ការនាំចូលទំនិញរបស់កម្ពុជា ធ្លាក់ចុះជាង ២៤ភាគរយ ក្នុងខែមិថុនា

​ការនាំចូលទំនិញពីបរទេសរបស់កម្ពុជា ក្នុងមិថុនា ឆ្នាំ ២០២៣ បានធ្លាក់ចុះប្រមាណ ២៤.៥ភាគរយ ស្មើនឹង ២.១ពាន់លានដុល្លារ។ នេះបើតាមរបាយការណ៍អគ្គនាយកដ្ឋានគយ និងរដ្ឋាករ។

ទោះយ៉ាងណា ចិន នៅតែរក្សាតំណែងទី១ នាំចូលទំនិញមកកម្ពុជាច្រើនជាងគេ ក្នុងតម្លៃជាង ៩៥០លានដុល្លារ កើនឡើង ៥.៤ភាគរយ បើធៀបនឹងរយៈពេលដូចគ្នា ក្នុងខែ មិថុនា ឆ្នាំ ២០២២។ ខណៈដែលវៀតណាម ថៃ ម៉ាឡេស៊ី ជប៉ុន សិង្ហបុរី សុទ្ធតែមានការធ្លាក់ចុះក្នុងការនាំចូលទំនិញមកកាន់កម្ពុជា។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់កម្ពុជាថ្មីថា ទាក់ទិននឹងការធ្លាក់ចុះនេះ មានពីរកត្តា គឺទី១ កត្កាធ្លាក់ចុះតម្រូវការវត្ថុធាតុផ្នែកសំណង់ ដោយសារវិស័យនេះ មានការថយចុះក្នុងការ​សាងសង់ដែលធ្វើឱ្យការនាំចូលក៏មានការធ្លាក់ចុះផងដែរ និងទី២ កម្ពុជា មានរោងចក្រសហគ្រាសជាច្រើន ដែលអាចផលិត និងផ្គត់ផ្គង់វត្ថុធាតុដើម បរិក្ខារ សម្ភារៈ របស់ប្រើប្រាស់ផ្សេងៗ ផលិតបានដោយខ្លួនឯងច្រើន។

លោកឧកញ៉ា​ បានបន្តថា «ទៅថ្ងៃអនាគត ការនាំចូលកាន់តែមានការថយចុះ ព្រោះយើងបានបង្កើនការផលិត ដោយមានការវិនិយោគទាំងក្នុងស្រុក និងមកពីបរទេស ដើម្បីបង្កើនការនាំចេញតាមរយៈកិច្ចព្រមព្រៀង​ពាណិជ្ជកម្មផ្សេងៗ ក៏ដូចជាភាពអនុគ្រោះពន្ធ EBA GSP ដែលនឹងធ្វើឱ្យការនាំចេញរបស់យើងកើនឡើង»។

បើតាមលោក ឧកញ៉ា លឹម ហេង ទំនិញដែលកម្ពុជា នាំចូលច្រើនមានដូចជា យានយន្ត ប្រេងឥន្ធនៈ សម្ភារៈប្រើប្រាស់ បរិក្ខារអគ្គិសនី សម្ភារសំណង់ និងវត្ថុធាតុដើមសម្រាប់កែច្នៃនាំចេញ ដែលភាគច្រើន បាននាំចូលពីប្រទេសចិន។

អនុប្រធានសភាពាណិជ្ជកម្មកម្ពុជា រំពឹងថា ទៅថ្ងៃអនាគត កំណើនសេដ្ឋកិច្ច និងការវិនិយោគរបស់កម្ពុជា នឹងអាចបង្កើនការនាំចេញទំនិញកាន់តែច្រើនទៅទីផ្សារអន្តរជាតិ ជាពិសេសនាំចូលមកវិញនូវកំណើន​ភ្ញៀវ​ទេសចរផងដែរ។

សូមបញ្ជាក់ថា រយៈពេល ៦ខែ ចាប់ពីខែ មករា ដល់ មិថុនា ឆ្នាំ ២០២៣ កម្ពុជា នាំចូលទំនិញពីអន្តរជាតិ មានតម្លៃ​ប្រមាណជាង ១២ពាន់លានដុល្លារ ធ្លាក់ចុះជិត ២៣ភាគរយ បើធៀបនឹងរយៈពេលដូចគ្នា កាលពីឆ្នាំ ២០២២ មាន​ចំនួនជិត ១៦ពាន់លានដុល្លារ៕