ព័ត៌មានជាតិ

សមាជិក សមាជិកា គណបក្សប្រជាជនកម្ពុជាក្រុងខេមរភូមិន្ទ ជាង ៤ ពាន់នាក់ បិទបញ្ចប់យុទ្ធនាការឃោសនារកសំឡេងឆ្នោត នាថ្ងៃនេះ

បានផុស

១ year មុន

នៅ

ថ្ងៃសុក្រ ២១ កក្កដា ២០២៣

ដោយ

សមាជិក សមាជិកា គណបក្សប្រជាជនកម្ពុជាខេត្តកោះកុង ក្រុងខេមរភូមិន្ទ ជាង ៤,០០០ នាក់ បានបិទបញ្ចប់យុទ្ធនាការឃោសនារកសំឡេងឆ្នោតនាថ្ងៃចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រសៀលថ្ងៃទី ២១ ខែកក្កដា ឆ្នាំ ២០២៣ សមាជិក សមាជិកាក្រុងខេមរភូមិន្ទ មកពី ៣ សង្កាត់ បានប្រមូលផ្ដុំគ្នាជួបសំណេះសំណាល និងចេញក្បួនហែឃោសនារកសំឡេងឆ្នោតថ្ងៃចុងក្រោយ សម្រាប់អាណត្តិទី ៧ នេះ។

យុទ្ធនាការនេះដែរ ធ្វើឡើងក្រោមវត្តមានរបស់លោក ប៊ុន លើត និងលោកស្រី មិថុនា ភូថង និងសមាជិក សមាជិកសំខាន់ៗ ជាច្រើនរូបទៀត។ លោក ប៊ុន លើត បានជំរុញឲ្យ សមាជិក សមាជិកា ទៅបោះឆ្នោតជូនគណបក្សប្រជាជនកម្ពុជា លេខរៀងទី ១៨ រូបទេវតាបាចផ្កា ជាសម្គាល់ ដើម្បីសុខសន្តិភាព និងការអភិវឌ្ឍទៅមុខបន្តទៀត ព្រោះថា ជាង ៤០ ឆ្នាំនេះ គណបក្សប្រជាជនកម្ពុជា បានប្រឹងប្រែងយ៉ាងខ្លាំង ទើបឲ្យប្រទេសរីកចម្រើនលើឆាកអន្តរជាតិ។

លោក ប៊ុន លើត និងលោកស្រី មិថុនា ភូថង ប្រកាសជាផ្លូវការទៅកាន់ សមាជិក សមាជិកា គាំទ្រពេញទំហឹងនូវបេក្ខភាព សម្ដេចតេជោ ហ៊ុន សែន ជានាយករដ្ឋមន្ត្រី អាណត្តិទី ៧ បន្ត និងគាំទ្រ ឯកឧត្ដមបណ្ឌិត ហ៊ុន ម៉ាណែត ជាបេក្ខជននាយករដ្ឋមន្ត្រីបន្តវេនទៅថ្ងៃអនាគត។

លោក ប៊ុន លើត ក៏គូសបញ្ជាក់ប្រាប់ដល់សមាជិក សមាជិកា ដែរថា នៅថ្ងៃស្អែក សូមរក្សាភាពស្ងៀមស្ងាត់ឲ្យបានល្អប្រសើរ ដើម្បីត្រៀមទៅបោះឆ្នោតនៅតាមការិយាល័យនីមួយៗ ក្នុងទូទាំងខេត្ត។ មិនត្រូវបង្កភាពមិនសមប្រកបឡើងណាដែលច្បាប់ហាមឃាត់នោះទេ។

យោងតាមបញ្ជីឈ្មោះបោះឆ្នោតក្នុងខេត្តកោះកុង មានពលរដ្ឋជាង ៧ ម៉ឺននាក់ នឹងមានឈ្មោះទៅបោះឆ្នោត។ រីឯគណបក្សនយោបាយចូលរួមប្រកួតប្រជែងចំនួន ១៣ គណបក្ស ការិយាល័យបោះឆ្នោត ១១៩ ការិយាល័យ និងអ្នកសង្កេតការណ៍ជិត ៦០០ នាក់៕

អត្ថបទ ៖ សិរីវឌ្ឍនៈ