តើមជ្ឈមណ្ឌលទិន្នន័យជាតិ ផ្តល់ប្រយោជន៍អ្វីខ្លះ​ ដល់វិស័យសាធារណៈ និងឯកជននៅកម្ពុជា?

ក្រសួងប្រៃសណីយ៍​ និងទូរគមនាគមន៍ បើកដ្ឋានសាងសង់មជ្ឈមណ្ឌលផ្ទុកទិន្នន័យជាតិ (National Data Center) កាលពីថ្ងៃទី១៩ កក្កដា ឆ្នាំ ២០២៣ ដែលមានតម្លៃជិត៣០លានដុល្លារអាមេរិក ដើម្បីជំរុញកម្ពុជា ឆ្ពោះទៅបរិវត្ត​កម្មឌីជីថល។

លោក ជា​ វ៉ាន់ដេត រដ្ឋមន្ត្រីក្រសួងប្រៃសណីយ៍​ និងទូរគមនាគមន៍ បានលើកឡើងថា ការកសាងមជ្ឈមណ្ឌលទិន្នន័យ​ជាតិនេះ គឺជាដំណាក់កាលដ៏សំខាន់មួយសម្រាប់វិស័យសាធារណៈនិងឯកជននៅកម្ពុជា ក្នុងការទាញយកផល​ប្រយោជន៍ពីទិន្នន័យ ដើម្បីជំរុញការអភិវឌ្ឍស្ថាប័នរបស់ខ្លួន ព្រមទាំងបង្ហាញពីការបោះជំហានដ៏ធំមួយរបស់កម្ពុជា ឆ្ពោះទៅបរិវត្តកម្មឌីជីថល។

បើតាមលោករដ្ឋមន្រ្តី មជ្ឈមណ្ឌលទិន្នន័យនេះ នឹងក្លាយជាកន្លែងប្រមូលផ្តុំ និងរក្សាទិន្នន័យរបស់រាជរដ្ឋាភិបាល និងទិន្នន័យក្រុម​ហ៊ុនមកពីវិស័យសំខាន់ៗ តាមរយៈការផ្តល់នូវហេដ្ឋារចនាសម្ព័ន្ធបច្ចេកវិទ្យាទំនើបមួយ ដែលមាន​សុវត្ថិភាព និងអាចជឿទុកចិត្តបាន ព្រមទាំងផ្តល់អត្ថប្រយោជន៍ដល់ស្ថាប័ន ដូចជាអធិបតេយ្យភាពទិន្នន័យ សន្សំសំ​ចៃការចំណាយថវិកា និងពង្រឹងសមត្ថភាពនៃការផ្ដល់សេវារបស់ខ្លួនឱ្យកាន់តែល្អប្រសើរ។

សូមបញ្ជាក់ថា មជ្ឈមណ្ឌលទិន្នន័យជាតិនេះ នឹងមានកម្រិតប្រព័ន្ធស្តង់ដារ៤ (Tier IV) ស្ថិតក្នុងអគារថ្មីមានកម្ពស់ ១២ជាន់ ទទឹង ៣៦ម៉ែត្រ និងបណ្តោយ ៦៣ម៉ែត្រ  នៅពីក្រោយអគារទីស្តីការ ក.ប.ទ. បច្ចុប្បន្ន ដែលមានអាសយដ្ឋាន អគារលេខ ១៣ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ ដោយអគារនេះ គ្រោងនឹងបញ្ចប់​ការសាងសង់នៅឆ្នាំ២០២៥៕