូនប្រជាពលរដ្ឋគ្រប់ៗគ្នា ដើម្បីបោះឆ្នោតជូនសម្តេចតេជោ ហ៊ុន សែន ដែលជាបិតាសន្តិភាព។ យើងមិនត្រូវបំភ្លេចឡើយនូវគុណរបស់គណបក្សប្រជាជនកម្ពុជា ដែលបានរំដោះ​ប្រទេសជាតិ​ចេញពីរបបប្រល័យពូជសាសន៍ បង្កើតនូវនយោបាយឈ្នះឈ្នះ សន្តិភាព ការឯកភាពជាតិ​គ្រួសារខ្មែរតែមួយ និងការ​កសាងប្រទេសជាតិរហូតដល់មានការអភិវឌ្ឍដូចសព្វថ្ងៃ និងស្មើមុខ​ស្មើមាត់លើឆាកអន្តរជាតិ។ នេះជាការបន្ថែមរបស់លោក លី ធុជ។

ប្រធានក្រុមការងារចុះមូលដ្ឋានក្រុងបាវិត ខេត្តស្វាយរៀង ក៏បានដឹកនាំសកម្មជន សមាជិក សមាជិកាបក្សទាំងអស់​ចុះសួរសុខទុក្ខប្រជាពលរដ្ឋតាមខ្នងផ្ទះផងដែរ៕

ដោយ ៖ ភក្ដី