អាជ្ញាធរខេត្តកែប បិទចរាចរណ៍ផ្លូវជាតិ​លេខ​៣៣អា ដោយសារជំនន់ទឹកភ្លៀងហូរកាត់

នៅថ្ងៃទី៣០ ខែកក្កដា ឆ្នាំ២០២៣នេះមន្ទីរសាធារណៈការនិងដឹកជញ្ជូនខេត្តកែប បានចេញសេចក្តីជូនដំណឹងពីការផ្អាកធ្វើដំណើរជាបណ្ដោះអាសន្ននៅលើផ្លូវលេខ៣៣អា ចាប់ពីរង្វង់មូលសេះសក្នុងភូមិសាស្ត្រខេត្តកែប។

មន្ទីរសាធារណការខេត្តកែប បានចេញសេចក្តីជូនដំណឹងដល់បងប្អូនប្រជាពលរដ្ឋអ្នកដែលប្រើឃានយន្តគ្រប់ប្រភេទដោយសារស្ថានភាពទឹកភ្លៀងបានធ្លាក់ជាប់ៗ គ្នាប៉ុន្មានថ្ងៃនេះ ធ្វើឲ្យមានជំនន់ទឹកភ្លៀងហូរកាត់ផ្លូវជាតិលេខ៣៣អា ជាប់ ព្រំប្រទល់រវាងខេត្តកែប និងខេត្តកំពត។

អាជ្ញាធរក៏បានអំពាវនាវឲ្យប្រជាពលរដ្ឋដែលមានបំណងធ្វើដំណើរតាមផ្លូវជាតិលេខ៣៣អា សូមមេត្តារកផ្លូវវាងបណ្ដោះ​អាសន្នសិន ដោយសារជំនន់ទឹកភ្លៀងបានបណ្ដាលឱ្យលិចផ្លូវជាតិលេខ៣៣អា ចាប់ពីរង្វង់មូលសេះស មានកម្ពស់ហូរ កាត់លើផ្លូវតែម្តងសូមមេត្តាកាត់តាមឆ្នេរលេងទឹករហូតដល់ពីប្រជុំជនផ្សារដំណាក់ចង្អើរ។

មន្ទីរសាធារណការខេត្តកែប បានបញ្ជាក់ថា ការផ្អាកចរាចរណ៍ជាបណ្ដោះអាសន្នផ្លូវជាតិលេខ៣៣អានេះ គឺដើម្បី ការពារកុំឲ្យខូចខាតផ្លូវខ្លាំងពេក ព្រោះកាលណាទឹកជំនន់ហូរកាត់លើផ្លូវបែបនេះ និងធ្វើឲ្យជ្រាយគ្រឹះផ្លូវបើមានឡានធំ ទៅវាអាចប៉ះពាល់ហើយកុំធ្វើឲ្យខូចដល់ផ្លូវខ្លាំងបន្ថែមទៀត៕

អត្ថបទ៖ សឹង រ៉ាត់