​អ្នកនាំពាក្យឱ្យអាជ្ញាធរ និងពលរដ្ឋត្រៀមខ្លួនប្រឈម​នឹងការប្រែប្រួលអាកាសធាតុ​ពិសេសគ្រោះរាំងស្ងួត

អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានអំពាវនាវដល់អាជ្ញាធរមូលដ្ឋាន និងប្រជាពលរដ្ឋ​តាមដានព័ត៌មានស្តីពីអាកាសធាតុជាប់ជាប្រចាំ ដើម្បីត្រៀមលក្ខណៈឆ្លើយ​តបអន្តរាគមន៍ឱ្យបានទាន់ពេលវេលា។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍​នៅព្រឹក​ថ្ងៃទី២៥កក្កដានេះថា អាជ្ញាធរ និងប្រជាពលរដ្ឋសូមយកចិត្តទុកដាក់តាមដានព័ត៌មានស្តីពីអាកាសធាតុ និងមុខ​សញ្ញាគ្រោះថ្នាក់ផ្សេងៗជាប់ជាប្រចាំដើម្បីត្រៀមរៀបចំផែនការ និងត្រៀមលក្ខណៈឆ្លើយតបអន្តរាគមន៍​ឱ្យបានទាន់​ពេលវេលាពិសេសគ្រោះរាំងស្ងួត គ្រោះទឹកជំនន់ និងជំនន់ទឹកភ្លៀងដែលអាចកើតឡើង​ជាយថាហេតុនៅក្នុង​រដូវភ្លៀងធ្លាក់នេះ។

ជាមួយគ្នានេះដែរប្រជាកសិករត្រួវចេះសន្សំសំចៃទឹកទុកសម្រាប់ប្រើប្រាស់ ព្រោះថានៅឆ្នាំ២០២៣នេះ កម្ពុជាអាច​ប្រ​ឈម​នឹងគ្រោះរាំងស្ងួតធ្ងន់ធ្ងរក្នុងក្របខណ្ឌនៅទូទាំងប្រទេសដោយសារបរិមាណទឹកភ្លៀងក្រោមមធ្យមភាគប្រចាំឆ្នាំ ដែលបណ្តាលមកពីបាតុភូតអ៊ែលនីណូ។

លោកបានបន្តទៀតថា កន្លងមកកម្ពុជា ទទួលបរិមាណទឹកភ្លៀងច្រើនលើសលប់ពេញមួយឆ្នាំ ប៉ុន្តែឆ្នាំនេះ តាមការ​ព្យាករ​របស់​ក្រសួងជំនាញបរិមាណទឹកភ្លៀងនឹងទទួលបានក្រោមមធ្យមភាគប្រចាំឆ្នាំ ដោយសារឥទ្ធិពលបាតុភូត អ៊ែលនីណូ ចាប់ពីខែកម្ភៈរហូតដល់ខែវិច្ឆិកា ដែលនេះជាលើកទី២ហើយ បន្ទាប់ពីឆ្នាំ២០១៦ បង្កឱ្យមាន​ការខ្វះ​ខាតទឹកធ្ងន់ធ្ងរក្នុងក្របខណ្ឌទូទាំងប្រទេស។

ទោះយ៉ាងណា លោក សុទ្ធ គឹមកុលមុនី បានបន្ថែមថា គណៈកម្មាធិការជាតិគ្រប់គ្រងគ្រោះ​មហន្តរាយបានធ្វើការសម្រប​សម្រួល និងសហការជាមួយក្រសួងស្ថាប័នពាក់ព័ន្ធជំនាញក្នុងការរៀបចំអន្តរាគមន៍ហេតុការណ៍គ្រោះមហន្តរាយនានា ដូចជាទឹកជំនន់ គ្រោះអគ្គិភ័យ គ្រោះរាំងស្ងួត និងការបាក់រលំអគារ និងត្រៀមស្បៀងបម្រុង ដូចជា ស្រូវពូជ និងស្បៀង​សម្រាប់ការដាំដុះ និងស្តាឡើងវិញដោយសារការខូចខាតបណ្តាលមកពីគ្រោះរាំងស្ងួតឬទឹកជំនន់ជាដើម។

យោងតាមសេចក្តីជូនដំណឹងរបស់ក្រសួងធនធានទឹកនិងឧតនិយមចុះនៅព្រឹកថ្ងៃទី ២៥ កក្កដានេះ បានឱ្យដឹងថា ចាប់ពី​ថ្ងៃទី ២៦ ខែកក្កដារហូតដល់ថ្ងៃទី ១ ខែសីហា ឆ្នាំ២០២៣កម្ពុជាអាចនឹងមានភ្លៀងធ្លាក់ក្នុងកម្រិតពីបង្គួរទៅច្រើន លាយ​ឡំដោយផ្គរ រន្ទះ និងខ្យល់កន្ត្រាក់ពិសេសនៅតំបន់មាត់សមុទ្រអាចនឹងមានភ្លៀងធ្លាក់ច្រើន ហើយនៅលើផ្ទៃសមុទ្រ​នឹង​មាន​ខ្យល់​បក់បោកខ្លាំង ព្រមទាំងរលកសមុទ្រមានកម្ពស់ខ្ពស់ទៀតផង៕

អត្ថបទ៖ សំអឿន