សម្ដេចតេជោ ហ៊ុន សែន លើកពេលជួបកម្មករ ទៅក្រោយពេលមាននាយករដ្ឋមន្ត្រីថ្មី

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា ការចុះជួបសំណេះសំណាល និងសួរសុខទុក្ខកម្មករ-កម្មការិនី នឹងត្រូវលើកពេលទៅជួបនៅក្រោយការបង្កើតដ្ឋាភិបាលថ្មី ដែលនឹងអាចមានលទ្ធភាពខ្ពស់បំផុត មាននាយករដ្ឋមន្ត្រីថ្មី នឹងចុះទៅសួរសុខទុក្ខ។

តាមរយៈសារជាសំឡេងផ្ញើជូនកម្មករ-កម្មការិនី នៅព្រឹកថ្ងៃទី ២៦ ខែកក្កដានេះ សម្ដេចតេជោ ហ៊ុន សែន មានប្រសាសន៍ថា កាលពីចុះជួបកម្មករ-កម្មការិនីនៅតាមបណ្ដារោងចក្រ មុនពេលបោះឆ្នោត គឺសម្ដេចបានសន្យាជាមួយកម្មករ-កម្មការិនីថា បន្ទាប់ពីការបោះឆ្នោតបានបញ្ចប់ គឺនៅត្រឹមថ្ងៃទី ២៧ ខែកក្កដា ឆ្នាំ ២០២៣ សម្ដេច នឹងចាប់ផ្ដើមចុះសួរសុខទុក្ខបន្តទៀតនៅ ១០គោលដៅ ទាំងនៅរាជធានីភ្នំពេញ និងតាមបណ្ដាខេត្តផងដែរ។

ប៉ុន្តែដោយសារតែបញ្ហាកត្តាពេលវេលា​ និងកត្តាទិដ្ឋភាពនៃការរៀបចំរាជរដ្ឋាភិបាលថ្មី គឺកិច្ចការនេះ សម្ដេចសូមអភ័យទោស ចំពោះកម្មករ-កម្មការិនីទាំងអស់ ដែលបានមិនចុះសួរសុខទុក្ខតាមការសន្យា។ តែយ៉ាងណាក៏ដោយ ការចុះជួបសួរសុខទុក្ខនេះ នឹងត្រូវធ្វើឡើងនៅក្រោយការបង្កើតរាជរដ្ឋាភិបាលថ្មី។

សម្ដេចតេជោ ហ៊ុន សែន បានបញ្ជាក់ថា «ព្រោះថា ឥឡូវនេះស្ថិតនៅក្នុងដំណាក់កាលនៃរាជរដ្ឋាភិបាលចាំផ្ទះ ខ្ញុំចង់ឲ្យអ្វីបានកើតឡើងនូវដំណាក់កាលនៃរាជរដ្ឋាភិបាលថ្មី ដែលនឹងត្រូវទៅជួបចំពោះក្មួយៗកូនៗចៅៗ ជាកម្មករ-កម្មការិនីទាំងអស់ ដូច្នេះសូមបញ្ជាក់ឡើងវិញថា យើងនឹងជួបគ្នានៅក្រោយការបង្កើតរាជរដ្ឋាភិបាលថ្មី ដែលនឹងអាចមានលទ្ធភាពខ្ពស់បំផុតមាននាយករដ្ឋមន្ត្រីថ្មី នឹងទៅសួរសុខទុក្ខ ចំពោះកម្មករ-កម្មការិនីរបស់យើង ជំនួសនាយករដ្ឋមន្ត្រីចាស់ ដែលនេះគឺជាលទ្ធភាពនៃការកើតឡើងនៃរាជរដ្ឋាភិបាលថ្មី ដែលមានទាំងនាយករដ្ឋមន្ត្រីថ្មី»។

សម្ដេចតេជោ ហ៊ុន សែន ក៏បានបញ្ជាក់ទៀតថា សម្ដេច មិនទៅណានោះទេ ដោយសម្ដេច នឹងបកស្រាយរឿងនេះ នៅថ្ងៃទី ៣ ខែសីហាខាងមុខនេះ នៅក្នុងពេលសម្ពោធផ្លូវក្រវ៉ាត់ក្រុង៕