ព័ត៌មានជាតិ

ក្រុមប្រឹក្សាជាតិសហជីព អំពាវនាវដល់កម្មករ-និយោជិតទាំងអស់ អញ្ជើញទៅបោះឆ្នោតឲ្យបានគ្រប់គ្នា

បានផុស

២ years មុន

នៅ

ថ្ងៃសុក្រ ២១ កក្កដា ២០២៣

ដោយ

ក្រុមប្រឹក្សាជាតិសហជីព NTUC ដែលជាសហជីពឯករាជ្យមួយ ហើយមានលោក សំ សឿន ជាប្រធាន បានអំពាវនាវដល់សមាជិក-សមាជិកា កម្មករ-និយោជិត និងប្រជាពលរដ្ឋទាំងអស់ អញ្ជើញទៅចូលរួមបោះឆ្នោតជ្រើសតាំង តំណាងរាស្ត្រ នីតិកាលទី ៧ ដែលនឹងប្រព្រឹត្តទៅនៅថ្ងៃទី ២៣ ខែកក្កដា ឆ្នាំ ២០២៣ ឲ្យបានគ្រប់ៗគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្ដីអំពាវនាវរបស់ក្រុមក្រុមប្រឹក្សាជាតិសហជីព បានឲ្យដឹងថា ក្រសួងការងារ និងបណ្តុះបណ្តាលវិជ្ជាជីវៈ ក៏បានអនុញ្ញាតឲ្យកម្មករ-និយោជិត បានឈប់ទៅបោះឆ្នោតចំនួន ៣ថ្ងៃ គឺចាប់ពីថ្ងៃទី ២២ ដល់ថ្ងៃទី ២៤ ខែកក្កដា ឆ្នាំ ២០២៣ ដោយរក្សាប្រាក់ឈ្នួល និងអត្ថប្រយោជន៍ផ្សេងៗជូនកម្មករ-និយោជិត នៅដដែល។

ក្រុមក្រុមប្រឹក្សាជាតិសហជីព ក៏បានលើកឡើងថា «សន្លឹកឆ្នោតរបស់បងប្អូនមួយសន្លឹកៗ គឺពិតជាមានតម្លៃបំផុត ក្នុងការពង្រឹងលទ្ធិប្រជាធិបតេយ្យ ប្រព័ន្ធយុត្តិធម៌ នីតិរដ្ឋ និងយន្តការចរចាដំឡើងប្រាក់ឈ្នួលអប្បបរមា សម្រាប់បងប្អូនកម្មករនិយោជិត ឆ្នាំ ២០២៤ ខាងមុខនេះ និងដើម្បីកែប្រែអនាគតរបស់យើង និងប្រទេសជាតិឆ្ពោះទៅរកការអភិវឌ្ឍន៍ ស្មើមុខស្មើមាត់នឹងប្រទេសជិតខាង និងអន្តរជាតិ គឺតាមរយៈការបោះឆ្នោតនេះហើយ»។

រីឯគណបក្សនយោបាយដែលចូលរួមការបោះឆ្នោត មានចំនួន ១៨គណបក្ស ដូចនេះសមាជិក-សមាជិកា កម្មករ-និយោជិត និងប្រជាពលរដ្ឋទាំងអស់ សូមជ្រើសរើស និងគូសយកបានតែមួយគត់ក្នុងចំណោម ១៨ គណបក្សឲ្យបានត្រឹមត្រូវ តាមការណែនាំរបស់គណៈកម្មាធិការជាតិរៀបចំការបោះឆ្នោត។

ក្រុមក្រុមប្រឹក្សាជាតិសហជីព បានបន្ថែមថា វត្តមាននៃការចូលរួមបោះឆ្នោតរបស់សមាជិក-សមាជិកា កម្មករ-និយោជិត និងប្រជាពលរដ្ឋទាំងអស់ គឺបានឆ្លុះបញ្ចាំងពីមនសិការស្រលាញ់ជាតិ មាតុភូមិរបស់ខ្លួន ស្រលាញ់សុខសន្តិភាព និងកិត្យានុភាពជាតិ។ ក្រុមប្រឹក្សាជាតិសហជីព NTUC សង្ឃឹមជឿជាក់ថា សមាជិក-សមាជិកា កម្មករ-និយោជិត និងប្រជាពលរដ្ឋទាំងអស់ នឹងអញ្ជើញទៅចូលរួមបោះឆ្នោតឲ្យបានគ្រប់ៗគ្នា នៅថ្ងៃទី ២៣ ខែកក្កដា ឆ្នាំ ២០២៣៕