សម្ដេចតេជោ ហ៊ុន សែន បញ្ជាក់ទៅកាន់លោក លី ឈាង នាយករដ្ឋមន្ត្រីចិន អំពីការប្តេជ្ញាចិត្តដ៏មុតមាំក្នុងការធ្វើការជិតស្និទ្ធជាមួយគ្នា

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ទៅកាន់លោក លី ឈាង នាយករដ្ឋមន្ត្រីចិន អំពីការ ប្តេជ្ញាចិត្តដ៏មុតមាំក្នុងការធ្វើការជិតស្និទ្ធជាមួយគ្នា ដើម្បីពន្លឿនកិច្ចប្រឹងប្រែងរួមគ្នាកសាងសហគមន៍វាសនារួមកម្ពុជា-ចិន។

ការបញ្ជាក់នេះ គឺតាមរយៈសារលិខិតថ្លែងអំណរគុណរបស់សម្ដេចតេជោ ហ៊ុន សែន ជូនចំពោះលោក លី ឈាង បន្ទាប់ ពីលោក លី ឈាង បានផ្ញើសារលិខិតអបអរសាទរចំពោះជ័យជំនះ របស់គណបក្សប្រជាជនកម្ពុជា ក្នុងការបោះឆ្នោតជ្រើសតាំង តំណាងរាស្ត្រ នីតិកាលទី ៧ កាលពីថ្ងៃទី ២៣ ខែកក្កដា ឆ្នាំ ២០២៣ថ្មីៗនេះ។

សារលិខិតរបស់សម្ដេចតេជោ ហ៊ុន សែន កាលពីថ្ងៃទី ២៦ ខែកក្កដា ឆ្នាំ ២០២៣ បានសរសេរថា សម្ដេច ថ្លែងអំណរគុណយ៉ាងក្រៃលែងជូនលោក លី ឈាង សម្រាប់ការអបអរសាទរយ៉ាងកក់ក្ដៅចំពោះជ័យជំនះរបស់គណបក្សប្រជាជនកម្ពុជា នៅក្នុងការបោះឆ្នោតជ្រើសតាំង តំណាងរាស្ត្រ នីតិកាលទី ៧ ឆ្នាំ ២០២៣ ដែលបានប្រព្រឹត្តទៅកាលពីថ្ងៃទី ២៣ ខែកក្កដា ឆ្នាំ ២០២៣ និងការវាយតម្លៃខ្ពស់ចំពោះសមិទ្ធផលក្នុងប្រទេសកម្ពុជា នាឆ្នាំកន្លងមក ក្រោមការដឹកនាំរបស់សម្ដេច។

តាមរយៈសារលិខិតនេះ សម្ដេចតេជោ ហ៊ុន សែន បានសរសេរបន្តថា សម្ដេច ពិតជាមានសេចក្តីរីករាយយ៉ាងខ្លាំង ដោយមើលឃើញថា ទំនាក់ទំនងដ៏យូរលង់ និងកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន បន្តរីកចម្រើនទៅមុខ និងបានវិវឌ្ឍទៅជាមិត្តភាពដែកថែប។

សម្ដេចតេជោ ហ៊ុន សែន បានបញ្ជាក់ថា «សូមធានាចំពោះឯកឧត្តមថា នៅក្នុងរដ្ឋាភិបាលអាណត្តិថ្មីនេះ គោលនយោ បាយរបស់កម្ពុជាចំពោះប្រទេសចិន គឺមិនផ្លាស់ប្តូរឡើយ ដោយផ្អែកលើមិត្តភាពជាប្រពៃណី ការជឿជាក់គ្នាទៅវិញទៅ មក និងកិច្ចសហប្រតិបត្តិការឈ្នះ-ឈ្នះ»។

ដោយប្រទេសទាំងពីរ កំពុងប្រារព្ធខួបអនុស្សាវរីយ៍លើកទី ៦៥ នៃការបង្កើតទំនាក់ទំនងការទូត និងឆ្នាំមិត្តភាពកម្ពុជា-ចិន សម្ដេចតេជោ ហ៊ុន សែន បានបញ្ជាក់ជាថ្មីអំពីការប្តេជ្ញាចិត្តដ៏មុតមាំ ក្នុងការធ្វើការជិតស្និទ្ធជាមួយលោក លី ឈាង ដើម្បីពន្លឿនកិច្ចប្រឹងប្រែងរួមគ្នាកសាងសហគមន៍វាសនារួមកម្ពុជា-ចិន ប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់ ព្រមទាំងជំរុញកិច្ចសហប្រតិបត្តិការត្បូងពេជ្រកម្ពុជា-ចិន ដើម្បីជាផលប្រយោជន៍ទៅវិញទៅមកសម្រាប់ប្រជាជន និងប្រទេសទាំងពីរ ដែលរួមចំណែកដល់សន្តិភាព ស្ថិរភាព និងវិបុលភាពក្នុងតំបន់ និងពិភពលោក៕