ព័ត៌មានជាតិ

អ្នកសង្កេតការណ៍អន្តរជាតិ ១៥ នាក់ មកពីប្រទេសអាស៊ានចូលរួមតាមដានការបោះឆ្នោតនៅកម្ពុជា

បានផុស

២ years មុន

នៅ

ថ្ងៃសុក្រ ១៤ កក្កដា ២០២៣

ដោយ

គណៈកម្មាធិការជាតិរៀបចំការបោះឆ្នោត (គ.ជ.ប) បានទទួលស្គាល់អ្នកសង្កេតការណ៍អន្តរជាតិ មកពីប្រទេសអាស៊ានចំនួន ១៥ នាក់ ឱ្យចូលរួមសង្កេតការណ៍ក្នុងដំណើរការបោះឆ្នោតជ្រើសតាំងតំណាងរាស្ត្រនីតិកាលទី ៧ នៅថ្ងៃទី ២៣ ខែកក្កដា ឆ្នាំ ២០២៣ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប ប្រាប់កម្ពុជាថ្មីនៅថ្ងៃទី ១៤ ខែកក្កដា ឆ្នាំ ២០២៣ នេះថា អ្នកសង្កេតការណ៍ជាតិសរុបជាង ៨ ម៉ឺននាក់ (៨៨ ១៦៥) មកពី ១២១ ស្ថាប័នបានចូលរួមតាមដានការបោះឆ្នោត និងរាប់សន្លឹកឆ្នោត ក្នុងដំណើរការបោះឆ្នោតជ្រើសតាំងតំណាងរាស្ត្រនីតិកាលតិកាលទី ៧ ឆ្នាំ ២០២៣។

លោកថា ក្នុងចំណោមអ្នកសង្កេតការណ៍ជាង ៨ ម៉ឺននាក់ មានអ្នកសង្កេតការណ៍អន្តរជាតិ ១៥ នាក់ មកពីប្រទេសអាស៊ាន ដែលមានប្រទេសទីម័រខាងកើត ២ នាក់ ប្រទេសសិង្ហបុរី ១ នាក់ ប្រទេសមីយ៉ាន់ម៉ា ២ នាក់ ប្រទេសវៀតណាម ៥ នាក់ ឥណ្ឌូនេស៊ី ១ នាក់ ព្រមទាំងប្រទេសសមាជិកអាស៊ាន ៤ នាក់ផ្សេងទៀត។

លោក សោម សូរីដា បញ្ជាក់ថា ក្រៅពីអ្នកសង្កេតការណ៍ ក៏មានភ្ញៀវពិសេសដែរ គ.ជ.ប អញ្ជើញឱ្យចូរួមសង្កេតមើលការបោះឆ្នោត និងរាប់សន្លឹកឆ្នោតនៅថ្ងៃទី ២៣ ខែកក្កដា មានចំនួន ៧ នាក់ មកពី ៣ ប្រទេស ដែលមានប្រទេសបារាំង ជប៉ុន រុស្ស៊ី ខណៈគ.ជ.ប នៅរង់ចាំទទួលភ្ញៀវពិសេសបន្តទៀត។

លោក សោម សូរីដាប្រាប់ថា អ្នកសង្កេតការណ៍ជាតិ និងអន្តរជាតិ មិនទាន់ពេលវេលាស្នើសុំចូលរួមចុះឈ្មោះអ្នកសង្កេតការណ៍នៅឡើយ ខណៈគ.ជ.ប កំពុងពិនិត្យមើលបន្ថែមទៀត។

កាលបរិច្ឆេទនៃការដាក់ និងការទទួលពាក្យសុំចុះឈ្មោះជាអ្នកសង្កេតការណ៍អន្តរជាតិ ចាប់ផ្តើមពីថ្ងៃទី ១ ខែមេសា ឆ្នាំ ២០២៣ និងបញ្ចប់នៅថ្ងៃទី ១៩ ខែកក្កដា ឆ្នាំ ២០២៣។

ការបោះឆ្នោតជ្រើសតាំងតំណាងរាស្ត្រនីតិកាលទី ៧ នៅកម្ពុជា នឹងចាប់ផ្ដើមធ្វើឡើងនៅថ្ងៃទី ២៣ ខែកក្កដា ឆ្នាំ ២០២៣ ខណៈពលរដ្ឋដែលមានបញ្ជីឈ្មោះបោះឆ្នោត ចំនួនជាង ៩ លាននាក់ (៩ ៧០១៦៥៥)៕