ការបើកទ្វារទឹកទំនប់វារីអគ្គីសនីកំចាយមិនប៉ះពាល់ដល់រមណីយដ្ឋាននានាក្នុងខេត្តកំពតទេ

(កំពត) ៖ ការបើកទ្វាទឹកនៅទំបន់វារីអគ្គីសនីកំចាយ មកដល់ពេលនេះមិនបានប៉ះពាល់ទៅដល់តំបន់​រមណីយដ្ឋាន​កម្សាន្ត នៅតាមដងព្រែកនោះទេ ទាំងនៅដូងទេ តាមឧទ្យានដងព្រែក និងកន្លែងផ្សេងៗទៀតនោះឡើយ។ ប្រតិបត្តិករទេសចរដូងទេ បានលើកឡើងថា រមណីយដ្ឋានទឹកឈូ ដូងទេ ខេត្តកំពត នៅតែមានភ្ញៀវទេសចរជាតិ និងអន្តរជាតិចូលមកលេងកម្សាន្តច្រើន បើទោះជាមានភ្លៀកធ្លាក់ជាញឹកញាប់យ៉ាងណាក្តី។

លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឱ្យដឹងថា ជាងមួយសប្តាហ៍កន្លងមកនេះ ស្ថានភាព​អាកាសធាតុមានភ្លៀងធ្លាក់ជាច្រើនគួរសម នៅខេត្តកំពត តាំងពីមុនពេលបោះឆ្នោតមកម្ល៉េះ ប៉ុន្តែចំនួនភ្ញៀវទេសចរ​មានភាពល្អប្រសើរ។ ជាក់ស្តែងសប្តាហ៍កន្លងទៅនេះអ្នកទេសចរជាតិ និងអន្តរជាតិបានមកលេងកម្សាន្ត​នៅភូមិសាស្ត្រ​ខេត្តកំពតមានចំនួនជាង៣ ម៉ឺននាក់ ខណៈដែលប៉ុន្មាសប្តាហ៍មុនៗពេលអាកាសធាតុល្អ ភ្ញៀវមានត្រឹមតែជាង២​ម៉ឺនប៉ុណ្ណោះ  ដូច្នេះកត្តា អាកាសធាតុ គ្មានសញ្ញាអីដែលធ្វើឲ្យប៉ះពាល់ដល់វិស័យទេសចរណ៍នៅខេត្តកំពតទេ។

លោក សយ ស៊ីណុល ប្រធានមន្ទីរ បានបញ្ជាក់ដែរថា ចំពោះការបើកទ្វារទឹកទំនប់​វារីអគ្គីសនី​កំចាយ​វិញ វាជារឿង​ធម្មតា និងតែងកើតឡើងជារៀងរាល់ឆ្នាំនៅរដូវវស្សា។ ការបើកទ្វារទឹកមកដល់ពេលនេះមានទំហំតិចតួច មិនប៉ះពាល់​ដល់ប្រជាពលរដ្ឋ និងអ្នកផ្តល់សេវាទេសចរណ៍នៅតាមដងព្រែកកំពតទេ។

ក្រុមហ៊ុនស៊ីណូហាយឌ្រូកំចាយ បានបញ្ជាក់ថា ស្ថានភាពកម្ពស់ទឹកទំនប់វារីអគ្គិសនីកំចាយនៅថ្ងៃទី២៧ ខែកក្កដា វេលាម៉ោង១០:00 នាទីកម្ពស់ទឹកអាងស្មើ១៤៨,១១ម៉ែត្រ បើកទ្វារទឹកចំនួន១ ដដែល តែកម្ពស់ថយចុះពី២ម៉ែត្រ មកត្រឹម១ម៉ែត្រតែប៉ុណ្ណោះ។

អត្ថបទ ៖ សឹង រ៉ាត់