ជនបរទេសប្រមាណ ៥០រូប ទទួលបានការបណ្តុះបណ្តាលភាសាខ្មែរពីរាជបណ្ឌិត្យសភាកម្ពុជា ក្នុងនោះជនជាតិថៃច្រើនជាងគេ

លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា បានឲ្យដឹងថា មកដល់ពេលនេះរាជបណ្ឌិត្យសភាកម្ពុជា បានបណ្តុះបណ្តាលភាសាខ្មែរជូនជនបរទេសសរុប ៥០រូបហើយ ដែលមានជនជាតិជប៉ុន ជនជាតិកូរ៉េ ជនជាតិចិន ជនជាតិអង់គ្លេស ជនជាតិរុស្ស៊ី ជនជាតិអាឡឺម៉ង់ ជនជាតិអាមេរិក ជនជាតិបារាំង និងថៃជាដើម។ ក្នុងនោះផងដែរក៏មានវត្តមានមន្រ្តីដែលមកពីអគ្គរាជទូត និងអគ្គរដ្ឋទូតប្រចាំព្រះរាជាណាចក្រកម្ពុជាផងដែរ។

លោកបណ្ឌិត យង់ ពៅ មានប្រសាសន៍ប្រាប់កម្ពុជាថ្មីថា ជនជាតិកូរ៉េ បានរៀនចប់បណ្ឌិតអក្សរសាស្ត្រខ្មែរចំនួន ២រូប ជនជាតិជប៉ុនចប់ថ្នាក់បរិញ្ញាបត្រជាន់ខ្ពស់ អក្សរសាស្រ្តខ្មែរ ១រូប ជនជាតិចិនរៀនចប់ បរិញ្ញាបត្រជាន់ខ្ពស់អក្សរសាស្រ្តខ្មែរ ចំនួន ១រូប។

លោកបណ្ឌិត បានឲ្យដឹងទៀតថា ក្នុងចំណោមជនជាតិបរទេសទាំង ៥០រូប ដែលមករៀនភាសាខ្មែរ នៅរាជបណ្ឌិត្យសភាកម្ពុជា គឺជនជាតិថៃមានច្រើនជាងគេ ដោយមានចំនួនប្រមាណជិត ៤០រូប។ ក្រៅពីជនជាតិថៃ គឺជនជាតិវៀតណាមមានចំនួន ៣រូប កំពុងសិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត ភាសាវិទ្យា នៅរាជបណ្ឌិត្យសភាកម្ពុជា ផងដែរ។

លោកបណ្ឌិត យង់ ពៅ បញ្ជាក់ថា ក្រៅពីការបណ្ដុះបណ្ដាលថ្នាក់ភាសាខ្មែរដល់ជនបរទេស រាជ​បណ្ឌិត្យសភាកម្ពុជា ក៏មានកម្មវិធីបណ្ដុះបណ្ដាលជំនាញវគ្គខ្លី ទាក់ទងនឹងជំនាញចុងភៅ ការកែឆ្នៃភេសជ្ជផ្សេងៗ ដូចជា៖ ស្រាក្រឡុក ឬស្រា សម្រាប់សុខភាព និង ជំនាញធ្វើម្ហូមផ្សេងៗទៀត សាធារណៈជន និងជនបរទេស។

ជាក់ស្ដែង ជនជាតិបរទេសបានមករៀនជំនាញចុងភៅ ក្នុងកម្រិតអ្នកមាន ឬអភិជន សម្រាប់យកទៅបើកភោជនីយដ្ឋាន នៅប្រទេសរបស់ពួកគេ។ ជាងនេះទៅទៀត ជនជាតិបរទេសខ្លះ បន្ទាប់ពីបានរៀនចប់ជំនាញធ្វើម្ហូបវគ្គខ្លី រួចហើយក៏បានបម្រើការជាចុងភៅ នៅតាមភោជនីយដ្ឋាន ឬ សណ្ឋាគារធំៗ ក្នុងប្រទេសកម្ពុជាដែរ។

លោកបណ្ឌិត យង់ ពៅ រាជបណ្ឌិត្យសភាកម្ពុជា មិនត្រឹមតែបណ្ដុះបណ្ដាលថ្នាក់ភាសាខ្មែរ និងជំនាញចុងភៅ តែប៉ុណ្ណឹងនោះទេ តែរាជបណ្ឌិត្យសភាកម្ពុជា ក៏មានបណ្ដុះបណ្ដាលថ្នាក់ភាសាចិន កម្រិតទាប មធ្យម និងកម្រិតខ្ពស់ តាមរយៈវិទ្យាស្ថានខុងជឺ នៃរាជបណ្ឌិត្យសភាកម្ពុជា៕

អត្ថបទ៖ សួស សិត