មន្ត្រីនាំពាក្យធនធានទឹក៖ កម្ពស់ទឹកន្លេមេគង្គកើនឡើងដោយសារ​ឥទ្ធិពល អេលនីណូ

មន្ត្រីក្រសួងធនធានទឹក និងឧតុនិយមនៅថ្ងៃទី ២៧ ខែកក្កដា នេះបានឱ្យដឹងថា ទឹកជំនន់​ទន្លេ​មេគង្គ​នៅឆ្នាំនេះស្ថិតនៅក្នុងកម្រិតទាប​ ដែលជាជំនន់តូច កម្ពស់ទឹកដែលកើនឡើង​នាប៉ុន្មាន​ថ្ងៃនេះ ដោយសារតែឥទ្ធិពល អេលនីណូ (El Nino) ដែលកំពុងគ្របដណ្ដប់នៅក្នុងតំបន់ និងប្រ​ទេសកម្ពុជា។​

​លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមបានបញ្ជាក់ថា​បច្ចុប្បន្នកម្ពស់​ទឹកទន្លេ​មានការកើនឡើងបន្តិច​ ប៉ុន្តែបើប្រៀបធៀបនឹងកម្ពស់កម្រិតមធ្យម ជាមួយនឹងឆ្នាំកន្លងទៅ កម្ពស់ទឹក​នៅមានកម្រិតទាបនៅឡើយ។

​លោកថា រយៈពេលប៉ុន្មានថ្ងៃនេះ មានការកើនឡើងសន្សឹមៗ ប៉ុន្តែស្ថានភាពបែបនេះ វានឹងស្រកចុះវិញ​នៅប៉ុន្មានថ្ងៃខាងមុខនេះ។ បច្ចុប្បន្នស្ថានីយជលសាស្ត្របាសាក់-ចតុមុខទើបតែមានកម្ពស់ជាង ៣ ម៉ែត្រ ដែលទាបជាងឆ្នាំមុនជាង ១ ម៉ែត្រ។

​បើតាមលោកចាន់ យុត្ថា ជាទូរទៅ កំឡុងពាក់កណ្ដាលខែ កក្កដា ទឹកជំនន់ត្រូវឡើងធំម្ដងហើយ ​ឆ្នាំខ្លះអាចមានកម្ពស់ ៨ ម៉ែត្រ នៅស្ថានីយជលសាស្ត្របាសាក់-ចតុមុខប៉ុន្តែឥឡូវទើបតែបានជាង ៣ ម៉ែត្រ​។ ចំណែកអតិបរិមាលើកទី២ ​កើនឡើងចន្លោះខែ កញ្ញា និងខែតុលា ដែលទឹកអាចកើនឡើង។

ក្រសួងធនធានទឹក និងឧតុនិយមបានព្យាករណ៍កន្លងមកថា កម្ពស់ទឹកជំនន់ទន្លេមេគង្គនៅឆ្នាំនេះ មានលក្ខណៈតូច ហើយនៅស្ថានីយជលសាស្ត្របាសាក់-ចតុមុខទឹកអាចមានកម្ពស់ ៨,៣៥ ម៉ែត្រ ដែលទាបជាងឆ្នាំកន្លងទៅដែលមានរហូតដល់ ៩,៦៥ ម៉ែត្រ។

តាមការព្យាករណ៍របស់ក្រសួងធនធានទឹក និងឧតុនិយមចេញផ្សាយនៅថ្ងៃទី ២៧ ខែកក្កដានេះ បង្ហាញថា ទន្លេមេគង្គ-ស្ទឹងត្រែងមានកម្ពស់ ៦,៥៦ ម៉ែត្រ។ ទន្លេមមេគង្គ-ក្រចេះ ទឹកមានកម្ពស់ ១៤,៨៨ ម៉ែត្រ។ ទន្លេមេគង្គ-កំពង់ចាម ទឹកមានកម្ពស់ ៨,០៦ ម៉ែត្រ។ ទន្លេបាសាក់-ចតុមុខ ទឹកមានកម្ពស់ ៤,៣៩ ម៉ែត្រ។ ទន្លេមេគង្គ-អ្នកលឿង មានកម្ពស់ ៣,១១ ម៉ែត្រ។ អ្នកនាំពាក្យអះអាងថា កម្ពស់ទឹកនៅតាមស្ថានីយជលសាស្ត្រខាងលើ នៅទាបជាងមធ្យមច្រើនឆ្នាំ៕