ខេត្តសៀមរាប CPP ឈ្នះដាច់ស្ទើរ ១២ ក្រុង/ស្រុក

លទ្ធផលសំឡេងឆ្នោតបណ្តោះអាសន្ន សម្រាប់ខេត្តសៀមរាប គណបក្សប្រជាជនកម្ពុជា ឈ្នះស្ទើរដាច់ ១២ក្រុង/ស្រុក ខណៈគណបក្សហ្វ៊ុនស៊ិនប៉ិច អាចនឹងទទួលបានសំឡេងបន្តិចបន្តួចប៉ុណ្ណោះ។ ទោះជាយ៉ាងណា​ក្តីលោកបញ្ជាក់​ទៀតថា នេះជា​លទ្ធផល​សំឡេងឆ្នោតបណ្តោះអាសន្ន ប៉ុណ្ណោះ ហើយនៅពេលដែលរាប់សន្លឹកឆ្នោតរួចនឹងផ្តល់​ព័ត៌មានបន្ថែមទៀត។

លោក នឹម វ៉ាន់សំ  ប្រធានគណៈកម្មការរៀបចំការបោះឆ្នោតខេត្ត បានឲ្យដឹងថា គណៈកម្មការរៀបចំការបោះឆ្នោតខេត្ត មានមន្ត្រីការិយាល័យបោះឆ្នោត សរុបចំនួន ៩១២៦នាក់  សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ខេត្តសៀមរាប  និងអ្នកមានឈ្មោះក្នុងបញ្ជីបោះឆ្នោតចំនួន ៦១៨៨៣៥នាក់  មានការិយាល័យបោះឆ្នោត ចំនួន ១៥២១ការិយាល័យ មានអ្នកសង្កេតការណ៍ជាតិ ,សមាគម និងអង្គការ សរុប ៦៦៧៨នាក់ ស្រីចំនួន ៥ពាន់១៤នាក់  និង មានគណបក្សនយោបាយឈរឈ្មោះចំនួន១៤ មានបេក្ខជនសរុប ១៦៨នាក់ ស្រី ៧១នាក់ និង កម្លាំងសន្តិសុខ មានចំនួនសរុប ៤ពាន់នាក់ ទាំងនគរបាល និង ប្រជាការពារ ។ 

លោកបានបញ្ជាក់ទៀតថា ក្នុងព្រឹត្តិការណ៍នៃការបោះឆ្នោតជ្រើសតាំងតំណាងរាស្ត្រ  នីតិកាលទី៧ ឆ្នាំ២០២៣នេះ  ដែលបានចាប់ដំណើរការពីម៉ោង៧,០០នាទី មកដល់ម៉ោង១៥,០០នាទី បានដំណើរការទៅដោយរលូន នៅតាម​ការិយាល័យនិមួយៗ  ដែលមានប្រជាពលរដ្ឋទូទាំងខេត្ត បានអញ្ជើញមកចូលរួមធ្វើការបោះឆ្នោតស្មើ ៧៩,៧០ %  មកដល់ពេលបញ្ចប់ការបោះឆ្នោតនៅតាមការិយាល័យទូទាំងខេត្ត៕