ព័ត៌មានជាតិ

សមត្ថកិច្ចត្រៀមខ្លួន ២៤ម៉ោងលើ២៤ម៉ោង ដើម្បីជួយពលរដ្ឋរងគ្រោះដោយសារភ្លៀងធ្លាក់ និង ទឹកហូរធ្លាក់ពីប្រទេសថៃ

បានផុស

២ years មុន

នៅ

ថ្ងៃសៅរ៍ ២៩ កក្កដា ២០២៣

ដោយ

ឧត្តរមានជ័យ ៖ នៅរសៀលថ្ងៃទី២៩ ខែកក្កដា ឆ្នាំ២០២៣ អនុវត្តន៍តាមបទបញ្ជារបស់ លោកមេបញ្ជាការ យោធភូមិភាគទី៤ វរសេនីយ៍ឯក ជឹម សំអោ មេបញ្ជាការ កងការពារព្រំដែនគោកលេខ៤០៣ បានធ្វើការត្រួតពិនិត្យកម្លាំងត្រៀមអន្តរាគមន៍ ព្រមទាំងមធ្យោបាយ សម្ភារៈបម្រើដល់ការជួយសង្គ្រោះប្រជាពលរដ្ឋប្រកបដោយប្រសិទ្ធភាពខ្ពស់ ដើម្បីត្រៀមខ្លួន២៤ម៉ោងលើ២៤ម៉ោង ដើម្បីត្រៀមជួយប្រជាពលរដ្ឋរងគ្រោះដោយសារភ្លៀងធ្លាក់ រួមជាមួយនឹងទឹកហូរធ្លាក់ពីប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកមេបញ្ជាការបានថ្លែងថា ដោយសារអាកាសធាតុមានភ្លៀងធ្លាក់ជាប់ជាប្រចាំ រួមជាមួយនឹងទឹកហូរធ្លាក់ពីប្រទេសថៃតាមជួរភ្នំដងរ៉ែកផងនោះ ស្ថានភាពទឹកភ្លៀងបានឡើងជាបន្តបន្ទាប់ ដូចនេះកងកម្លាំងទាំងអស់ត្រូវត្រៀមលក្ខណៈចេញអន្តរាគមន៍ ២៤ម៉ោងលើ២៤ម៉ោង តាមបទបញ្ជារបស់ថ្នាក់លើ ដើម្បីចុះជួយសង្គ្រោះប្រជាពលរដ្ឋដែលរងគ្រោះដោយធម្មជាតិ ឬយថាហេតុផ្សេងៗដែលកើតមានឡើង ក្នុងភូមិសាស្ត្រទទួលខុសត្រូវក្នុងស្រុកអន្លង់វែង ខេត្តឧត្តរមានជ័យ។

ក្នុងឱកាសនោះដែរ លោកមេបញ្ជាការ បានណែនាំដល់នាយទាហាន នាយទាហានរង និងពលទាហានទាំងអស់ ត្រូវបំពេញតួនាទីភារកិច្ច តាមផែនការ និងបទបញ្ជារបស់ថ្នាក់លើឲ្យបានខ្ជាប់ខ្ជួនដើម្បីសម្រេចបានលទ្ធផលល្អជូនជាតិមាតុភូមិ និងប្រជាជន៕

ដោយ ៖ ចាន់ ធី