ព័ត៌មានជាតិ

ខេត្តមណ្ឌលគិរីបង្កើតសសរស្ដម្ភ ៥ ផែនការរៀបចំដែនដីចក្ខុវិស័យឆ្នាំ២០៤០

បានផុស

២ years មុន

នៅ

ថ្ងៃសៅរ៍ ២២ កក្កដា ២០២៣

ដោយ

ខេត្តមណ្ឌលគិរី គឺជាមជ្ឈមណ្ឌលអភិវឌ្ឍន៍សេដ្ឋកិច្ចបៃតងផ្អែកលើធនធានធម្មជាតិ និងវប្បធម៌សម្បូរបែប។ អាកាសធាតុ ធម្មជាតិ ទេសភាព ទន្លេ ប្រជុំភ្នំ-សមុទ្រ ព្រៃឈើ ដ៏សែនមនោរម្យរបស់ខេត្តបានរួមចំណែកជាចម្បងនៅក្នុងការលើកកម្ពស់ប៉ូលខេត្តនៅភាគឦសាននេះ ស្របតាមការតម្រង់ទិសការគ្រប់គ្រង និងការអភិវឌ្ឍដែនដីដ៏ត្រឹមត្រូវ មានសណ្ដាប់ធ្នាប់និងគុណភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុង «ផែនការរៀបចំដែនដីខេត្តមណ្ឌលគិរី ចក្ខុវិស័យឆ្នាំ២០៤០» បានចង្អុលបង្ហាញពីសសរស្ដម្ភទាំង ៥ របស់ខេត្តមណ្ឌលគិរី។

ពាក់ព័ន្ធទៅនឹងសសរស្ដម្ភទាំង ៥ របស់ខេត្តមណ្ឌលគិរី មានដូចជា៖

១–ការការពារ និងការគ្រប់គ្រងសេវាកម្មអេកូឡូស៊ីរួមគ្នា

ខេត្តមណ្ឌលគិរី មានធនធានធម្មជាតិយ៉ាងសម្បូរបែបដែលផ្ដល់នូវសេវាកម្មធម្មជាតិ សេដ្ឋកិច្ច សង្គម និងវប្បធម៌យ៉ាងច្រើន សុទ្ធសឹងមានសារៈសំខាន់សម្រាប់ការអភិវឌ្ឍខេត្តប្រកបដោយចិរភាព។ ការអភិរក្សព្រៃឈើជាផ្នែកមួយនៃការចូលរួមចំណែករបស់ប្រទេសកម្ពុជាក្នុងការកាត់បន្ថយការប្រែប្រួលអាកាសធាតុ។

២–អេកូ–ទេសចរណ៍ដែលផ្ដល់តម្លៃអត្តសញ្ញាណវប្បធម៌ចម្រុះជនជាតិ និងបរិស្ថានរបស់ខេត្ត

ភាពវិសេសនៃវប្បធម៌ និងបរិស្ថានធម្មជាតិរបស់ខេត្តមណ្ឌលគិរី គឺជាមូលដ្ឋានគ្រឹះដ៏រឹងមាំសម្រាប់ការអភិវឌ្ឍវិស័យទេសចរណ៍។ ភាពចម្រុះនិងសម្បូរបែបនៃព្រៃឈើ ទេសភាពកសិកម្ម ក៏ដូចជាវប្បធម៌ជនជាតិដើមភាគតិចរបស់ខេត្ត គឺជាសម្បត្តិដ៏សំខាន់ និងវិសេសវិសាលសម្រាប់ការអភិវឌ្ឍវិស័យនេះ។

ស្របពេលជាមួយគ្នានេះ ការអភិវឌ្ឍទេសចរណ៍ដោយមានទំនួលខុសត្រូវផ្សារភ្ជាប់នឹងគុណតម្លៃបរិស្ថាន និងវប្បធម៌ប្រពៃណី មានសារៈសំខាន់ដើម្បីថែរក្សាភាពវិសេសគ្មានពីរសម្រាប់ខេត្តមណ្ឌលគិរី។

៣–ការអភិវឌ្ឍកសិកម្មប្រកបដោយនិរន្តរភាពដែលគិតគូរដល់ជីវៈចម្រុះ និងផលប្រយោជន៍កសិករខ្នាតតូច

ការអភិវឌ្ឍដោយយកចិត្តទុកដាក់លើការនាំចេញដែលមានទុនពឹងផ្អែកលើផ្នែកកសិឧស្សាហកម្ម (សម្បទានដីសេដ្ឋកិច្ច និងចម្ការដំណាំឯកជនខ្នាតមធ្យម) និងកសិកម្មខ្នាតតូចជាលក្ខណៈគ្រួសារដែលកំពុងមានកំណើន និងមានសារៈសំខាន់សម្រាប់ខេត្តមណ្ឌលគិរី។ វិស័យទាំងពីរ នឹងវិវត្តរួមគ្នាតាមរយៈភាពជាដៃគូប្រកបដោយទំនួលខុសត្រូវ និងផ្ដល់ផលប្រយោជន៍ទៅវិញទៅមក។ មាគ៌ានេះត្រូវដើរតាមគោលការណ៍ពិពិធកម្មកសិកម្ម តាមបែបធម្មជាតិដែលអនុញ្ញាតឱ្យមានការបង្កើនផលិតកម្ម និងផលិតភាព ការអភិរក្សធនធានធម្មជាតិ ដូចជាដី និងទឹក ព្រមទាំងបង្កើនភាពធន់របស់គ្រួសារ និងជីវភាពកសិករទប់ទល់ពេលអាកាសធាតុមិនទៀងទាត់។ ការពង្រីកផ្ទៃដីកសិកម្មដោយគ្មានផែនការគ្រោងទុកជាមុនត្រូវបញ្ចប់។

