សមត្ថកិច្ចបំភ្លឺពាក់ព័ន្ធបុគ្គលិក កាស៊ីណូមួយកន្លែង ស្រែកសុំអន្តរាគមន៍ចេញពីជាន់ទី៦

(ស្វាយរៀង): ក្រោយពីមានការផ្សព្វផ្សាយ និងរាយការណ៍ពីសំណាក់ប្រជាពលរដ្ឋ កាលពីល្ងាចថ្ងៃទី១៨ ខែកក្កដា ឆ្នាំ២០២៣ថា មានបុគ្គលិកជាច្រើនបានស្រែកសុំអន្តរាគមន៍ចេញពីជាន់ទី៦នៃកាស៊ីណូបារីសបូព៌ា ស្ថិតនៅក្រុង​ស្វាយរៀង សមត្ថកិច្ច ដោយមានការសម្របសម្រួលពីព្រះរាជអាជ្ញា និងអាជ្ញាធរពាក់ព័ន្ធ បានចុះទៅដល់​កន្លែងកើត​ហេតុ ពិនិត្យឃើញមានបុគ្គលិកក្រុមហ៊ុនកាស៊ីណូ ជាជនជាតិវៀតណាម សរុបចំនួន ៣៥នាក់ ស្រី ១០ នាក់ បានប្រមូលផ្តុំគ្នាមិនធ្វើការ នៅអាគារជាន់ទី៦ និងឃើញមានការខូចខាត សម្ភារតុកៅអី និងកុំព្យូទ័រ របស់ក្រុម​ហ៊ុនមួយចំនួនផងដែរ។

បន្ទាប់ពីទៅដល់ទីតាំងកើតហេតុ សមត្ថកិច្ចបានអញ្ជើញបុគ្គលិកជាជនជាតិវៀតណាម ទាំង៣៥នាក់ ខាងលើ ទៅអធិការដ្ឋាននគរបាលក្រុងបាវិត ដើម្បីធ្វើការសាកសួរ ។ ក្រោយពីសមត្ថកិច្ច បានធ្វើការសាកសួរជាបឋម បុគ្គលិកទាំង៣៥នាក់ខាងលើ ពួកគេបានឆ្លើយប្រាប់សមត្ថកិច្ចថា៖ ពួកគេតវ៉ាសុំអន្តរាគមន៍ ពាក់ព័ន្ធទៅនឹងលក្ខខណ្ឌការងារមួយចំនួន ។

បច្ចុប្បន្នបុគ្គលិកទាំង ៣៥នាក់ រួមជាមួយ រដ្ឋបាលក្រុមហ៊ុន ០១នាក់ និងអ្នកគ្រប់គ្រង ០១នាក់ កំពុងត្រូវ​បានសមត្ថកិច្ចជំនាញធ្វើការសាកសួរ  និងបន្តនីតិវិធី នៅអធិការដ្ឋាននគរបាលក្រុងបាវិត៕

អត្ថបទ ៖ ភក្ដី