មន្ត្រីពន្លត់អគ្គិភ័យ ៖ ជាង ៤៥% នៃគ្រោះអគ្គិភ័យ កើតឡើងមកពីការឆ្លងចរន្តអគ្គិសនី

លោក​ឧត្ដមសេនីយ៍​ឯក នេត ចន្ថា ប្រធាន​នាយកដ្ឋាន​ពន្លត់​អគ្គិភ័យ នៃ​ក្រសួងមហាផ្ទៃ បាន​អះអាង​ថា ជាង ៤៥% នៃ​គ្រោះ​អគ្គិភ័យ កើតឡើង​បណ្ដាល​មកពី​ការ​ឆ្លង​ចរន្តអគ្គិសនី​ដែល​ទាមទារ​ឲ្យ​ប្រជាពលរដ្ឋ​មាន​ការ​ប្រុងប្រយ័ត្ន​បន្ថែម​ទៀត។

ថ្លែង​ក្នុង​ពិធី​ហ្វឹកហាត់​ដល់​បុគ្គលិក​ផ្សារ​ទំនើប​អ៊ីអន​ម៉ល​ទី ១ ប្រមាណ​ជាង ៣០០ នាក់ នៅ​ព្រឹក​ថ្ងៃ​ទី ១២ កក្កដា​នេះ លោក​ឧត្ដមសេនីយ៍​ឯក នេត ចន្ថា បាន​បន្ត​ថា មូលហេតុ​ការ​កើតឡើង នៃ​គ្រោះ​មហន្តរាយ​អគ្គិភ័យ​នេះ បណ្ដាល​មកពី​ករណី​ឆ្លង​ចរន្តអគ្គិសនី ចំនួន ៤៥,២៥% ករណី​ប្រើប្រាស់​ភ្លើង​ចំនួន ៣៤,៤០% និង​មូលហេតុ​ផ្សេងទៀត​ចំនួន ៤២%។

លោក​ឧត្ដមសេនីយ៍​ឯក នេត ចន្ថា បាន​លើក​របាយការណ៍​មក​បញ្ជាក់​ថា ក្នុង​ឆមាស​ទី ១ ឆ្នាំ ២០២៣ នេះ មាន​គ្រោះ​អគ្គិភ័យ​កើតឡើង​ចំនួន ៥៦១ លើក កើន​ឡើង ១៤៤ លើក បើ​ប្រៀបធៀប​ទៅ​នឹង​ឆ្នាំ ២០២២ កន្លងទៅ ក្នុង​នោះ​បណ្ដាល​ឲ្យ​មនុស្ស​ស្លាប់​ចំនួន ៤១ នាក់ និង​រង​របួស ៨៤ នាក់។

បើ​តាម​របាយការណ៍​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ បាន​បញ្ជាក់​ថា រយៈពេល ៦ ខែ​នេះ គ្រោះ​អគ្គិភ័យ​បាន​កើត​ឡើង​នៅ​ទូទាំង​ប្រទេស​ចំនួន ៣៣៧ លើក បណ្ដាល​ឲ្យ​ឆេះ​ផ្ទះ​ចំនួន ៣៧២ ខ្នង តូប​ផ្សារ ៥៩ តូប ឃ្លាំង​ទំនិញ ៨ កន្លែង សាលារៀន ១ ខ្នង រោងចក្រ​សិប្បកម្ម ៦ កន្លែង អគារ​រដ្ឋបាល ៦ កន្លែង ស្លាប់​មនុស្ស ១៤ នាក់ និង​របួស ២៧ នាក់។

ក្នុង​ចំណោម​អគ្គិភ័យ​ទាំង ៣៣៧ លើក ក្នុង​នោះ​កើត​នៅ​រាជធានី​ភ្នំពេញ​ច្រើន​ជាង​គេ មាន​ចំនួន ៦២ លើក បណ្ដាល​ឲ្យ​ឆេះ​ផ្ទះ​ចំនួន ៥៦ ខ្នង តូប​ផ្សារ ១៣ តូប ឃ្លាំង​ទំនិញ ៧ កន្លែង រោងចក្រ​សិប្បកម្ម ២ កន្លែង ស្លាប់​មនុស្ស ៣ នាក់ និង​របួស ៧ នាក់។ ក្រៅពី​នេះ ខេត្ត​កំពង់ចាម មាន​អ្នក​ស្លាប់​ចំនួន ៣ នាក់ ខេត្ត​ព្រះសីហនុ ខេត្ត​ស្វាយរៀង និង​ខេត្ត​តាកែវ មាន​អ្នក​ស្លាប់​ចំនួន ២ នាក់ ខេត្ត​កណ្ដាល ១ នាក់ និង​ខេត្ត​ស្ទឹងត្រែង ១ នាក់។

គ្រោះ​អគ្គិភ័យ​រយៈពេល ៦ ខែ​ឆ្នាំនេះ បើ​ប្រៀបធៀប​ទៅ​នឹង​រយៈពេល ៦ ខែ​ដូចគ្នា ឆ្នាំ ២០២២ កន្លង​ទៅ ឃើញ​ថា មាន​ការ​កើន​ឡើង ខណៈ ៦ ខែ​ឆ្នាំមុន គ្រោះ​អគ្គិភ័យ​បាន​កើតឡើង​ចំនួន ២៥១ លើក បណ្ដាល​ឲ្យ​មនុស្ស​ស្លាប់ ១១ នាក់ និង​រង​របួស ៣២ នាក់ ព្រមទាំង​បំផ្លាញ​ផ្ទះ​សម្បែង​ប្រជាពលរដ្ឋ​ប្រមាណ ៤៤៥ ខ្នង៕

អត្ថបទ ៖ សំអឿន