លោក ម៉ែន វិបុល ដាក់ចេញទិសដៅសំខាន់៤ចំណុច ពង្រឹងការងារខេត្តស្វាយរៀង

លោក ម៉ែន វិបុល អភិបាលខេត្តស្វាយរៀង បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារប្រចាំខែកក្កដា និងលើកទិសដៅការងារខែសីហា ឆ្នាំ២០២៣ របស់រដ្ឋបាលខេត្តស្វាយរៀង កាលពីថ្ងៃទី២៦ ខែកក្កដា ឆ្នាំ២០២៣។

ថ្លែងនៅក្នុងកិច្ចប្រជុំនេះ លោក ម៉ែន វិបុល បានដាក់ចេញទិសដៅសំខាន់ៗមួយចំនួនដូចខាងក្រោម៖

១.ត្រូវបន្តយកចិត្តទុកដាក់លើការថែរក្សាសន្តិសុខ សណ្តាប់ធ្នាប់សង្គម និងសុវត្ថិភាពនៅក្នុងខេត្តជូន​ប្រជាពលរដ្ឋឲ្យបានល្អប្រសើរ។

២.អាជ្ញាធរគ្រប់លំដាប់ថ្នាក់ ត្រូវពង្រឹងការទប់ស្កាត់ការជួញដូរចែកចាយ និងប្រើប្រាស់គ្រឿងញៀននៅតាម​មូលដ្ឋានឱ្យមានប្រសិទ្ធភាព។

៣.សមត្ថកិច្ចពាក់ព័ន្ធត្រូវបន្តបង្កើនការផ្សព្វផ្សាយច្បាប់ចរាចរណ៍ផ្លូវគោក និងរឹតបន្តឹងការអនុវត្តច្បាប់ ជាពិសេសជំរុញ​ការពាក់មួកសុវត្ថិភាព និងការរៀបស្លាកសញ្ញាចរាចរណ៍ឱ្យបានគ្រប់គ្រាន់នៅតាមដងផ្លូវ។

៤.អាជ្ញាធរក្រុង ស្រុក ត្រូវពិនិត្យ និងខិតខំដោះស្រាយបញ្ហាទំនាស់នានារបស់បងប្អូនប្រជាពលរដ្ឋឱ្យអស់ពី​លទ្ធភាពនៅក្រៅ​ប្រព័ន្ធតុលាការ។

ជាមួយគ្នានេះ លោក ម៉ែន វិបុល អភិបាលខេត្ត បានថ្លែងនូវការអរគុណចំពោះអាជ្ញាធរ និងកងកម្លាំងពាក់ព័ន្ធទាំងអស់ ដែលបានសហការគ្នាជាមួយគណៈកម្មការជាតិរៀបចំការបោះឆ្នោត ក្នុងការការពារសន្តិសុខសណ្តាប់ធ្នាប់ក្នុងថ្ងៃបោះ​ឆ្នោត​ជ្រើសតាំងតំណាងរាស្រ្តនិតិកាលទី៧  នាពេលកន្លងទៅថ្មីៗនេះ៕

ដោយ:ភក្ដី