ព័ត៌មានជាតិ

កម្ពុជាលើកគោលនយោបាយជាតិ ៦ ចំណុចក្នុងកិច្ចប្រជុំថ្នាក់រដ្ឋមន្រ្តីអាស៊ាន ពីការអប់រំកុមារតូច

បានផុស

១ year មុន

នៅ

ថ្ងៃព្រហស្បតិ៍ ២៧ កក្កដា ២០២៣

ដោយ

លោក អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា នៅក្នុងកិច្ចពិភាក្សាកម្រិតគោលនយោបាយថ្នាក់រដ្ឋមន្ត្រីអប់រំអាស៊ានស្តីពីការគាំពារ និងការអប់រំកុមារតូចនាទីក្រុងហ្សាកាតា សាធារណរដ្ឋឥណ្ឌូនេស៊ី ថ្ងៃទី២៦ ខែកក្កដា ម្សិលមិញនេះ បានគូសបញ្ជាក់អំពីគោលនយោបាយជាតិ ៦ ចំណុច ដើម្បីគាំពារនិងអភិវឌ្ឍកុមារតូច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ុម រម្សណី មានប្រសាសន៍ពាក់ព័ន្ធទៅនឹងយុទ្ធសាស្រ្តអាទិភាពនៃគោលនយោបាយជាតិ ស្តីពីការគាំពារ និងអភិវឌ្ឍកុមារតូចនេះ រៀបចំឡើងដើម្បីជំរុញបរិវត្ត កម្មការគាំពារ និងអភិវឌ្ឍ ព្រមទាំងអាចផ្ដល់ការអភិវឌ្ឍពេញលេញដល់កុមារតូចផងដែរ។

ជាក់ស្ដែង គោលនយោបាយជាតិទាំង ៦ ចំណុចរួមមាន ១. ការផ្តល់សេវាថែទាំ និងសេវាអប់រំសុខភាព ព្រមទាំងអាហារូបត្ថម្ភដល់ស្ត្រីមានផ្ទៃពោះ ២. ការផ្តល់ដល់កុមារតូច ការថែទាំ ពិនិត្យសុខភាពជាប្រចាំ ផ្តល់ថ្នាំបង្ការអាហារូបត្ថម្ភគ្រប់គ្រាន់ និងទទួលបានការហាត់រៀនពីដំបូង ៣. ការផ្តល់ការគាំទ្រដល់កុមារតូចទាំងអស់នូវការត្រៀមលក្ខណៈជាស្រេចដើម្បីចូលរៀនថ្នាក់ទី១ នៅអាយុ ៦ ឆ្នាំ ៤. ការបណ្ដុះបណ្ដាល និងការអប់រំបុគ្គលិកបច្ចេកទេសអ្នកថែទាំងកុមារតូច មាតាបិតា និង អាណាព្យាបាលឱ្យមានចំណេះដឹងគ្រប់គ្រាន់លើការគាំពារ និងអភិវឌ្ឍន៍កុមារតូច ៥. ការលើកកម្ពស់កិច្ចសហការគ្នាយ៉ាងជិតស្និទ្ធរវាងគ្រប់ស្ថាប័ន និងតួអង្គពាក់ព័ន្ធទាំងអស់លើការគាំពារ និងអភិវឌ្ឍន៍កុមារតូច និង៦. ការបង្កើនសេវាថែទាំព្យាបាលជំងឺសុខភាព និងផ្តល់អាហារូបត្ថម្ភ ដល់ កុមារតូចចាប់ពីពេលកើតដល់អាយុ ៣ឆ្នាំ។

គួរបញ្ជាក់បន្ថែមថា នៅក្នុងកិច្ចពិភាក្សាកម្រិតនយោបាយនោះដែរ រដ្ឋមន្ត្រីអប់រំអាស៊ានបានចេញសេចក្តីថ្លែងការណ៍រួមស្តីពីការគាំពារ និងការអប់រំ កុមារតូចនៅក្នុងតំបន់អាស៊ីអាគ្នេយ៍ ដែលបញ្ជាក់អំពីការប្តេជ្ញាចិត្តខ្ពស់ក្នុងការបង្កើនការវិនិយោគ និងកិច្ចសហការ យ៉ាងជិតស្និទ្ធលើការគាំពារ និងអប់រំកុមារតូចនៅកម្រិតជាតិនិងកម្រិតតំបន់អាស៊ានដើម្បី ផ្តល់ការអភិវឌ្ឍពេញលេញដល់កុមារតូច៕