សៀវភៅជាច្រើនក្បាលត្រូវបានដាក់ឱ្យអានមិនគិតប្រាក់នៅសួនសាធារណៈ មិនចាញ់នៅបរទេស

សៀវភៅជាច្រើនក្បាលត្រូវបានតម្រៀបដាក់ឱ្យអានដោយមិនគិតថ្លៃនៅសួនវត្តបទុមវតី ជារៀងរាល់ថ្ងៃសៅរ៍ និងអាទិត្យ សម្រាប់សាធារណជនគ្រប់វ័យ មិនថាចាស់ ឬ ក្មេងឡើយ។

ការអានសៀវភៅនេះ ត្រូវបានបង្កើតឡើងដោយកញ្ញា ឆែម ស្រីគា និងយុវជនស្ម័គ្រចិត្តឯទៀត ដោយដាក់ឈ្មោះថា “សួនអំណានភ្នំពេញ” ។ បើតាមវីដេអូដែលបានបង្ហោះដោយ “សួនអំណានភ្នំពេញ” នៅថ្ងៃទី៣០ ខែកក្កដានេះ បានឱ្យដឹងថា គោលបំណងនៃការធ្វើគម្រោងនេះឡើង គឺដើម្បីលើកកម្ពស់ការអានសាធារណៈឱ្យបានទូលំទូលាយ និងធ្វើជាគម្រូល្អសម្រាប់ក្មេងជំនាន់ក្រោយឱ្យស្រឡាញ់ការអានសៀវភៅ។

ជាមួយគ្នានេះ កញ្ញា ឆែម ​ស្រីគា ដែលជាអ្នកបង្កើតការអាននេះឡើងមកបាននិយាយថា កាលពីពេលថ្មីៗនេះ ប្រជាជនខ្មែរចែករំលែកពីការអានតាមសាធារណៈរបស់បរទេសច្រើន។ ចំណែកនៅកម្ពុជា ក៏មានអំណានតាមសាធារណៈផងដែរ ហើយមានមកជាយូរផងដែរ គ្រាន់តែពលរដ្ឋមិនបានដឹងទូលំទូលាយ មិនចាប់អារម្មណ៍ និងមិនបានចូលរួមអានបានច្រើនប៉ុណ្ណោះ។

ជាមួយនឹងបញ្ហាខាងលើ កញ្ញា ក៏សំណូមពរឱ្យពលរដ្ឋចូលរួមអាន នឹងជួយផ្សព្វផ្សាយឱ្យបានច្រើនពីការអានតាមសាធារណៈបែបនេះនៅកម្ពុជាឱ្យបានច្រើន ព្រោះតាមការសង្កេតរបស់កញ្ញា អ្នកដែលចូលរួមអាននៅតិចនៅឡើយ។

កញ្ញា ឆែម ស្រីគា និយាយថា៖ “ខ្ញុំសង្ឃឹមថា នៅថ្ងៃមុខទៀតនឹងមានអ្នកចូលរួមអានសៀវភៅនៅតាមសាធារណៈឱ្យបានច្រើន ដើម្បីបង្ហាញជាគម្រូល្អៗដល់ក្មេងៗ។ ជាពិសេស បង្ហាញសាធារណជនថា នៅកម្ពុជាយើងក៏មានគេអានសៀវភៅនៅទីសាធារណៈបែបនេះដែរ”។

សូមជម្រាបថា ការអានសៀវភៅតាមសាធារណៈនេះ កញ្ញា ឆែម ស្រីគា បានរៀបចំតាំងពីឆ្នាំ២០២០ ដោយឱ្យមានការអាន​នៅ​​ខេត្តប៉ៃលិន។

ចំណែកនៅឆ្នាំ២០២២ គឺមាននៅភ្នំពេញស្របពេលដែលកញ្ញាបន្តការសិក្សានៅទីក្រុងផងដែរ។ ជាមួយនឹងការដាក់​ឱ្យ​អាន​មិន​គិត​ថ្លៃនេះ “សួនអំណានភ្នំពេញ” ក៏មានការទទួលយកសៀវភៅរបស់សប្បុរជនមួយចំនួនដែលមានគម្រោង​បរិច្ចាគ និង​ស្រឡាញ់​ការអានសៀវភៅ ចង់លើកស្ទួយអំណាននៅកម្ពុជាឱ្យកាន់តែមានប្រសិទ្ធភាពផងដែរ៕