លោក អ៊ុំ រាត្រី បញ្ជាក់ថា ការបោះឆ្នោតនៅខេត្តបន្ទាយមានជ័យ បានប្រព្រឹត្តទៅដោយរលូនល្អ

លោក អ៊ុំ រាត្រី អភិបាលខេត្តបន្ទាយមានជ័យ បានឲ្យដឹងថា ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ នៅខេត្តបន្ទាយមានជ័យ នាថ្ងៃទី ២៣ ខែកក្កដា ឆ្នាំ ២០២៣នេះ​ មានប្រជាពលរដ្ឋដែលមានឈ្មោះក្នុងបញ្ជីបោះឆ្នោត បាននាំគ្នាចេញពីផ្ទះទាំងព្រលឹមទៅបោះឆ្នោត នៅតាមការិយាល័យបោះឆ្នោតរៀងៗខ្លួន។

លោក អ៊ុំ រាត្រី បានបញ្ជាក់ថា ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ នៅខេត្តបន្ទាយមានជ័យ បានប្រព្រឹត្តទៅដោយរលូនល្អ មិនមានឧបសគ្គរាំងស្ទះឡើយ។

លោក អ៊ុំ រាត្រី បានឲ្យដឹងបន្តថា នៅខេត្តបន្ទាយមានជ័យ មានការិយាល័យបោះឆ្នោតចំនួន ១,១១៩ការិយាល័យ ដែលភាគច្រើននៅក្នុងសាលារៀន និងវត្ត។ ខេត្តបន្ទាយមានជ័យ អាសនៈចំនួន ៦ ហើយការបោះឆ្នោតជ្រើសតាំង តំណាងរាស្រ្ដ នីតិកាលទី ៧នេះ មានគណបក្សនយោបាយចំនួន ១១ បានចុះបញ្ជីចូលរួមប្រកួតប្រជែង។ ប្រជាពលរដ្ឋនៅខេត្តបន្ទាយមានជ័យ ដែលមានឈ្មោះក្នុងបញ្ជីបោះឆ្នោតមានចំនួន ៤៣១,៧៧៥នាក់។

លោក អ៊ុំ រាត្រី បានបញ្ជាក់ទៀតថា គ្រប់មូលដ្ឋានក្រុង ស្រុក ទាំង ៩ នៅក្នុងខេត្តបន្ទាយមានជ័យ បានដំណើរការបោះឆ្នោតទៅដោយមានសន្តិសុខ និងសណ្ដាប់ធ្នាប់ល្អ ហើយមិនមានបញ្ហាអ្វីមួយកើតឡើងនោះឡើយ៕

អត្ថបទ៖ វ៉ាន់ ណាង