ស្ពានអាកាសព្រះមុនីវង្សចំណាយថវិកាជាង ៣៦ លានដុល្លារសម្រេចការសាងសង់ ២៥%

គម្រោងស្ពានអាកាសព្រះមុនីវង្ស ដែលមានកម្ពស់ ២ ជាន់ សម្រេចបានការសាងសង់ ២៥ ភាគរយ ខណៈក្រុមការងារបច្ចេកទេសកំពុងដំឡើងសសរស្ពានគិតត្រឹមថ្ងៃទី ១២ ខែកក្កដា ឆ្នាំ ២០២៣នេះ។

មន្ទីរសារធារណការ រាជធានីភ្នំពេញបានឱ្យដឹងថា «គម្រោងនេះ ជាស្ពានអាកាសកម្ពស់ ២ជាន់ ដែលនឹងសម្រួលលំហូរចរាចរលើដងមហាវិថី ព្រះមុនីវង្ស មហាវិថី សម្តេចអគ្គមហាសេនាបតីតេជោ ហ៊ុន សែន វិថី កងយោធពលខេមរភូមិន្ទ និងតភ្ជាប់ចរាចរពីតំបន់ក្នុងទីក្រុងទៅមកអាកាសយានដ្ឋានអន្តរជាតិតេជោ។ តាមផែនការគម្រោងនេះ នឹងបញ្ចប់ការសាងសង់នៅខែ សីហា ឆ្នាំ២០២៥»។

ស្ពានអាកាសនេះ ត្រូវបានសាងសង់ដោយក្រុមហ៊ុន OCIC គ្រោងចំណាយថវិកាជាង ៣៦លានដុល្លារ និងចំណាយពេល ៣៦ខែ មានទីតាំងស្ថិតនៅចំណុចប្រសព្វមហាវិថីសម្តេចតេជោ ​ហ៊ុន សែន មហាវិថី​ព្រះមុនីវង្ស ​ជាមួយវិថីកងយោធពលខេមរភូមិន្ទ (ផ្លូវលេខ២៧១) ក្នុងខណ្ឌចំការមន និងខណ្ឌមានជ័យ រាជធានីភ្នំពេញ៕