ការឆ្លើយតបទៅនឹងបញ្ហាប្រឈមទាំងនេះ ការរីកចម្រើននៃកសិកម្មដែលមានផែនការច្បាស់លាស់ គឺពិតជាមានសារៈសំខាន់ណាស់ក្នុងការតម្រង់ទិស ការអភិវឌ្ឍដែនដី ដើម្បីធានាការអភិវឌ្ឍដោយផ្នែក ឬការអភិវឌ្ឍបន្ថែមនៃផ្ទៃដីកសិកម្មក្នុងតំបន់ការពារធម្មជាតិ និងតំបន់ព្រៃឈើ ដើម្បីធានាបាននូវចិរភាពបរិស្ថាន និងប្រព័ន្ធអេកូឡូស៊ី ដោយមេត្រូវរក្សាស្ថានភាព និងទេសភាព ភូមិសាស្ត្រធម្មជាតិនៃតំបន់ខ្ពង់រាប។ ការលើកកម្ពស់ការអភិវឌ្ឍបៃតង ការអភិវឌ្ឍកសិកម្ម ការបង្កើតរបៀងធម្មជាតិ និងការដាំគម្របព្រៃឡើងវិញនឹងរួមចំណែកដល់ការកាត់បន្ថយការសាយភាយឧស្ម័នផ្ទះកញ្ចក់ និងកម្រិតផល ប៉ះពាល់ចំពោះការប្រែប្រួលអាកាសធាតុ។

៤–មជ្ឈមណ្ឌលប៉ូលអភិវឌ្ឍសេដ្ឋកិច្ចជាតិភាគឦសានប្រកបដោយភាពរស់រវើកផ្សារភ្ជាប់ទៅនឹង សមាហរណកម្មសេដ្ឋកិច្ចក្នុងតំបន់អភិវឌ្ឍន៍ត្រីកោណកម្ពុជា–ឡាវ–វៀតណាម

ខេត្តមណ្ឌលគិរី ជាខេត្តមួយស្ថិតក្នុងតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម ដែលមានសេដ្ឋកិច្ច រស់រវើក និងចូលរួមចំណែកក្នុងកិច្ចខិតខំប្រឹងប្រែងសមាហរណកម្មអភិវឌ្ឍន៍សេដ្ឋកិច្ចក្នុងតំបន់តាមរយៈការផ្តល់ សេវាកម្មដឹកជញ្ជូន ការជំរុញផលិតកម្មកសិឧស្សាហកម្មមានគុណភាពខ្ពស់ ការអភិវឌ្ឍឧស្សាហកម្មធុនស្រាល ផ្អែកលើចំណេះដឹង បច្ចេកវិទ្យា និងនវានុវត្តន៍ ការជំរុញពាណិជ្ជកម្មឌីជីថល និងជាច្រកទ្វារពាណិជ្ជកម្មជាមួយប្រទេសវៀតណាម និងតំបន់។

៥–ការរីកចម្រើននៃនគរោបនីយកម្មដែលផ្តល់តម្លៃលើធម្មជាតិ និងទេសភាព

ក្នុងបរិបទនៃការរីកលូតលាស់នៃសេដ្ឋកិច្ច និងការកើនឡើងនៃអត្រាចំណូលស្រុកខ្ពស់នាពេលអនាគត ចំនួនប្រជាជននៅតាមទីប្រជុំជនក្នុងខេត្តនឹងមានសម្ពាធទាំងលើហេដ្ឋារចនាសម្ព័ន្ធរូបវន្ត លើដី និងលើសេវាកម្ម គ្រប់ប្រភេទ។ ចំពោះស្ថានភាពនេះ មជ្ឈមណ្ឌលទីប្រជុំជនបច្ចុប្បន្ន និងមជ្ឈមណ្ឌលទីប្រជុំជនដែលរីកចម្រើនថ្មីៗ ត្រូវការប្លង់គោលប្រើប្រាស់ដីដ៍ប្រសើរ ដើម្បីបញ្ចៀសពីការរីកដុះដាលនៃទីប្រជុំជនដោយមិនទៅតាមការចង់បាន និងទម្រង់នៃការអភិវឌ្ឍដែលគ្មានផែនការជាមុន។

ការឆ្លើយតបទៅនឹងបញ្ហាប្រឈមទាំងនេះ ការរីកចម្រើននៃនគរោបនីយកម្មដែលមានផែនការច្បាស់លាស់ គឺពិតជាមានសារៈសំខាន់ណាស់ក្នុងការតម្រង់ទិសការអភិវឌ្ឍដែនដី ដើម្បីធានាការអភិវឌ្ឍដោយផ្នែក ឬការអភិវឌ្ឍបន្ថែមនៃមជ្ឈមណ្ឌលទីប្រជុំជន និងការតាំងលំនៅឋានកាន់តែមានគុណភាពរស់នៅកាន់តែប្រសើរ និងមាននិរន្តរភាព ដោយត្រូវរក្សាស្ថានភាព និងទេសភាពភូមិសាស្ត្រនៃតំបន់ខ្ពង់រាប។ ការលើកកម្ពស់ ការអភិវឌ្ឍទីក្រុង ទីប្រជុំជនបៃតងក៏នឹងរួមចំណែកដល់ការកាត់បន្ថយឧស្ម័នផ្ទះកញ្ចក់ និងកម្រិតផលប៉ះពាល់នៃនគរោបនីយកម្មចំពោះការប្រែប្រួលអាកាសធាតុ៕

Related Topics:ខេត្តមណ្ឌលគិរី