​កងកម្លាំងជិត ១០ ម៉ឺននាក់ ដាក់ការពារសន្ដិសុខសណ្ដាប់ធ្នាប់ដំណើរការបោះឆ្នោត

កម្លាំងការពារសន្តិសុខ ​អំឡុងពេលបើកយុទ្ធនាការឃោសនារបស់គណបក្សនយោបាយ និងបោះ​ឆ្នោតជ្រើសតាំងតំណាងរាស្ត្រ​អាណត្តិ​ទី៧ ឆ្នាំ២០២៣ មានចំនួនជិត ១០ ម៉ឺននាក់។

​លោកឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិបានឱ្យដឹងថា ការដាក់​កម្លាំង​ការពារសន្ដិសុខបោះឆ្នោតតំណាងរាស្ត្រអាណត្តិទី ៧ មានប្រមាណជិត ១ សែននាក់ ដើម្បី​ការ​ពារសន្តិសុខសណ្ដាប់ធ្នាប់ ក្នុងអំឡុងពេលយុទ្ធនាការឃោសនា រកសំឡេងឆ្នោត និងបោះ​ឆ្នោត​ជ្រើស​តាំងតំណាងរាស្ត្រនីតិកាលទី៧។

ការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ បានចាប់ផ្តើមពីថ្ងៃ១ ខែកក្កដា រហូតដល់ថ្ងៃ២១ ដែលមានរយៈពេល២១ថ្ងៃ មុននឹងដល់ថ្ងៃបោះឆ្នោតថ្នាក់ជាតិថ្ងៃ២៣ កក្កដា ដែលមានគណបក្សនយោបាយ ចូលរួមប្រកួតប្រជែងចំនួន១៨គណបក្ស។

លោក ឆាយ គឹមខឿន ប្រាប់កម្ពុជាថ្មីនៅថ្ងៃទី ១២ ខែកក្កដានេះថា ក្នុងចំណោមកម្លាំង​ការពារ​សន្តិសុខបោះឆ្នោតទាំងជិត ១០ ម៉ឺននាក់ មានកម្លាំងនគរបាលជាង ៥ ម៉ឺននាក់ (៥៣ ០០០) កម្លាំងអាវុធហត្ថជាង ៤ ពាន់នាក់ កងយោធពលខេមរភូមិន្ទជាង ៥ ពាន់នាក់ ​និងកម្លាំងជំនួយ​ពីប្រជាការពារជាង ៣ ម៉ឺននាក់។

​បើតាមលោក ឆាយ គឹមខឿន កម្លាំងទាំងអស់ ត្រូវបានបែងចែកតាមដំណាក់កាលនីមួយៗ ដូចជាដំណាក់កាលឃោសនាមានតែកម្លាំងជិត ២ ម៉ឹននាក់ ដោយឡែកសម្រាប់ថ្ងៃបោះឆ្នោត​មានរហូតដល់ជាង ៧ ម៉ឺននាក់ ការពារការិយាល័យបោះឆ្នោត និងមានកម្លាំងគាំទ្រពីកង​រាជអាវុធ​ហត្ថ និងកងយុទ្ធពលខេមរភូមិន្ទនៅតំបន់ក្រៅភូមិសាស្ត្រតាមបណ្ដាស្រុកនិមួយៗ។ ដោយឡែកកម្លាំងនគរបាល និងប្រជាការពារជាភ្នាក់ងារផ្ទាល់នៅការិយាល័យបោះឆ្នោត។

ចំពោះការរៀប​ចំភ្នាក់ងារសន្តិសុខ ដែលមាននគរបាល និងប្រជាការពារគឺដោយបានកំណត់កម្លាំង​នគរបាលម្នាក់អាចនៅក្នុងបរិវេណការិយាល័យចម្ងាយ ១៥ ម៉ែត្រ ពីការិយាល័យដើម្បីជួយរៀប​ចំសណ្ដាប់ធ្នាប់ទូទៅសម្រាប់ប្រជាពលរដ្ឋទៅបោះឆ្នោត។

រីឯកម្លាំង ២ នាក់ទៀត អាចជានគរបាលរួមបញ្ចូលជាមួយប្រជាការពារនៅក្រៅរង្វង់ការិយាល័យបោះឆ្នោតចន្លោះពី ១០០ ទៅ ១៥០ ម៉ែត្រ តាមភូមិសាស្ត្រជាក់ស្ដែង។

លោក ហង្ស ពុទ្ធា សមាជិក និងជាអ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប)បានឱ្យដឹងថា សម្រាប់ការរៀបចំសន្ដិសុខ សណ្ដាប់ធ្នាប់ដើម្បីឱ្យប្រជាពលរដ្ឋទៅបោះឆ្នោត គ.ជ.ប បានសហការជាមួយក្រសួងមហាផ្ទៃ និងក្រសួងការពារជាតិ ដែលមានរចនាសម្ព័ន្ធការងារពីថ្នាក់ជាតិរហូតដល់ថ្នាក់មូលដ្ឋាន។

លោកថា មន្ត្រីសមត្ថកិច្ចក៏ជាភ្នាក់ងារសន្ដិសុខបោះឆ្នោតដែរ ខណៈគ.ជ.ប បានបង្កើតប្រឡង់ដៃ សម្រាប់នគរបាល ឬមន្ត្រីសន្តិសុខ ប្រើប្រាស់ដើម្បីសម្គាល់ថា នរណាជាមន្ត្រីសន្តិសុខបោះឆ្នោត នគរបាល ឬយោធា ទៅតាមភារកិច្ចរៀនខ្លួន ដែលការពារនេះ មិនមានប៉ះពាល់ទៅដល់ភាពភ័យខ្លាចរបស់ប្រជាពលរដ្ឋនោះទេ។

ប្រជាពលរដ្ឋសរុបប្រមាណជាង ៩ លាននាក់ (៩ ៧១០ ៦៥៥) ស្ត្រី ៥ ១៦១ ៩០៩នាក់ និងមានការិយាល័យបោះឆ្នោតសរុបចំនួន ២៣ ៧៨៩ ការិយាល័យនៅទូទាំងប្រទេស៕

អត្ថបទ៖ ឡេង ដេត