លទ្ធផលបណ្តោះអាសន្ន ៖ ខេត្តសៀមរាប CPP ឈ្នះដាច់ចំនួន ១១ ក្រុងស្រុក

លទ្ធផលសំឡេងឆ្នោតបណ្តោះអាសន្ន សម្រាប់ខេត្តសៀមរាប គណបក្សប្រជាជនកម្ពុជា ឈ្នះដាច់១១ក្រុង/ស្រុក តែចាញ់គណបក្សហ្វ៊ុនស៊ិនប៉ិច ១ស្រុក គឺស្រុកបន្ទាយស្រី។

លោក នឹម វ៉ាន់សំ  ប្រធានគណៈកម្មការរៀបចំការបោះឆ្នោតខេត្ត បានឲ្យដឹងថា គណៈកម្មការរៀបចំការបោះឆ្នោតខេត្ត មានមន្ត្រីការិយាល័យបោះឆ្នោត សរុបចំនួន ៩១២៦នាក់  សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ខេត្តសៀមរាប  និងអ្នកមានឈ្មោះក្នុងបញ្ជីបោះឆ្នោតចំនួន ៦១៨៨៣៥នាក់  មានការិយាល័យបោះឆ្នោត ចំនួន ១៥២១ការិយាល័យ មានអ្នកសង្កេតការណ៍ជាតិ ,សមាគម និងអង្គការ សរុប ៦៦៧៨នាក់ ស្រីចំនួន ៥ពាន់១៤នាក់  និង មានគណបក្សនយោបាយឈរឈ្មោះចំនួន១៤ មានបេក្ខជនសរុប ១៦៨នាក់ ស្រី ៧១នាក់ និង កម្លាំងសន្តិសុខ មានចំនួនសរុប ៤ពាន់នាក់ ទាំងនគរបាល និង ប្រជាការពារ ។  

លោកបានបញ្ជាក់ទៀតថា ក្នុងព្រឹត្តិការណ៍នៃការបោះឆ្នោតជ្រើសតាំងតំណាងរាស្ត្រ  នីតិកាលទី៧ ឆ្នាំ២០២៣នេះ  ដែលបានចាប់ដំណើរការពីម៉ោង៧,០០នាទី មកដល់ម៉ោង១៥,០០នាទី បានដំណើរការទៅដោយរលូន នៅតាមកា​រិយាល័យនិមួយៗ  ដែលមានប្រជាពលរដ្ឋទូទាំងខេត្ត បានអញ្ជើញមកចូលរួមធ្វើការបោះឆ្នោតស្មើ ៧៩,៧០ %  មកដល់ពេលបញ្ចប់ការបោះឆ្នោតនៅតាមការិយាល័យទូទាំងខេត្ត។

សូមបញ្ជាក់ថា ប្រជាពលរដ្ឋទូទាំងប្រទេសកម្ពុជា បានអញ្ជើញទៅបោះឆ្នោតជ្រើសតាំងតំណាងរាស្ត្រ នីតិកាលទី៧ និយាយដោយឡែក ប្រជាពលរដ្ឋខេត្តសៀមរាប  ក៏បានអញ្ជើញទៅបំពេញកាតព្វកិច្ចរបស់ខ្លួនជាពលរដ្ឋ ក្នុងការ​បញ្ចេញនូវសិទ្ធិលទ្ធិប្រជាធិបតេយ្យ សេរី  ពហុបក្ស គោរពសិទ្ធិមនុស្ស ក្នុងការបោះឆ្នោត​ដែលប្រព្រឹត្តិទៅ​នៅព្រឹក​ថ្ងៃទី២៣ ខែកក្កដា ឆ្នាំ២០២៣៕