សម្ដេចតេជោ ហ៊ុន សែន ៖ គណបក្សប្រជាជនឈ្នះ គឺខ្មែរឈ្នះទាំងអស់គ្នា

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា លើកឡើងថា គណបក្សប្រជាជនកម្ពុជា ឈ្នះការបោះឆ្នោត គឺខ្មែរឈ្នះទាំងអស់គ្នា ហើយគណបក្សនយោបាយនានា ក៏អាចរួមរស់ក្រោមម្លប់សន្តិភាពបានទាំងអស់គ្នា។

ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ កាលពីថ្ងៃទី ២៣ ខែកក្កដា ឆ្នាំ ២០២៣កន្លងទៅនេះ តាមលទ្ធផលក្រៅផ្លូវការបានបង្ហាញថា គណបក្សប្រជាជនកម្ពុជា បានបន្តឈ្នះការបោះឆ្នោតនេះ ដោយនឹងទទួលបានអាសនៈក្នុងរដ្ឋសភាប្រមាណ ១២០លើ១២៥អាសនៈ។

សម្ដេចតេជោ ហ៊ុន សែន នៅរសៀលថ្ងៃទី ២៨ ខែកក្កដានេះ បានបង្ហោះសារនៅលើបណ្ដាញសង្គមតេលេក្រាមថា ច្បាស់ណាស់ គឺនៅពេលដ៏ខ្លីខាងមុខនេះ កម្ពុជានឹងមាននាយករដ្ឋមន្រ្តីថ្មី បន្ដដឹកនាំប្រទេស ដើម្បីបម្រើផលប្រយោជន៍ប្រជាពលរដ្ឋជាម្ចាស់ឆ្នោត។

សម្ដេចតេជោ ហ៊ុន សែន សរសេរបន្តថា «គណបក្សប្រជាជនឈ្នះ គឺខ្មែរឈ្នះទាំងអស់គ្នា ហើយគណបក្សនានា ក៏អាចរួមរស់ក្រោមម្លប់សន្តិភាពបានទាំងអស់គ្នា»។

សម្ដេចតេជោ ហ៊ុន សែន ក៏បានអរគុណជនរួមជាតិ ដែលបានផ្តល់សេចក្តីស្រឡាញ់ ការគាំទ្រ និងទំនុកចិត្តជ្រាលជ្រៅចំពោះសម្តេច និងឯកឧត្តមបណ្ឌិត​ ហ៊ុន ម៉ាណែត ជានាយករដ្ឋមន្រ្តី ដើម្បីដឹកនាំរាជរដ្ឋាភិបាលកម្ពុជា សម្រាប់អាណត្តិទី ៧ បន្តទៀត។

សេចក្តីថ្លែងការណ៍ពិសេសរបស់សម្ដេចតេជោ ហ៊ុន សែន កាលពីថ្ងៃទី ២៦ ខែកក្កដា ឆ្នាំ ២០២៣កន្លងទៅនេះ បានបញ្ជាក់ថា សម្ដេច នឹងមិនបន្តមុខតំណែងជានាយករដ្ឋមន្ត្រី សម្រាប់អាណត្តិទី ៧នេះទេ ដោយឯកឧត្តមបណ្ឌិត ហ៊ុន ម៉ាណែត នឹងក្លាយជានាយករដ្ឋមន្ត្រី នៅល្ងាចថ្ងៃទី ២២ ខែសីហា ឆ្នាំ ២០២៣ខាងមុខ៕