ផលពោត​កសិករតាមបណ្តាស្រុកមួយចំនួន​ក្នុង​ខេត្តបាត់ដំបងប្រឈម​ការ​ខូចខាត

នៅរដូវកាលឆ្នាំនេះផលដំណាំពោតរបស់ប្រជាកសិករជាច្រើនហិកតា រងការ​ខូចខាតស្ទើរទាំងស្រុងដោយសារតែកត្តាធម្មជាតិធ្វើឲ្យកសិករខ្លះខាតបង់លុយកាក់ដែលបានខ្ចីបុលពីធនាគារឬឯកជនដូចគ្នាមកប្រកបមុខរបរដំណាំពោធត្រូវបានបរាជ័យទាំងស្រុង ឬស្ទើរទាំងស្រុងដោយសារតែកត្តារាំងស្ងួតខ្វះទឹកភ្លៀង។

លោក ស្រី អុីម ជាកសិករ ក្នុងស្រុកកំរៀងបានឲ្យដឹងថា ដំណាំពោតអ្នកស្រីចំនួន ០៥ ហិកតា តែងតែបានលក់គ្រប់រដូវកាលគ្រាន់បានទប់ទល់ជីវភាពគ្រួសារ តែឆ្នាំនេះរង​ការ​ខូចខាតទាំងអស់ដោយសារខ្វះទឹកភ្លៀង ខណះដែលពោតជិតបានហុចផលហើយក៏មេឃរាំងមិនភ្លៀងធ្វើឲ្យប្រភពដីឡើងកម្តៅ បង្កឲ្យដើមពោតគ្មានសំណើមទើបបង្កឲ្យខូចទាំង​០៥ ហិកតាតែម្តង។

ស្រដៀងគ្នានេះ លោក ផា ជាកសិករ នៅក្នុងស្រុកសំឡូត ក្នុងចំណោមកសិករជាច្រើនទៀតបានលើកឡើងដែរថា ឆ្នាំនេះក៏មិនខុសពីឆ្នាំកន្លងទៅដែរ។ ក្រុមគ្រួសារលោករួមនិងសាច់ញាតិលោកផងរួមគ្នាធ្វើដំណាំពោតលើផ្ទៃដីរួមគ្នាសរុបជាង ២០០ ហិកតា ហើយទទួលបានផលតាមការរំពឹងទុកផងដែរ។ បើទោះបីតម្លៃមានការប្រែប្រួលបន្តិចក៏បាន​ផលពោត​លក់ច្រើនគួសមដែរ។ តែឆ្នាំនេះលោកស្ទើរនិយាយលែងរួច ដោយសារតែខ្វះទឹកធ្វើឲ្យផលដំណាំពោធខូចមួយផ្នែកធំ តែបើសិនជាមានទឹកភ្លៀងធ្លាក់អាចសង្គ្រោះបានឡើងវិញ តែបើប៉ុន្មានថ្ងៃទៀតនេះនៅតែអត់ភ្លៀងលោកហាក់គ្មានក្តីសង្ឃឹមនោះទេ។

មិនខុសគ្នាប៉ុន្មាននោះទេ នៅឯស្រុករតនមណ្ឌល ក៏មានខូចខាតយ៉ាងដំណំដែរ ដោយមន្ត្រីកសិកម្មស្រុកបានឲ្យដឹងថា បញ្ហាគ្រោះធម្មជាតិបានបង្កឲ្យដំណាំពោធរបស់ប្រជាកសិករក្នុងស្រុក រតនមណ្ឌល ខូចខាតចំនួនសរុប ៨៦០ ហិកតា។

បើយោងតាមរបាយការណ៍ពីមន្ទីរកសិកម្មខេត្តស្តីពីដំណាំឧស្សាហកម្មគឹតត្រឹមថ្ងៃទី១៧ខែកក្កដាឆ្នាំ២០២៣ សម្រាប់ដំណាំពោតក្រហមកសិករបានធ្វើការដាំដុះលើផ្ទៃដីសរុប ៧១,៣៥៩ ហិកតាបើប្រៀបធៀបផែនការស្មើ​ចំនួន​៨១.០៩%​នៃផែនការ។

សម្រាប់ផលប៉ះពាល់លើផលដំណាំពោតដែលរងការខូចខាតដោយកត្តារាំងស្ងួតទូទាំងខេត្ត មិនទាន់បានដឹងនៅឡើយនោះទេ។ មន្ត្រីជំនាញបញ្ជាក់ថា តំបន់ខ្លះកសិករបានទទួលផលច្រើនដោយសារតែទឹកភ្លៀងបានធ្លាក់ជោកជាំនៅតាមតំបន់ ខណះតំបន់ខ្លះជួបការរាំងស្ងួតបានអូសបន្លាយពេលទើបបង្កឲ្យដំណាំពោតរួមនិងដំណាំផ្សេងៗខូចខាត៕

អត្ថបទ៖ សៅ សារិទ្ធ