កម្ពុជា នាំចេញទៅថៃកើនឡើង ៦.៥ភាគរយ ក្នុងឆមាសទី១

រយៈពេល៦ខែ ចាប់ពីខែ មករា-មិថុនា ឆ្នាំ ២០២៣ កម្ពុជា បាននាំចេញទៅថៃសម្រេចបានទឹកប្រាក់ប្រមាណជាង ៥២៧លានដុល្លារ កើនឡើង ៦.៥ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២ មានចំនួនជាង ៤៩៥លានដុល្លារ។ ដោយឡែកម្ពុជា នាំចូលពីថៃមកវិញ មានចំនួនជាង ១.៤ពាន់លានដុល្លារ។ នេះ​បើតាម​​អគ្គនាយកដ្ឋាន​គយ និង​រដ្ឋាករ​កម្ពុជា​។

សម្រាប់ខែ មិថុនា ការនាំចេញរបស់កម្ពុជាទៅថៃ បានធ្លាក់ចុះ ១៥.៥ភាគរយ មានទំហំទឹកប្រាក់ជាង ៤៧លានដុល្លារ បើធៀបនឹងឆ្នាំ ២០២២ មានចំនួនជាង ៥៧លានដុល្លារ។

ប្រទេសថៃ មានទំហំពាណិជ្ជកម្មលំដាប់ទី៤ ជាមួយកម្ពុជា បន្ទាប់ពី​ប្រទេស​ចិន អាមេរិក និងវៀតណាម។ នៅក្នុង​ឆមាសទី១ ឆ្នាំ ២០២៣នេះ ទំហំពាណិជ្ជកម្មរវាងប្រទេសទាំងពីរ សម្រេចបានជិត ២ពាន់លានដុល្លារ ថយចុះ ១៤ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២។

 កាលពីចុងឆ្នាំ ២០២២ នាយករដ្ឋមន្ត្រី​ថៃ ​ថ្លែងនៅក្នុង​ជំនួប​ជាមួយ​ឯកអគ្គរាជទូត​កម្ពុជា ថា កម្ពុជា ​និងថៃ​គ្រោង​សម្រេច​ឱ្យបាន​ទំហំពាណិជ្ជកម្ម​ ១៥ពាន់​លាន​ដុល្លារ​នាឆ្នាំ២០២៥​ ខណៈថៃ​ប្រាប់​កម្ពុជា​ថា ​ប្រទេស​ទាំងពីរ​ត្រូវ​ការ​កិច្ច​សហការគ្នាលើវិស័យចំនួន​បន្ថែម​ទៀត។​

សូមបញ្ជាក់ថា ការនាំចេញទំនិញ​សំខាន់ៗ​របស់​កម្ពុជា​ទៅ​ថៃ ​រួម​មាន​ ​សម្លៀកបំពាក់​ ​ផលិតផល​កសិកម្ម​ ​ត្បូង​ និង​វត្ថុធាតុដើម​ ​ខណៈ​ការនាំចូល​មាន​ ​ត្រី សាច់ ភេសជ្ជៈ ជីសរីរាង្គ គ្រឿងសម្អាងគ្រឿងតុបតែងផ្ទះ ឧបករណ៍អេឡិចត្រូនិក រថយន្ត គ្រឿងបន្លាស់ សម្ភារៈការិយាល័យ និងសំណង់ ជាដើម​៕